អ៊ីរ៉ង់និងចលនាសកម្មប្រយុទ្ធទាំងអស់ ប្រកាសជួយក្រុមហេសបូឡា ពេញទំហឹង បើធ្វើសង្គ្រាមជាមួយ អ៊ីស្រាអែល

ប្រទេសអ៊ីរ៉ង់ ព្រមទាំងសមាជិកនៃចលនាសកម្មប្រយុទ្ធទាំងអស់ នឹងជួយក្រុម ហេសបូឡា របស់លីបង់ ពេញទំហឹង ប្រសិនបើផ្ទុះសង្គ្រាមជាមួយអ៊ីស្រាអែលមែន។ នេះបើតាមការប្រកាសរបស់លោក Kamal Kharrazi ទីប្រឹក្សាមេដឹកនាំកំពូលអ៊ីរ៉ង់ នៅថ្ងៃអង្គារទី២ខែកក្កដាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Kharrazi បាននិយាយក្នុងបទសម្ភាសមួយជាមួយកាសែត Financial Times ថា “ប្រជាជនលីបង់ទាំងអស់ រួមទាំងរដ្ឋអារ៉ាប់ និងរាល់សមាជិកនៃចលនាតស៊ូ គឺនឹងគាំទ្រប្រទេសលីបង់ប្រឆាំងអ៊ីស្រាអែល។ ប្រសិនបើអ៊ីស្រាអែលបើកការវាយលុកពេញលក្ខណៈប្រឆាំងក្រុមហេសបូឡាមែន វាអាចបង្កជាសង្គ្រាមក្នុងតំបន់។ យ៉ាងណា ទីក្រុងតេហេរ៉ង់ មិនចាប់អារម្មណ៍នឹងជម្លោះក្នុងតំបន់ឡើយ ថែមជំរុញឲ្យសហរដ្ឋអាមេរិក ដាក់សម្ពាធលើអ៊ីស្រាអែល ដើម្បីទប់ស្កាត់ការកើនឡើងភាពតានតឹងបន្ថែមទៀតផង”។

ការប្រកាសរបស់លោកកើតឡើងមួយថ្ងៃប៉ុណ្ណោះ បន្ទាប់ពីប្រទេសអ៊ីរ៉ង់ ព្រមានបែបខ្លាំងៗថា អ៊ីស្រាអែល​នឹងត្រូវ​ប្រឈម​មុខជាមួយ​សង្រ្គាមដ៏​មហន្តរាយបំផុតនិងរំលាយប្រទេសចោលតែម្តង ប្រសិនបើ​កម្លាំង​របស់​ខ្លួន​ចូល​ឈ្លានពាន​លីបង់មែន។

វាកើតឡើងស្របពេលនាយករដ្ឋមន្ត្រីអ៊ីស្រាអែលលោក Benjamin Netanyahu ប្រកាសថា ទីក្រុងហ្ស៊េរុយសាឡិម ត្រៀមខ្លួនរួចជាស្រេចសម្រាប់ប្រតិបត្តិការដ៏ខ្លាំងក្លា នៅតាមបណ្តោយព្រំដែនជាមួយប្រទេសលីបង់។

ជាការឆ្លើយតប បេសកកម្មអ៊ីរ៉ង់ប្រចាំអង្គការសហប្រជាជាតិ បានចាត់ទុកសម្តីរបស់លោក Netanyahu ថាជាសង្គ្រាមផ្លូវចិត្តនិងការឃោសនា ប៉ុន្តែបានព្រមានថា “សង្រ្គាមនឹងកើតឡើងមិនខានឡើយ ប្រសិនបើអ៊ីស្រាអែល បើកការវាយប្រហារពេញទំហឹងលើទឹកដីលីបង់ មែន”។

បើយោងតាមតួលេខរបស់ AFP, ជាង៨ខែ នៃការបាញ់គ្នាឆ្លងដែនរវាងភាគីទាំងពីរ បានបណ្តាលឲ្យមនុស្សយ៉ាងតិច ៤៨១នាក់បាត់បង់ជីវិតនៅក្នុងប្រទេសលីបង់ ដែលភាគច្រើនគឺជាយុទ្ធជន ប៉ុន្តែក៏មានជនស៊ីវិលចំនួន៩៤នាក់ផងដែរ។

សូមបញ្ជាក់ជាថ្មី អ៊ីស្រាអែលនិងក្រុមហេសបូឡា បានប្រយុទ្ធគ្នារាល់ថ្ងៃ ចាប់តាំងពីការវាយប្រហាររបស់ក្រុមហាម៉ាស កាលពីថ្ងៃទី៧ខែតុលាឆ្នាំ២០២៣ ទៅលើភាគខាងត្បូងប្រទេសអ៊ីស្រាអែល ដែលជាហេតុបង្កឲ្យមានសង្រ្គាមនៅតំបន់ហ្គាហ្សាស្ទ្រីប៕

អត្ថបទ៖ សុខ សុវណ្ណ

ចុចអាន៖ អ៊ីរ៉ង់ គំរាមធ្វើសង្គ្រាមរំលាយប្រទេសចោល ជាមួយ អ៊ីស្រាអែល