ព័ត៌មានអន្ដរជាតិ

រុស្ស៊ី បាញ់មីស៊ីលបំផ្លាញរោងចក្រថាមពលធំបំផុតរបស់ទីក្រុងកៀវ

បានផុស

២ years មុន

នៅ

ថ្ងៃសុក្រ ១២ មេសា ២០២៤

ដោយ

ប្រទេសរុស្ស៊ីបានបាញ់មីស៊ីលកម្ទេចរោងចក្រផលិតថាមពលដ៏ធំបំផុតនៅក្រុងកៀវ ខណៈដែលលោកប្រធានាធិបតី Volodymyr Zelensky បានចោទប្រកាន់លោកខាងលិចថា កំពុងបិទភ្នែកបិទច្រមុះចំពោះតម្រូវការប្រព័ន្ធខែលការពារដែនអាកាសបន្ថែមទៀតរបស់អ៊ុយក្រែន ។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី១២ ខែមេសានេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រុស្សីបានបាញ់មីស៊ីល និងយន្តហោះគ្មានមនុស្សបើកសរុបចំនួន ៨២ គ្រឿង រួមទាំងមីស៊ីល Kinzhal ផងនោះ ប៉ុន្តែក្នុងចំណោមនោះ អ៊ុយក្រែនក៏បាញ់ទម្លាក់មីស៊ីលដែលហោះចូលមកចំនួន ១៨ គ្រាប់ និងយន្តហោះគ្មានមនុស្សបើកចំនួន ៣៩ គ្រឿងផងដែរ ។

ទោះបីជាយ៉ាងណាមិនមានអ្នកស្លាប់ និងរបួសទេ ហើយការវាយប្រហារនេះក៏មិនបានបណ្តាលឲ្យមានការដាច់ចរន្តអគ្គិសនីនៅក្នុងតំបន់រដ្ឋធានីកៀវរបស់អ៊ុយក្រែន ឬតំបន់ផ្សេងទៀតដែលផ្គត់ផ្គង់ដោយក្រុមហ៊ុន Trypilska TPP នោះដែរ ។

ស្របពេលនឹងការកើនឡើងនៃការវាយប្រហារតាមអាកាសរបស់រុស្ស៊ីនេះដែរ លោក Zelensky បានចោទប្រទេសជិតខាងអឺរ៉ុបទាំងអស់ និងដៃគូផ្សេងទៀតថា បានបិទភ្នែលធ្វើជាមើលមិនឃើញពីតម្រូវការនៃប្រព័ន្ធការពារដែនអាកាសដ៏សំខាន់របស់អ៊ុយក្រែន ទើបបានជាអនុញ្ញាតឲ្យរុស្ស៊ីបន្តធ្វើការវាយលុកលើហេដ្ឋារចនាសម្ព័ន្ធថាមពលរបស់អ៊ុយក្រែនយ៉ាងដូច្នេះ ។

គួរបញ្ជាក់ថា ក្នុងភ្លើងសង្គ្រាមរយៈពេលជាង ២ ឆ្នាំមកនេះ រុស្ស៊ីបានដាក់គោលដៅវាយប្រហារប្រព័ន្ធហេដ្ឋារចនាសម្ព័ន្ធថាមពលរបស់អ៊ុយក្រែនក្នុងការប៉ុនប៉ងបំបែកបណ្តាញថាមពលរបស់ប្រទេសនេះ និងបង្កការលំបាកដល់ប្រជាជនអ៊ុយក្រែនមិនឲ្យមានអគ្គិសនី កម្ដៅ ទឹក និងរបស់របរប្រើប្រាស់ផ្សេងទៀតជាដើម ៕