ឈៀងម៉ៃ ឡើងឈរលេខ១ ម្តងទៀត ជាទីក្រុង មានខ្យល់ពុលអាក្រក់បំផុត លើពិភពលោក

សារព័ត៌មាន Thai PBS ផ្សាយថា ឈៀងម៉ៃ បានក្លាយជាទីក្រុងមានកម្រិតខ្យល់ពុល (AQI) ខ្លាំងជាងគេបំផុតលើពិភពលោក នៅថ្ងៃសុក្រទី១៥ខែមីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមគេហទំព័រសន្ទស្សន៍គុណភាពខ្យល់ IQAir, កម្រិត AQI នៅឈៀងម៉ៃបានឈានដល់លេខ២០០ បន្ទាប់មកគឺទីក្រុង តាស្កិន នៃប្រទេសអូសបេគីស្ថាន ឈានដល់លេខ១៩៣ និងទីក្រុង ឡាហ័រ នៃប្រទេសប៉ាគីស្ថាន ឈានដល់លេខ១៥៤។

នៅថ្ងៃដដែលនោះ នាយកដ្ឋានគ្រប់គ្រងការបំពុលរបស់ប្រទេសថៃ បានរាយការណ៍ថា កំហាប់ភាគល្អិត PM2.5 នៅក្នុងខេត្តក្រុងភាគខាងជើងចំនួន៨ បានឈានដល់កម្រិតពណ៌ក្រហមដ៏គ្រោះថ្នាក់ ជាពិសេសនៅឈៀងម៉ៃ ដែលកម្រិតបានឈានដល់ ១៣០.៩ មីក្រូក្រាមក្នុងមួយម៉ែត្រគូប។

សូមបញ្ជាក់ថា នេះមិនមែនជាលើកដំបូងឡើយដែល ឈៀងម៉ៃ ជាប់ចំណាត់ថ្នាក់ជាទីក្រុងមានខ្យល់ពុលអាក្រក់បំផុតលើពិភពលោក ពោលគឺកាលពីឆ្នាំមុន ទីក្រុងនេះក៏ទទួលចំណាត់ថ្នាក់លេខមួយដែរ។

នៅពេលនោះ ​សាធារណជន​ ត្រូវ​បាន​ណែនាំ​ដល់ឲ្យ​តាមដាន​សុខភាពរបស់​ខ្លួន ក៏ដូចជា​កាត់បន្ថយ​សកម្មភាព​ខាងក្រៅផងដែរ ប្រសិនបើ​ពួកគេ​ពិបាក​ដកដង្ហើម ក្រហាយ​ភ្នែក ឬ​ក្អក​។

ការិយាល័យគ្រប់គ្រងគុណភាពខ្យល់និងសំឡេង នៃនាយកដ្ឋានគ្រប់គ្រងការបំពុលរបស់ប្រទេសថៃ និយាយថា បុគ្គលដែលមានហានិភ័យ គួរតែចៀសវាងការហាត់ប្រាណខ្លាំង ជាពិសេសនៅខាងក្រៅ ហើយត្រូវពិគ្រោះជាមួយវេជ្ជបណ្ឌិត ប្រសិនបើរោគសញ្ញាកាន់តែអាក្រក់ទៅៗ។

លើសពីនេះ ជំងឺផ្លូវដង្ហើម និងអាឡ័កស៊ីដែលបណ្តាលមកពីការបំពុលបរិយាកាសយ៉ាងធ្ងន់ធ្ងរ នៅឈៀងម៉ៃ ក៏បណ្តាលឲ្យមនុស្សចំនួន១២៦៧១នាក់ ត្រូវបញ្ជូនទៅមន្ទីរពេទ្យផងដែរ។

ទោះបីជាយ៉ាងណាក៏ដោយ អ្នកជំនាញព្រមានថា ចំនួនពិតប្រាកដគឺខ្ពស់ជាងសេចក្តីរាយការណ៍ទៅទៀត ព្រោះអ្នកជំងឺជាច្រើនមិនអាចចូលព្យាបាលបាន ដោយសារមន្ទីរពេទ្យផ្ទុកមនុស្សច្រើនលើសកម្រិត៕

អត្ថបទ៖ សុខ សុវណ្ណ

ចុចអាន៖ ឈៀងម៉ៃ ជាប់ឈ្មោះជាទីក្រុង មានខ្យល់ពុលអាក្រក់បំផុត លើលោក