ការប្រែប្រួលអាកាសធាតុនាំឲ្យមនុស្សជាងកន្លះលាននាក់លើលោកដាច់សរសៃឈាមខួរក្បាលស្លាប់ក្នុងមួយឆ្នាំ

ការសិក្សាថ្មីមួយបានរកឃើញថា គ្រាន់តែមួយឆ្នាំ ២០១៩ មានមនុស្សជាងកន្លះលាននាក់បានស្លាប់បាត់បង់ជីវិត ដោយសារជំងឺដាច់សរសៃឈាមខួរក្បាលដែលបណ្ដាលមកពីសីតុណ្ហភាពឡើងខ្ពស់ពេក និងទាបពេក ។ នេះបើយោងតាមការចេញផ្សាយរបស់សារព័ត៌មាន CNN​ នៅថ្ងៃទី១២ ខែមេសាកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសិក្សាដែលត្រូវបានបោះពុម្ពផ្សាយនៅក្នុងទស្សនាវដ្ដី Neurology បានរកឃើញថា ចាប់តាំងពីឆ្នាំ ១៩៩០ មកចំនួននៃជំងឺដាច់សរសៃឈាមខួរក្បាលដែលបណ្តាលមកពីសីតុណ្ហភាពខ្ពស់ និងទាបកំពុងកើនឡើងនៅជុំវិញពិភពលោក ខណៈបុរសមានជំងឺដាច់សរសៃឈាមខួរក្បាលច្រើនជាងស្ត្រីទាក់ទងនឹងសីតុណ្ហភាពខ្លាំង ។

អ្នកស្រាវជ្រាវបានកត់សម្គាល់ថា ចំនួនមនុស្សដែលកើតជំងឺដាច់សរសៃឈាមខួរក្បាលបានកើនឡើង នៅពេលដែលសីតុណ្ហភាពមិនអំណោយផល រាប់ចាប់តាំងពីទាំងសីតុណ្ហភាពក្តៅ និងត្រជាក់ ហើយបញ្ហានេះកើនឡើងខ្លាំងនៅឆ្នាំ ២០១៩ ពោលច្រើនជាងឆ្នាំ ១៩៩០ ទ្វេដង ។

ទន្ទឹមនោះ នៅពេលដែលភពផែនដីកាន់តែក្តៅ បន្ទុកនៃជំងឺដាច់សរសៃឈាមខួរក្បាល ក៏កើនឡើងយ៉ាងឆាប់រហ័សផងដែរ ហើយចំនួននោះនឹងកើនឡើងយ៉ាងខ្លាំងបន្តទៀតនាពេលអនាគត ។

គួរបញ្ជាក់ថា ជំងឺដាច់សរសៃឈាមខួរក្បាលគឺជាបញ្ហាសុខភាពដ៏សំខាន់រួចទៅហើយ ដោយការសិក្សាពីមុនបានបង្ហាញថា វាគឺជាមូលហេតុចម្បងទី ៣ នៃពិការភាពនៅទូទាំងពិភពលោក និងជាមូលហេតុចម្បងមួយនៃការស្លាប់បាត់បង់ជីវិតរបស់មនុស្សលោក ៕

អត្ថបទ ៖ ប៊ុន សុភាព