ព័ត៌មានអន្ដរជាតិ

លោក មីន អ៊ុងឡាំង បន្ធូរបន្ថយទោស លោក ស្រី អ៊ុងសាន ស៊ូជី មកត្រឹម ២៧ឆ្នាំ

បានផុស

៣ ខែ មុន

នៅ

ថ្ងៃសុក្រ ១៧ មេសា ២០២៦

ដោយ

ក្រោយពី លោក មីន អ៊ុងឡាំង (Min Aung Hlaing) ឡើងកាន់ដំណែងជាប្រធានាធិបតីថ្មីរបស់ប្រទេសមីយ៉ាន់ម៉ា មេដឹកនាំរូបនេះបានដោះលែងអ្នកទោសរាប់ពាន់នាក់ រួមទាំងបន្ធូរបន្ថយទោសដល់អ្នកទោសនយោបាយរាប់ពាន់នាក់ផងដែរ។

មេធាវីរបស់ លោកស្រី អ៊ុងសាន ស៊ូជី (Aung San Suu Kyi) ប្រាប់ភ្នាក់ងារសារព័ត៌មានរ៉យទ័រនៅថ្ងៃទី១៧ ខែមេសា ថា ប្រទេសមីយ៉ាន់ម៉ាបានកាត់បន្ថយទោស ចំពោះអតីតមេដឹកនាំមីយ៉ាន់ម៉ាដែលជាប់ពន្ធនាគារពី៣៣ឆ្នាំ មក២៧ឆ្នាំ សម្រាលទោសចំនួន១ភាគ៦នៃការឃុំខ្លួនសរុប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី អ៊ុងសាន ស៊ូជី មានអាយុ៨០ឆ្នាំ កំពុងជាប់ពន្ធនាគាររយៈពេល២៧ឆ្នាំ ពីបទល្មើសជាច្រើនដែលសម្ព័ន្ធមិត្តរបស់លោកស្រីលើកឡើងថាមានការលើកទឹកចិត្តខាងនយោបាយដើម្បីដាក់ទោសលោកស្រីឱ្យនៅដាច់ដោយឡែក មានទាំងការញុះញង់ និងអំពើពុករលួយ រហូតដល់ការក្លែងបន្លំការបោះឆ្នោត និងការរំលោភច្បាប់សម្ងាត់របស់រដ្ឋ។

មេធាវីរូបនោះនិយាយថា៖ « ការកាត់ទោសនេះត្រូវបានកាត់បន្ថយមួយភាគ៦ ប៉ុន្តែវានៅតែមិនច្បាស់ ថាតើអ្នកឈ្នះរង្វាន់ណូបែលសន្តិភាពរូបនេះនឹងត្រូវបានអនុញ្ញាតឱ្យជាប់ពន្ធនាគារនៅសល់ ក្រោមការឃុំខ្លួនក្នុងផ្ទះឬអត់ទេ»។

ទូរទស្សន៍រដ្ឋមីយ៉ាន់ម៉ារាយការណ៍នៅថ្ងៃទី១៧ ខែមេសា ថាប្រធានាធិបតីថ្មីរបស់ប្រទេសមីយ៉ាន់ម៉ា លោក មីន អ៊ុងឡាំង បានអនុម័តការលើកលែងទោសដល់អ្នកទោសចំនួន ៤ ៣៣៥នាក់ ដែលជាចលនាលើកទីបីក្នុងរយៈពេល៦ខែកន្លងមកនេះ។

ការលើកលែងទោសក្នុងប្រទេសមីយ៉ាន់ម៉ាជាធម្មតាធ្វើឡើងជារៀងរាល់ឆ្នាំ ដើម្បីអបអរសាទរទិវាឯករាជ្យនៅខែមករានិងឆ្នាំថ្មីនៅខែមេសា។

យ៉ាងណាអ្នកនាំពាក្យរបស់រដ្ឋាភិបាលមិនបានឆ្លើយតបភ្លាមៗ ចំពោះសំណើសុំការអត្ថាធិប្បាយលើបញ្ហានេះនៅឡើយទេ។

គួរបញ្ជាក់ថា លោក មីន អ៊ុងឡាំង បានធ្វើរដ្ឋប្រហារយោធាប្រឆាំងនឹងរដ្ឋាភិបាលដែលជាប់ឆ្នោតតាមបែបប្រជាធិបតេយ្យ ដឹកនាំដោយ លោកស្រី ស៊ូជី ក្នុងឆ្នាំ២០២១ ធ្វើឱ្យប្រទេសមីយ៉ាន់ម៉ាធ្លាក់ចូលក្នុងភាពចលាចល៕

ប្រែសម្រួល៖ ណឺ មិនា