ក្រុមហ៊ុន Stellantis ប្រកាសប្រមូលរថយន្តជាង២ម៉ឺនគ្រឿងមកវិញ ជុំវិញបញ្ហាគ្រប់គ្រងលំនឹង

ក្រុមហ៊ុនផលិតរថយន្ត Stellantis របស់អាមេរិកនឹងប្រមូលរថយន្តប្រភេទ SUV និងភីកអាប់ចំនួន ២១១ ៥៨១គ្រឿង ដោយសារបញ្ហាដែលប៉ះពាល់ដល់ប្រព័ន្ធគ្រប់គ្រងលំនឹងស្វ័យប្រវត្តិ(ESC )របស់រថយន្ត ។ នេះបើយោងតាមការចេញផ្សាយរបស់សារពត៌មាន CNN នៅថ្ងៃទី ១០ ខែមិថុនា​នេះ។

ក្រុមហ៊ុនបានប្រកាសថា បញ្ហានេះកើតចេញពីប្រព័ន្ធហ្រ្វាំងដែលមានបញ្ហាធ្វើឲ្យប្រព័ន្ធគ្រប់គ្រងលំនឹងមិនដំណើរការ។ ESC ត្រូវបានរចនាឡើងដើម្បីជួយទប់ឱ្យរថយន្តមានស្ថិរភាពដោយស្វ័យប្រវត្តិ ហើយវារក្សារសុវត្ថិភាពដ៏សំខាន់នៅក្នុងរថយន្ត ក្នុងការការពារការបាត់បង់ការគ្រប់គ្រងចង្កូតរថយន្តក្នុងស្ថានភាពអាសន្ន នៅពេលដែលអ្នកបើកបរបាត់បង់ការគ្រប់គ្រងដូចជានៅលើផ្លូវដែលមានព្រឹល ឬទឹកជំនន់ជាដើម។

យោងតាមរដ្ឋបាលសុវត្ថិភាពចរាចរណ៍ផ្លូវជាតិអាមេរិក (NHTSA), ការប្រើប្រាស់យានយន្តដែលមានបញ្ហាប្រព័ន្ធរក្សាលំនឹងនេះ អាចបង្កើនលទ្ធភាពនៃគ្រោះថ្នាក់ចរាចរណ៍ ខណៈការសិក្សាជាច្រើនរកឃើញថា ប្រព័ន្ធគ្រប់គ្រងលំនឹងស្វ័យប្រវត្តិនេះមានទំនោរកាត់បន្ថយការប៉ះទង្គិចគ្នាយ៉ាងធ្ងន់ធ្ងរជាពិសេសការក្រឡាប់រថយន្ត។

ម៉ូដែល​ដែល​ត្រូវ​បាន​គេ​ហៅ​មក​វិញ​គឺ Dodge Durango ឆ្នាំ ២០២២និងម៉ូដែល Ram 2500 និង 3500 ឆ្នាំ២០២២ ខណៈម៉ូដែលRam 2500 គឺ​ជា​រថយន្ត​ដែល​រង​ផល​ប៉ះពាល់​ខ្លាំង​បំផុត ដែលមាន​រថយន្តភីកអាប់ជិត ១៥៨,០០០គ្រឿង​ត្រូវ​បានប្រមូលមក​វិញ និងរថយន្ត Durangos ជាង ៥៣,០០០គ្រឿង ខណៈម៉ូដែល 524 Ram 3500s មានជំនួនតិចតួចប៉ុណ្ណោះនឹងត្រូវប្រមូលមកវិញ។

គួរបញ្ជាក់ថាក្រុមហ៊ុន Stellantis នឹងចាប់ផ្តើមជូនដំណឹងដល់ម្ចាស់យានយន្តដែលរងផលប៉ះពាល់នៅចុងខែកក្កដាខាងមុខ ហើយម្ខាស់រថយន្តនឹងអាចនាំយករថយន្តរបស់ពួកគេទៅកាន់ភ្នាក់ងារចែកចាយ ដើម្បីធ្វើការជួសជុលដោយឥតគិតថ្លៃ៕

អត្ថបទ៖ ​ប៊ុន សុភាព