មេបក្សកុម្មុយនីស្ត វៀតណាម អញ្ជើញលោក ពូទីន មកទស្សនកិច្ច និងពង្រឹង​គោលនយោបាយការបរទេស

អគ្គលេខាបក្សកុម្មុយនីស្តវៀតណាមលោក ង្វៀន ភូទ្រុង បានអញ្ជើញលោកប្រធានាធិបតីរុស្ស៊ី វ្ល៉ាឌីមៀរ ពូទីន ឲ្យមកបំពេញទស្សនកិច្ចផ្លូវការនៅវៀតណាម ដើម្បីពង្រឹងគោលនយោបាយការបរទេសរបស់ខ្លួន ។ នេះបើយោងតាមការចេញផ្សាយដោយសារព័ត៌មាន VN Express កាលពីថ្ងៃទី២៦ ខែមីនាកន្លងទៅ ។

ចំណែកសេចក្តីថ្លែងការណ៍របស់គណៈកម្មាការមជ្ឈិមទទួលបន្ទុកកិច្ចការបរទេសបានឲ្យដឹងថា លោក ភូទ្រុង បានហៅទូរស័ព្ទអញ្ជើញលោក ពូទីន កាលពីថ្ងៃអង្គារសម្រាប់ដំណើរទស្សនកិច្ចផ្លូវការ ខណៈប្រធានាធិបតីរុស្ស៊ីក៏បានទទួលយកសំណើរនេះផងដែរ ប៉ុន្តែចំពោះពេលវេលាជាក់លាក់ណាមួយមិនទាន់ត្រូវបានកំណត់នៅឡើយទេ ។

នៅក្នុងការហៅទូរស័ព្ទនោះទៀតសោត មេបក្សកុម្មុយនីស្ត្តវៀតណាមវ័យ ៨០ ឆ្នាំរូបនេះក៏បានចូលរួមរំលែកទុក្ខយ៉ាងក្រៀមក្រំជាទីបំផុតជូនចំពោះលោក ពូទីន និងប្រជាជនរុស្ស៊ី ក៏ដូចជាក្រុមគ្រួសារនៃជនរងគ្រោះទាំងអស់ក្នុងការវាយប្រហារភេរវកម្មនៅទីក្រុងមូស្គូកាលពីរាត្រីថ្ងៃទី២២ ខែមីនាកន្លងទៅ ខណៈលោក ពូទីន ក៏បានអរគុណចំពោះការចូលរួមរំលែកទុក្ខរបស់វៀតណាម ក៏ដូចជាក្តីមេត្តាចំពោះការបាត់បង់ប្រជាជនរុស្ស៊ីដូចគ្នា ។

លោក ភូទ្រុង បានសង្កត់ធ្ងន់ទៀតថា វៀតណាមចាត់ទុកភាពជាដៃគូយុទ្ធសាស្ត្រលើគ្រប់ជ្រុងជ្រោយជាមួយរុស្ស៊ីជាអាទិភាពកំពូលនៃគោលនយោបាយកិច្ចការបរទេស ខណៈលោក ពូទីន ក៏បានសម្តែងការពេញចិត្តពេញថ្លើមចំពោះការវិវឌ្ឍន៍ជាវិជ្ជមានក្នុងទំនាក់ទំនងទ្វេភាគីលើគ្រប់វិស័យរវាងប្រទេសទាំងពីរ ដោយអះអាងថា វៀតណាមគឺជាមិត្តភក្តិ និងជាដៃគូដ៏គួរឲ្យទុកចិត្តជានិច្ចរបស់រុស្ស៊ី ។

ទន្ទឹមនោះ មេដឹកនាំទាំងពីរក៏បានពិភាក្សា និងឯកភាពគ្នាលើគំនិតផ្តួចផ្តើមសំខាន់ៗមួយចំនួន ដើម្បីជំរុញកិច្ចសហប្រតិបត្តិការទ្វេភាគីនាពេលខាងមុខ រួមទាំងវិស័យនានាដូចជា សន្តិសុខ និងការពារជាតិ សេដ្ឋកិច្ច និងពាណិជ្ជកម្ម វប្បធម៌ និងទេសចរណ៍ ខណៈវៀតណាម និងរុស្ស៊ីបានបង្កើតទំនាក់ទំនងការទូតនៅឆ្នាំ ១៩៥០ និងបានលើកកម្ពស់ទំនាក់ទំនងទៅជាដៃគូយុទ្ធសាស្ត្រគ្រប់ជ្រុងជ្រោយក្នុងឆ្នាំ ២០១២ ។

គួរបញ្ជាក់ថា កាលពីឆ្នាំ ២០២៣ កន្លងទៅ ក៏មានមន្ត្រីជាន់ខ្ពស់រុស្ស៊ី ២ រូបផងដែរបានអញ្ជើញបំពេញទស្សនកិច្ចជាផ្លូវការមកកាន់ប្រទេសវៀតណាម ក្នុងនោះរួមមាន ប្រធានគណបក្សរួបរួមរុស្ស៊ី និងជាអនុប្រធានក្រុមប្រឹក្សាសន្តិសុខរុស្ស៊ីលោក Dmitry Medvedev ហោះមកវៀតណាមកាលពីខែឧសភា និងមួយរូបទៀតគឺលោក Vyacheslav Victorovich Volodin ប្រធានសភាឌូម៉ារបស់រុស្ស៊ីចុះចតនៅវៀតណាមកាលពីខែតុលា ៕

ដោយ ៖ សុខ ជីវ័ន្ត

ចុចអាន ៖ អតីតសេដ្ឋិនី វៀតណាម ដែលរងការកាត់ទោសប្រហារជីវិត អង្វរតុលាការសុំ ដកអគារមួយខ្នងទុកឲ្យកូនស្រី