ចិន កាត់ទោសប្រហារជីវិតអ្នកនិពន្ធជនជាតិ អូស្ត្រាលី Yang Hengjun ពីបទចារកម្ម

អ្នកនិពន្ធជនជាតិអូស្ត្រាលីលោក Yang Hengjun ត្រូវបានកាត់ទោសប្រហារជីវិតដោយតុលាការចិន ពោលរយៈពេល ៥ ឆ្នាំ បន្ទាប់ពីគាត់ត្រូវបានចាប់ខ្លួន និងចោទប្រកាន់ពីបទធ្វើចារកម្ម ។ នេះបើយោងតាមការចេញផ្សាយរបស់សារពត៌មាន BBC កាលពីថ្ងៃទី០៥​ ខែកុម្ភៈកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត Yang ដែលជាអ្នកប្រាជ្ញ និងជាអ្នកនិពន្ធប្រលោមលោកដែលបានសរសេរអំពីកិច្ចការរដ្ឋរបស់ប្រទេសចិន ពីមុនធ្លាប់បម្រើការនៅក្រសួងសន្តិសុខរដ្ឋរបស់ប្រទេសចិន ដែលត្រូវបានគេដាក់រហ័សនាមថា “អ្នកដើរតាមលទ្ធិប្រជាធិបតេយ្យ” ប៉ុន្តែការសរសេររបស់គាត់ជារឿយៗមានការរិះគន់ចំៗទៅលើរដ្ឋាភិបាល ។

គាត់ត្រូវបានដាក់ទណ្ឌកម្មដោយរដ្ឋាភិបាលចិនចំពោះការរិះគន់អំពីការរំលោភសិទ្ធិមនុស្សនៅក្នុងប្រទេសចិន និងការតស៊ូមតិរបស់គាត់ទៅលើសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋ ។ លោករស់នៅក្នុងទីក្រុងញូវយ៉ក ប៉ុន្តែបានធ្វើដំណើរទៅកាន់ទីក្រុងក្វាងចូវក្នុងខែមករា ឆ្នាំ២០១៩ ជាមួយប្រពន្ធ និងកូនរបស់លោក និងត្រូបានចាប់ខ្លួននៅព្រលានយន្តហោះ ។

ពាក់ព័ន្ធនឹងបញ្ហានេះដែរ រដ្ឋមន្ត្រីការបរទេសអូស្រ្តាលីលោកស្រី Penny Wong បានកោះហៅឯកអគ្គរដ្ឋទូតចិនប្រចាំប្រទេសអូស្ត្រាលី និងបានអំពាវនាវឲ្យចិនប្រកាន់យ៉ាងខ្ជាប់ខ្ជួននូវស្តង់ដារមូលដ្ឋាននៃយុត្តិធម៌ និងការព្យាបាលបណ្ឌិត Yang ស្របតាមបទដ្ឋានអន្តរជាតិ និងកាតព្វកិច្ចផ្លូវច្បាប់របស់ប្រទេសចិន ។

ចំណែកអ្នកនាំពាក្យក្រសួងការបរទេសចិន លោក Wang Wenbin បានប្រាប់អ្នកសារព័ត៌មានថា ករណីរបស់លោកបណ្ឌិត Yang ត្រូវបានដោះស្រាយយ៉ាងម៉ត់ចត់ និងស្របតាមច្បាប់ ។ ករណីរបស់បុរសអាយុ ៥៨ ឆ្នាំរូបនេះបានធ្វើឲ្យមានការចោទសួរ និងសង្ស័យចាប់តាំងពីការចាប់ខ្លួនរូបលោកមក រួមទាំងការកាត់ក្តីដោយសម្ងាត់នៅឆ្នាំ ២០២១ ខណៈអ្នក​គាំទ្រ​លោក​បណ្ឌិត Yang បាន​ពណ៌នា​ការ​ឃុំ​ខ្លួន​លោក​ថា​ជាការ​ធ្វើ​ទុក្ខបុកម្នេញ​ផ្នែក​នយោបាយ ។

គួរបញ្ជាក់ថា ការឃុំខ្លួនរបស់លោក Yang Hengjun និងអ្នកកាសែតអូស្ត្រាលី Cheng Lei ក្នុងឆ្នាំ ២០២០ បានរួមចំណែកដល់ទំនាក់ទំនងដ៏ជូរចត់រវាងទីក្រុងប៉េកាំង និងទីក្រុងកង់បេរ៉ា ប៉ុន្តែទំនាក់ទំនងទាំងនោះមានស្ថេរភាព ចាប់តាំងពីការផ្លាស់ប្តូររដ្ឋាភិបាលនៅប្រទេសអូស្ត្រាលីក្នុងឆ្នាំ ២០២២ ។

ទោះជាយ៉ាងណាក៏ដោយ មន្ត្រីជាន់ខ្ពស់របស់វិទ្យាស្ថាន Lowy លោក Richard McGregor បានប្រាប់កាសែត Sydney Morning Herald ថា ការកាត់ទោសថ្មីរបស់លោកបណ្ឌិត Yang ទំនងជាមានផលប៉ះពាល់យ៉ាងធ្ងន់ធ្ងរដល់ទំនាក់ទំនងទ្វេភាគីរវាងប្រទេសទាំងពីរ៕

អត្ថបទ ៖ ប៊ុន សុភាព