ព័ត៌មានអន្ដរជាតិ
មេទ័ពកំពូលថ្មីរបស់អ៊ុយក្រែន មានសាច់សាលោហិត កំពុងរស់នៅក្នុងប្រទេស រុស្ស៊ី
សារព័ត៌មានរុស្ស៊ីជាច្រើនបានរាយការណ៍នៅថ្ងៃសុក្រទី៩ខែកុម្ភៈថា អគ្គមេបញ្ជាការថ្មីអ៊ុយក្រែនលោក Aleksandr Syrsky មានឪពុកម្តាយនិងប្អូនប្រុស កំពុងរស់នៅក្នុងប្រទេសរុស្ស៊ី។
![](https://www.kampucheathmey.com/wp-content/uploads/2024/02/image-569-1024x555.png)
កាលពីថ្ងៃព្រហស្បតិ៍ ប្រធានាធិបតីអ៊ុយក្រែនលោក វ្ល៉ាឌីមៀរ ហ្សេលេនស្គី បានប្រកាសតែងតាំងលោក Syrsky ជំនួសតំណែងលោក Valery Zaluzhny ដែលការរុះរើនេះ ធ្វើឡើងប៉ុន្មានខែបន្ទាប់ពីអ៊ុយក្រែនរងបរាជ័យក្នុងការវាយបកទៅរុស្ស៊ី និងចំពេលស្ថានភាពលើសមរភូមិ កាន់តែយ៉ាប់យ៉ឺនទៅៗ។
តាមការចុះផ្សាយរបស់សារព័ត៌មាន TASS, លោក Syrsky កើតនៅតំបន់ Vladimir ភាគខាងលិចប្រទេសរុស្ស៊ី ពេលដែលទាំងរុស្ស៊ីនិងអ៊ុយក្រែន គឺជាផ្នែករបស់សហភាពសូវៀត ហើយប្អូនប្រុសរបស់គាត់ឈ្មោះ Oleg កំពុងរស់នៅតំបន់នោះ។
លោក Oleg ប្រាប់ TASS ថា លោក Syrsky មិនបាននិយាយជាមួយសាច់ញាតិអស់រយៈពេលជាច្រើនឆ្នាំមកហើយ។ ខ្ញុំមិនដែលទាក់ទងជាមួយគាត់ទេ ខ្ញុំនិងឪពុកម្តាយក៏មិនដឹងថាគាត់នៅឯណាដែរ ហើយខ្ញុំមិនទទួលបានដំណឹងពីគាត់សោះ ចាប់តាំងពីគាត់ផ្លាស់ទៅប្រទេសអ៊ុយក្រែន”។
![](https://www.kampucheathmey.com/wp-content/uploads/2024/02/image-570-1024x683.png)
លើសពីនេះ យោងតាមគណនីប្រព័ន្ធផ្សព្វផ្សាយសង្គមរបស់ពួកគេ គេបានឃើញឪពុកម្តាយរបស់លោក Syrsky តែងតែចូលរួមការប្រារព្ធពិធីអបអរជ័យជម្នះរបស់រុស្ស៊ីក្នុងសង្គ្រាមលោកលើកទី២ជានិច្ច ហើយចូលចិត្តកម្មវិធីគាំទ្រទីក្រុងមូស្គូនៅលើអ៊ីនធឺណិតខ្លាំងបំផុត។
សូមបញ្ជាក់ជាថ្មី លោក Syrsky កើតក្នុងឆ្នាំ១៩៦៥ នៅសាធារណរដ្ឋសង្គមនិយមសហព័ន្ធសូវៀតរុស្ស៊ី ហើយផ្លាស់ទៅសាធារណរដ្ឋសង្គមនិយមសូវៀតអ៊ុយក្រែនក្នុងឆ្នាំ១៩៨០។ គាត់ បានចាប់ផ្តើមចូលបម្រើក្នុងជួរកងទ័ពនៅឆ្នាំ១៩៨៦ ជាមេបញ្ជាការកងអនុសេនាតូចកាំភ្លើងធំ។
ជានិស្សិតបញ្ចប់ការសិក្សានៅសាលាបញ្ជាការអាវុធរួមជាន់ខ្ពស់ក្នុងទីក្រុងមូស្គូ, គាត់បានបម្រើការឲ្យយោធាសូវៀតនៅប្រទេសអាហ្វហ្គានីស្ថាន តាហ្ស៊ីគីស្ថាន និងឆេកូស្លូវ៉ាគី ហើយក្រោយការរំលាយសហភាពសូវៀតនៅឆ្នាំ១៩៩១ លោក Syrsky បានឡើងឋានៈម្តងមួយកាំៗក្នុងជួរកងទ័ពអ៊ុយក្រែន។
![](https://www.kampucheathmey.com/wp-content/uploads/2024/02/image-571-1024x683.png)
ពេលផ្ទុះជម្លោះស៊ីវិលអ៊ុយក្រែននៅតំបន់ Donbass ក្នុងឆ្នាំ២០១៤ លោក Syrsky ត្រូវបានតែងតាំងជាអនុប្រធាននៃមជ្ឈមណ្ឌលបញ្ជាការសំខាន់ នៃកងកម្លាំងប្រដាប់អាវុធ ដោយទទួលបន្ទុកមើលការខុសត្រូវសម្របសម្រួលកិច្ចសហប្រតិបត្តិការជាមួយអង្គការណាតូ ហើយត្រូវបានតែងតាំងជាអគ្គសេនាធិការ ប្រតិបត្តិការប្រឆាំងភេរវករកម្ទេចកងជីវពល Donbass ដែលប្រឆាំងរដ្ឋាភិបាលក្រោយរដ្ឋប្រហារ Maidan។
លុះមកដល់ឆ្នាំ២០១៦ គាត់ត្រូវតែងតាំងជាប្រធានទីស្នាក់ការកណ្តាលប្រតិបត្តិការរួមនៃកងកម្លាំងប្រដាប់អាវុធអ៊ុយក្រែន និងដំឡើងឋានៈជាឧត្តមសេនីយ៍ឯក។
បន្ទាប់ពីវិបត្តិអ៊ុយក្រែន ពុះកញ្ជ្រោលពេញទំហឹងទៅជាសង្រ្គាម លោក Syrsky មានភារកិច្ចដឹកនាំកងកម្លាំងអ៊ុយក្រែន ចូលទៅក្នុងតំបន់នៃទីក្រុងកៀវ ដែលក្រោយមក ទ័ពរុស្ស៊ីស្ម័គ្រចិត្តដកថយស្របតាមសំណើដើម្បីឈានដល់កិច្ចព្រមព្រៀងសន្តិភាពនានិទាឃរដូវឆ្នាំ២០២២។
នៅខែកញ្ញាឆ្នាំដដែលនោះ ក្រោយកងកម្លាំងរុស្ស៊ី ដកថយពីតំបន់ Kharkov ដើម្បីទៅពង្រឹងកម្លាំងនៅកន្លែងផ្សេងតាមបណ្តោយខ្សែត្រៀមជួរមុខ លោក Syrsky បានបញ្ជាកងកម្លាំងអ៊ុយក្រែនម្តងទៀត ដោយនាំទ័ពចូលតំបន់ Soledar និង Bakhmut ហើយមកដល់ខែកុម្ភៈឆ្នាំ២០២៤នេះ លោកក៏បានក្លាយជាអគ្គមេបញ្ជាការកងកម្លាំងប្រដាប់អាវុធតែម្តង៕
អត្ថបទ៖ សុខ សុវណ្ណ
-
សន្តិសុខសង្គម៦ ថ្ងៃ ago
ជនដៃដល់ បាញ់មនុស្ស២នាក់ស្លាប់ នៅបុរីប៉េងហួត មានគោរម្យងារជា ឧកញ៉ា
-
សន្តិសុខសង្គម៦ ថ្ងៃ ago
សមត្ថកិច្ច ចាប់បានបុរសដែលបាញ់មនុស្ស២នាក់ឱ្យស្លាប់ និងរបួស នៅបុរីប៉េងហ៊ួតបឹងស្នោ
-
សន្តិសុខសង្គម៦ ថ្ងៃ ago
Update៖ សមត្ថកិច្ចចាប់ខ្លួនជនសង្ស័យម្នាក់ ក្នុងហេតុការណ៍ផ្ទុះអាវុធ នៅក្នុងបុរីប៉េងហួតបឹងស្នោ
-
ព័ត៌មានជាតិ៥ ថ្ងៃ ago
សមាគមឧកញ៉ា នឹងស្នើបញ្ចប់ងារឧកញ៉ាពីឈ្មោះ ស្រី ស៊ីណា ក្រោយបាញ់ឱ្យមនុស្សស្លាប់
-
អត្ថាធិប្បាយ៥ ថ្ងៃ ago
សមត្ថកិច្ចប្រើពេល៣ម៉ោង ក្របួចកឧកញ៉ាប្រើកាំភ្លើងផ្ដាច់ជីវិតគូរស្នេហ៍មួយគូរ
-
KPT+៣ ថ្ងៃ ago
១០ ប្រទេស កំពូលគ្រោះថ្នាក់ខ្លាំង ចំពោះស្រ្តី
-
ព័ត៌មានជាតិ៥ ថ្ងៃ ago
ព្រះភិក្ខុ អុឹង ប៊ុនហ៊ូវ ប្រគេនដី២០០ហិកតាក្នុងខេត្តកំពង់ឆ្នាំង ដើម្បីសង់ពុទ្ធិកសាកលវិទ្យាល័យព្រះសីហនុរាជ
-
ព័ត៌មានជាតិ២ ថ្ងៃ ago
ក.ប.ប រកឃើញថាឈ្មួញនាំចូលផ្លែទុរេនពីប្រទេសជិតខាង និងមានជ្រលក់ថ្នាំ ហើយលក់បន្លំថាជាទុរេនក្នុងស្រុក