ឈៀងម៉ៃ ជាប់ឈ្មោះជាទីក្រុង មានខ្យល់ពុលអាក្រក់បំផុត លើលោក

នៅថ្ងៃព្រហស្បតិ៍ទី០៩ខែមីនា ខ្យល់អាកាសមិនល្អបានគ្របដណ្ដប់ គោលដៅទេសចរណ៍ដ៏ពេញនិយមរបស់ប្រទេសថៃ គឺទីក្រុង ឈៀងម៉ៃ ដោយគុណភាពខ្យល់នៅទីនោះ ជាប់ចំណាត់ថ្នាក់អាក្រក់បំផុតលើពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមម៉ោង២រសៀល (ម៉ោងក្នុងស្រុក) សន្ទស្សន៍គុណភាពខ្យល់ (AQI) នៅ Chang Phueak នៃទីក្រុងឈៀងម៉ៃ ត្រូវបានកត់ត្រានៅកម្រិត១៨៧ ដែលជាកម្រិតមិនល្អសម្រាប់សុខភាព។ នេះបើយោងតាមការិយាល័យគ្រប់គ្រងគុណភាពខ្យល់និងសំឡេង នៃនាយកដ្ឋានគ្រប់គ្រងការបំពុលរបស់ប្រទេសថៃ។

​ស្របពេលជាមួយគ្នានោះ សាធារណជន​ ត្រូវ​បាន​ណែនាំ​ដល់ឲ្យ​តាមដាន​សុខភាពរបស់​ពួកគេ ក៏ដូចជា​កាត់បន្ថយ​សកម្មភាព​ខាងក្រៅផងដែរ ប្រសិនបើ​ពួកគេ​ពិបាក​ដកដង្ហើម ក្រហាយ​ភ្នែក ឬ​ក្អក​។

ការិយាល័យខាងលើបាននិយាយថា បុគ្គលដែលមានហានិភ័យ គួរតែចៀសវាងការហាត់ប្រាណខ្លាំង ជាពិសេសនៅខាងក្រៅ ហើយត្រូវពិគ្រោះជាមួយវេជ្ជបណ្ឌិត ប្រសិនបើរោគសញ្ញាកាន់តែអាក្រក់ទៅៗ។

តាមការបញ្ជាក់របស់ក្រុមហ៊ុន IQAir ដែលជាដៃគូបច្ចេកវិទ្យានៃកម្មវិធីបរិស្ថានរបស់អង្គការសហប្រជាជាតិ, ការបំពុលបរិយាកាសនៅឈៀងម៉ៃ គឺឈានដល់កម្រិតអាក្រក់បំផុតលើពិភពលោក។ ចំណាត់ថ្នាក់នៃការបំពុលទីក្រុងរបស់ IQAir គឺជាការយកទីក្រុងមួយទៅប្រៀបធៀបជាមួយទីក្រុងចំនួន៩៥នៅទូទាំងពិភពលោក៕

ប្រែសម្រួល៖ Vann Vann

ប្រភព៖ CNA

ចុចអាន៖ បញ្ហាកំហាប់ខ្យល់ពុលនៅបាងកក នឹងកាន់តែអាក្រក់ទៅៗ ក្នុងខែនេះ