អនាគតប្រធានាធិបតី ឥណ្ឌូណេស៊ី ប្ដេជ្ញាកម្ចាត់ភាពក្រីក្ររបស់ប្រជាពលរដ្ឋ

បន្ទាប់ពីប្រកាសលទ្ធផលបោះឆ្នោតផ្លូវការ អនាគតប្រធានាធិបតីឥណ្ឌូណេស៊ីលោក Prabowo Subianto បានសន្យានឹងធ្វើជាប្រធានាធិបតីសម្រាប់ប្រជាជនឥណ្ឌូណេស៊ីទាំងអស់ ជាពិសេសលោកបានប្ដេជ្ញានឹងលុបបំបាត់ភាពក្រីក្រ និងភាពអយុត្តិធម៌នៅក្នុងប្រទេស ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters កាលពីថ្ងៃទី២១ ខែមីនាកន្លងទៅ ។

រដ្ឋមន្ត្រីការពារជាតិឥណ្ឌូណេស៊ីវ័យ ៧២ ឆ្នាំរូបនេះបានឈ្នះការបោះឆ្នោតជ្រើសរើសប្រធានាធិបតីកាលពីថ្ងៃទី១៤ ខែកុម្ភៈ ជាមួយនឹងសំឡេងគាំទ្រជិត ៦០ ភាគរយដែលជាជ័យជម្នះមិនឲ្យគូរប្រជែងតដៃរួចឡើយ ពោលលោក Anie Baswedan ដែលជាអតីតអភិបាលក្រុងហ្សាកាតាទទួលបានសំឡេង ២៥ ភាគរយ និងលោក Ganjar Pranowo ជាអតីតអភិបាលខេត្តជ្វាកណ្ដាលបានសំឡេងត្រឹម ១៦ ភាគរយប៉ុណ្ណោះ ។

ស្របពេលជាមួយគ្នានេះ លោក Prabowo ក៏បានអរគុណម្ចាស់ឆ្នោត និងអ្នកស្ម័គ្រចិត្តដែលបានប្រមូលផ្ដុំគ្នាដើម្បីអបអរដល់រូបលោកនៅឯគេហដ្ឋានភាគខាងត្បូងទីក្រុងហ្សាកាតា ហើយលោកថែមអះអាងទៀតថា ការបោះឆ្នោតនេះប្រព្រឹត្តទៅដោយរលូន សេរី និងយុត្តិធម៌ ទោះបីជាបេក្ខជនចាញ់ឆ្នោតស្នើឲ្យតុលាការធម្មនុញ្ញរៀបចំការបោះឆ្នោតសាជាថ្មីម្ដងទៀតក៏ដោយ ។

ទន្ទឹមនោះ អតីតមេបញ្ជាការកងកម្លាំងពិសេសរូបនេះបានលើកឡើងបន្ថែមថា “យើងសូមអញ្ជើញប្រជាជនឥណ្ឌូណេស៊ីទាំងអស់ឲ្យសម្លឹងឆ្ពោះទៅមុខដោយការឯកភាព និងរួបរួមគ្នា ពីព្រោះយើងមានបញ្ហាប្រឈមជាច្រើនទៀតដើម្បីត្រូវដោះស្រាយ ហើយលោកក៏សូមថ្លែងអំណរគុណដល់លោកប្រធានាធិបតី Joko Widodo ដែលជួយជ្រោមជ្រែងឲ្យគណបក្សឈ្នះឆ្នោតអាណត្តិទី៣” ។

បន្ថែមពីនេះ អនាគតប្រធានាធិបតីក៏បានប្ដេជ្ញាម្ដងហើយម្ដងទៀតអំពីការបន្តគោលនយោបាយសេដ្ឋកិច្ចរបស់លោក Joko Widodo ពាក់ព័ន្ធទៅនឹងហេរដ្ឋារចនាសម្ព័ន្ធ ផ្ដល់កំណើន និងវិបុលភាពនៅក្នុងសេដ្ឋកិច្ចនៃក្រុមប្រទេស G20 ដែលមានតម្លៃរាប់ពាន់លានដុល្លារ ។

គួរបញ្ជាក់ថា លោក Prabowo នឹងត្រូវសម្ពោធឡើងកាន់តំណែងជាប្រធានាធិបតីក្នុងប្រទេសដែលមានលទ្ធិប្រជាធិបតេយ្យលំដាប់ទី ៣ របស់ពិភពលោកនាខែតុលាខាងមុខនេះ ខណៈលោកឧត្តមសេនីយ៍ផ្កាយ ៤ រូបនេះកាន់តែមានប្រជាប្រិយភាពថែមមួយកម្រិតទៀត ដោយសារការជ្រើសរើសយកកូនប្រុសសំណព្វចិត្តរបស់លោក Joko Widodo មកធ្វើជាដៃស្ដាំរបស់ខ្លួន ៕

ដោយ ៖ សុខ ជីវ័ន្ត

ចុចអាន ៖ បក្សប្រឆាំង ឥណ្ឌូណេស៊ី ស្នើបោះឆ្នោតម្ដងទៀត និងដកឈ្មោះកូនប្រុស​លោក Widodo ចេញពីសន្លឹកឆ្នោត