ការតវ៉ានៅស្ថានីយ៍រថភ្លើងមីយ៉ាន់ម៉ា ប្រែក្លាយទៅជាអំពើហិង្សា

ការតវ៉ានៅស្ថានីយ៍រថភ្លើង Mandalay បានប្រែក្លាយទៅជាអំពើហិង្សាកាលពីយប់ថ្ងៃទី១៧ខែកុម្ភៈ ដោយអ្នកស្រុកបានរាយការណ៍ពីការបាញ់កាំភ្លើង។

នៅពេលថ្ងៃ អ្នកគាំទ្ររដ្ឋាភិបាលជាប់ឆ្នោត បានរារាំងមិនឲ្យរថភ្លើងរបស់ក្រុមហ៊ុន Rail Bus Engine (RBE) ចេញដំណើរ ជាសញ្ញានៃការតវ៉ាប្រឆាំងនឹងសកម្មភាពរបស់កងទ័ព។

សាក្សីបាននិយាយថា ក្រុមបាតុករបានចាប់ផ្តើមការតវ៉ារបស់ពួកគេនៅម៉ោងប្រហែល២រសៀល ដោយដាក់គល់ឈើនិងវត្ថុធ្ងន់ៗផ្សេងទៀតនៅលើផ្លូវដែក ដើម្បីរារាំងផ្លូវរថភ្លើង។

នៅទីបំផុត ហ្វូងមនុស្សបានបំបែកគ្នានៅម៉ោង៨យប់ ដោយស្របតាមបម្រាមគោចររបស់ប្រទេស។ ទោះបីជាយ៉ាងណាក៏ដោយ បាតុករខ្លះមិនព្រមចាកចេញទេ ដែលជាហេតុបណ្តាលឲ្យមានការប៉ះទង្គិចគ្នាជាមួយកងសន្តិសុខ។

ប្រជាពលរដ្ឋបានរាយការណ៍ថា កាំភ្លើងជាច្រើនគ្រាប់ ត្រូវបានបាញ់នៅម៉ោងប្រមាណ៨និង៣០នាទីយប់។

“យើងធុំក្លិនឈ្ងៀមគ្រាប់កាំភ្លើងមុនម៉ោង៩យប់។ បាតុករខ្លះនិយាយថា កងកម្លាំងសន្តិសុខបានប្រើឧស្ម័នបង្ហូរទឹកភ្នែក។ យើងមិនបានឃើញរថភ្លើងណាមួយចេញដំណើរទេ រហូតដល់ពាក់កណ្តាលអធ្រាត្រ”។

អ្នកស្ម័គ្រចិត្តម្នាក់ត្រូវបានគេរាយការណ៍ថា រងរបួសក្នុងពេលប៉ះទង្គិចគ្នា។ រថយន្តអង្គការសប្បុរសធម៌ជាច្រើនគ្រឿងនៅក្នុងតំបន់នេះ ក៏ត្រូវបានគេបាញ់ដាក់ផងដែរ៕

ប្រែសម្រួលដោយ៖ Vann Vann

ប្រភព៖ Myanmar Times