ព័ត៌មានអន្ដរជាតិ

បារាំង៖ អ៊ុយក្រែនហាមាត់តែមួយម៉ាត់ ខ្លួននឹងបញ្ជូនទ័ពឲ្យភ្លាម

បានផុស

២ years មុន

នៅ

ថ្ងៃសៅរ៍ ៤ ឧសភា ២០២៤

ដោយ

Chheang

លោក Emmanuel Macron បាននិយាយថា លោកនឹងមិនបដិសេធក្នុងការបញ្ជូនកងទ័ពភ្លាមៗឲ្យទៅអ៊ុយក្រែននោះទេ ក្នុងករណីដែលរុស្ស៊ីបានវាយបំបែកទ័ពជួរមុខរបស់អ៊ុយក្រែន។ លោកប្រធានាធិបតីបារាំង បានថ្លែងដូច្នេះនៅក្នុងកិច្ចសម្ភាសន៍មួយជាមួយសារព័ត៌មាន The Economist ដែលបានចុះផ្សាយកាលពីថ្ងៃទី២ ខែឧសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាថ្មីម្ដងទៀត លោក Macron នៅតែរក្សាជំហរគាំទ្ររដ្ឋាភិបាលអ៊ុយក្រែន នៅក្នុងជម្លោះសង្គ្រាមតតាំងជាមួយរុស្ស៊ី។ លោកថា ប្រទេសអឺរ៉ុបត្រូវចេះការពារខ្លួនឯង ខណៈដែលរុស្ស៊ីបានប្រើកងកម្លាំង បង្កជាអស្ថិរភាពក្នុងតំបន់ គួបផ្សំជាមួយការគំរាមកំហែងប្រើប្រាស់អាវុធនុយក្លេអ៊ែរថែមទៀត។ លោក Macron បានបន្តថា “ខ្ញុំមានគោលដៅយុទ្ធសាស្ត្រច្បាស់លាស់ណាស់ គឺ រុស្ស៊ីមិនអាចយកឈ្នះអ៊ុយក្រែនទេ។ ប្រសិនបើរុស្ស៊ីឈ្នះអ៊ុយក្រែន វានឹងគ្មានទៀតទេនូវសន្តិសុខក្នុងអឺរ៉ុប។ នរណាគេហ៊ានធ្វើពុតថា រុស្ស៊ីនឹងបញ្ឈប់ត្រឹមហ្នឹង? តើសន្តិសុខនឹងមានទេសម្រាប់ប្រទេសជិតខាងដូចជា ម៉ុលដាវី រូម៉ានី ប៉ូឡូញ លីទុយអានី និងប្រទេសផ្សេងទៀត”។

សូមរំឭកថា កាលពីខែកុម្ភៈកន្លងទៅ ក្នុងជំនួបជាមួយមេដឹកនាំអឺរ៉ុបមកពីប្រទេសចំនួន២០ បារាំងធ្លាប់ប្រកាសសន្យាបញ្ជូនអាវុធ និងទាហានឲ្យទៅអ៊ុយក្រែនបន្ថែមទៀត បូករួមទាំងជំនួយយោធាតម្លៃប្រមាណ ៣,២១ពាន់លានដុល្លារ។ ដោយឡែក អាល្លឺម៉ង់ ដែលចូលរួមក្នុងជំនួបនេះដែរ បានបដិសេធសម្រេចមិនបញ្ជូនទ័ពទៅអ៊ុយក្រែនដាច់ខាត ដោយហេតុបារម្ភថា ទង្វើនេះអាចទាញឲ្យសមាជិក NATO ធ្លាក់ចូលក្នុងជម្លោះដោយផ្ទាល់ជាមួយរុស្ស៊ី។

រុស្ស៊ី ធ្លាប់បានព្រមានថា ជម្លោះជាមួយ NATO អាចនឹងជារឿងជៀសមិនផុតទេ បើសមាជិកអឺរ៉ុបនៅតែបញ្ជូនកងទ័ពឲ្យទៅជួយអ៊ុយក្រែន៕

ដោយ៖ ឈាង