លោកស្រី ស៊ូជី ត្រូវកងទ័ពនាំទៅឆ្ងាយ ពេលនេះកំពុងបាត់ខ្លួន

មេដឹកនាំដែលត្រូវបណ្តេញចេញពីតំណែងរបស់ប្រទេសមីយ៉ាន់ម៉ា លោកស្រី អ៊ុងសាន ស៊ូជី ត្រូវបានគេនិយាយថា កំពុងបាត់ខ្លួនបន្ទាប់ពីកងទ័ព ផ្ទេរលោកស្រីពីការឃុំខ្លួនក្នុងផ្ទះទៅកាន់ទីតាំងដែលគេមិនបង្ហាញមួយ ខណៈការតវ៉ាហិង្សានៅតែបន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយដកស្រង់សម្តីមន្រ្តីនៅក្នុងគណបក្សរបស់លោកស្រី គេហទំព័រ Myanmar Now បានរាយការណ៍នៅព្រឹកថ្ងៃសៅរ៍នេះថា លោកស្រីស៊ូជីអាយុ៧៥ឆ្នាំ ត្រូវបានឃុំខ្លួននៅក្នុងផ្ទះ ក្នុងរដ្ឋធានី ណៃពិដោ ចាប់តាំងពីរដ្ឋប្រហារថ្ងៃទី១ខែកុម្ភៈ ប៉ុន្តែចាប់តាំងពីពេលនោះមកត្រូវបានផ្ទេរទៅកាន់កន្លែងផ្សេង។

ប្រភពពីគណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) បានឲ្យដឹងថា លោកស្រីត្រូវបានគេនាំទៅឆ្ងាយកាលពី៦ថ្ងៃមុន។

គេហទំព័រ Myanmar Now បានដកស្រង់សម្តីមន្ត្រីជាន់ខ្ពស់គណបក្ស NLD ម្នាក់ដែលនិយាយក្នុងលក្ខខណ្ឌមិនបញ្ចេញឈ្មោះថា “យើងលែងដឹងថា លោកស្រីត្រូវបានគេទុកនៅកន្លែងណាទៀតហើយ”។

លោក Khin Maung Zaw មេធាវីរបស់លោកស្រី ស៊ូជី ធ្លាប់បានត្អូញត្អែរថា លោកមិនត្រូវបានគេអនុញ្ញាតឲ្យជួបលោកស្រី មុនការបង្ហាញខ្លួននៅតុលាការថ្ងៃទី១ខែមីនាឡើយ។

លោកនិយាយថា “ខ្ញុំត្រូវការការណែនាំពីលោកស្រីអំពីរបៀបចាត់ចែងការការពារក្តីរបស់យើងនៅឯតុលាការ។ ខ្ញុំព្រួយបារម្ភថា នឹងបាត់បង់សិទ្ធិក្នុងការទទួលបានភាពយុត្តិធម៌និងការទទួលបានការប្រឹក្សាផ្នែកច្បាប់”។

ទោះបីជាយ៉ាងណាក៏ដោយ អាជ្ញាធរមិនបានឆ្លើយតបភ្លាមៗ ចំពោះសំណើសុំការអត្ថាធិប្បាយទេ៕

ប្រែសម្រួលដោយ៖ Vann Vann

ប្រភព៖ Daily Mail

ចុចអាន៖ ប្រេសិត UN ប្រចាំមីយ៉ាន់ម៉ាទទូចឲ្យប្រើមធ្យោបាយចាំបាច់ណាមួយប្រឆាំងនឹងយោធា

ចុចអាន៖ មីយ៉ាន់ម៉ា ឃុំខ្លួនអ្នកកាសែតបរទេសដំបូងបំផុតចាប់តាំងពីរដ្ឋប្រហារ