ព័ត៌មានអន្ដរជាតិ
អ្នកជំនាញ ស្មើឲ្យរដ្ឋាភិបាលថៃ ផ្តល់សញ្ជាតិ ដល់កូនពលករចំណាកស្រុក ដែលកើតក្នុងដីខ្លួន
លោកវេជ្ជបណ្ឌិត Somchai Jitsuchon នាយកស្រាវជ្រាវនៃការអភិវឌ្ឍរួមគ្នា នៅវិទ្យាស្ថានអភិវឌ្ឍន៍ស្រាវជ្រាវថៃ (TDRI) បានស្នើឲ្យរាជរដ្ឋាភិបាលផ្តល់សញ្ជាតិថៃ ដល់កុមារកើតលើដីប្រទេសនេះ ក្នុងគ្រួសារមានឪពុកម្តាយជាជនជាតិភាគតិច ឬពលករចំណាកស្រុក ដើម្បីដោះស្រាយចំពោះវិបត្តិនៃការធ្លាក់ចុះអត្រាកំណើតរបស់ប្រជាជន។ នេះបើតាមការចុះផ្សាយរបស់គេហទំព័រ Thai PBS នៅថ្ងៃព្រហស្បតិ៍ទី២៩ខែកុម្ភៈ។

អ្នកជំនាញសង្គមរូបនេះនិយាយថា ឆ្នាំមុន ប្រទេសថៃមានអត្រាកំណើតប្រហែល៥០ម៉ឺននាក់ ហើយតួលេខ ត្រូវគេរំពឹងថា នឹងធ្លាក់ចុះមកនៅត្រឹម១០ម៉ឺននាក់ប៉ុណ្ណោះ ក្នុងរយៈពេល៤ទៅ៥ឆ្នាំខាងមុខ ដោយសារតែ គ្រួសារជាច្រើនមិនមានកូនទាល់តែសោះ ឬមានកូនតែម្នាក់គត់ ព្រោះតែបញ្ហាហិរញ្ញវត្ថុ។ លើសពីនេះ គូស្វាមីភរិយាទើបរៀបការថ្មីថ្មោងប្រហែល៦០% គឺមិនទាន់ត្រៀមខ្លួន ឬគ្មានលទ្ធភាពយកកូនឡើយ។
ដោយសារហេតុផលខាងលើនេះហើយ ទើបលោកស្នើឲ្យផ្តល់សញ្ជាតិថៃ ដល់កុមារដែលកើតក្នុងប្រទេសដែលមានឪពុកម្តាយជាជនជាតិភាគតិច ឬជាពលករចំណាកស្រុក ខណៈលោកប៉ាន់ស្មានថា ប្រហែលជាមានករណីចាប់កំណើតបែបនេះ ប្រហែលមួយលាននាក់រួចទៅហើយនៅក្នុងប្រទេសថៃ។

លោក Somchai បន្តថា រាជរដ្ឋាភិបាល ក៏គួរតែបង្កើនគុណភាពជីវិតដល់កុមារទាំងនេះ ដោយអនុញ្ញាតឲ្យពួកគេទទួលបានការអប់រំ ការថែទាំសុខភាព និងសេវាផ្សេងៗ ស្រដៀងនឹងកុមារថៃផងដែរ ដូច្នេះពួកគេនឹងមានអារម្មណ៍ថា ខ្លួនពិតជាជនជាតិថៃពេញសិទ្ធិមែន។
សូមបញ្ជាក់ថា បច្ចុប្បន្ន កុមារដែលចាប់កំណើតបែបនេះ មិនត្រូវបានរាប់បញ្ចូលក្នុងជំរឿនថៃ និងគ្មានសិទ្ធិចុះឈ្មោះឡើយ។ ពួកគេទទួលបានតែអត្តសញ្ញាណប័ណ្ណលេខ១៣ខ្ទង់ ដែលចាប់ផ្តើមដោយលេខ ០ ខុសពីអត្តសញ្ញាណប័ណ្ណធម្មតាសម្រាប់ជនជាតិថៃ ប៉ុណ្ណោះ។
ទោះបីជាយ៉ាងណាក៏ដោយ មានកុមារមួយចំនួនមិនទទួលបានអត្តសញ្ញាណប័ណ្ណពិសេសនេះទេ ដោយសារពួកគេមិនមានឯកសារផ្លូវការណាមួយដើម្បីបញ្ជាក់ថា ពួកគេកើតនៅក្នុងប្រទេសថៃ៕
អត្ថបទ៖ សុខ សុវណ្ណ
ចុចអាន៖ ថៃ ជិតដាក់ សម្លតុងយ៉ាំ ចូលជាសម្បត្តិបេតិកភណ្ឌវប្បធម៌អរូបី អង្គការយូណេស្កូ

-
ព័ត៌មានអន្ដរជាតិ១ ថ្ងៃ ago
កម្មករសំណង់ ៤៣នាក់ ជាប់ក្រោមគំនរបាក់បែកនៃអគារ ដែលរលំក្នុងគ្រោះរញ្ជួយដីនៅ បាងកក
-
សន្តិសុខសង្គម២ ថ្ងៃ ago
ករណីបាត់មាសជាង៣តម្លឹងនៅឃុំចំបក់ ស្រុកបាទី ហាក់គ្មានតម្រុយ ខណៈបទល្មើសចោរកម្មនៅតែកើតមានជាបន្តបន្ទាប់
-
ព័ត៌មានអន្ដរជាតិ៤ ថ្ងៃ ago
រដ្ឋបាល ត្រាំ ច្រឡំដៃ Add អ្នកកាសែតចូល Group Chat ធ្វើឲ្យបែកធ្លាយផែនការសង្គ្រាម នៅយេម៉ែន
-
ព័ត៌មានជាតិ២ ថ្ងៃ ago
បងប្រុសរបស់សម្ដេចតេជោ គឺអ្នកឧកញ៉ាឧត្តមមេត្រីវិសិដ្ឋ ហ៊ុន សាន បានទទួលមរណភាព
-
ព័ត៌មានជាតិ៤ ថ្ងៃ ago
សត្វមាន់ចំនួន ១០៧ ក្បាល ដុតកម្ទេចចោល ក្រោយផ្ទុះផ្ដាសាយបក្សី បណ្តាលកុមារម្នាក់ស្លាប់
-
ព័ត៌មានអន្ដរជាតិ៥ ថ្ងៃ ago
ពូទីន ឲ្យពលរដ្ឋអ៊ុយក្រែនក្នុងទឹកដីខ្លួនកាន់កាប់ ចុះសញ្ជាតិរុស្ស៊ី ឬប្រឈមនឹងការនិរទេស
-
សន្តិសុខសង្គម១ ថ្ងៃ ago
ការដ្ឋានសំណង់អគារខ្ពស់ៗមួយចំនួនក្នុងក្រុងប៉ោយប៉ែតត្រូវបានផ្អាក និងជម្លៀសកម្មករចេញក្រៅ
-
សន្តិសុខសង្គម៨ ម៉ោង ago
ជនសង្ស័យប្លន់រថយន្តលើផ្លូវល្បឿនលឿន ត្រូវសមត្ថកិច្ចស្រុកអង្គស្នួលឃាត់ខ្លួនបានហើយ