បញ្ហា​អន្តោប្រវេសន៍​បណ្តាល​ឱ្យ​ប្រជាជន​​អង់គ្លេស និងវែលស៍កើនឡើងខ្ពស់បំផុតមិនធ្លាប់មានក្នុងរយៈពេល៧៥ឆ្នាំ

យោងតាមទិន្នន័យផ្លូវការបានឲ្យដឹងថាចំនួនប្រជាជនប្រទេសអង់គ្លេស និងប្រទេសវែលស៍បានកើនឡើងពី ៦១០,០០០ ដល់​ចំនួន​​៦០,៩​លាននាក់នៅពាក់កណ្តាលឆ្នាំ ២០២៣ ដែលជាការកើនឡើងប្រចាំឆ្នាំដ៏ខ្ពស់បំផុត​មិន​ធ្លាប់​មាន​ក្នុងរយៈពេល៧៥ឆ្នាំ។ នេះបើយោងតាមការចេញផ្សាយរបស់សារពត៌មាន Al Jazeera នៅថ្ងៃទី ១៦ ខែកក្កដានេះ។

បើទោះបីជាអត្រាកំណើតធម្មជាតិបានធ្លាក់ចុះមកត្រឹម៤០០នាក់ ដែលជាកម្រិតទាបបំផុតចាប់តាំងពីឆ្នាំ១៩៧៨ ប៉ុន្តែជនចំណាកស្រុក​អន្តរជាតិបានកើនឡើងពី ៥៤៨,៥០០ ដល់ ៦២២,០០០ក្នុងរយៈពេលត្រឹមតែ១២ខែប៉ុណ្ណោះ។

ការិយាល័យស្ថិតិជាតិរបស់ចក្រភពអង់គ្លេសបានឲ្យដឹងថា ការកើនឡើងចំនួនប្រជាជននៅក្នុងប្រទេសអង់គ្លេស និងវេលស៍ គឺជាចំនួនដ៏ច្រើនបំផុតចាប់តាំងពីឆ្នាំ​១៩៤៨ ។ ខណៈចំនួនប្រជាជននៅចក្រភពអង់គ្លេសទាំងមូលគឺ ៦៧,៦ លាននាក់នៅពាក់កណ្តាលឆ្នាំ២០២២ ប៉ុន្តែ​​ទិន្នន័យសម្រាប់ឆ្នាំ២០២៣ មិនទាន់ចេញ​ផ្សាយ​នៅឡើយ។

ការធ្វើចំណាកស្រុកទៅកាន់ចក្រភពអង់គ្លេសបានឈានដល់កំណត់ត្រា ៧៦៤,០០០ ក្នុងឆ្នាំ ២០២២ តែបានធ្លាក់ចុះ ១០ ភាគរយមកនៅត្រឹម ៦៨៥,០០០ ក្នុងឆ្នាំ២០២៣ ។ ក្នុងនោះក៏មានមនុស្ស ១៣,៨០០ នាក់ក៏បានផ្លាស់ពីប្រទេសអង់គ្លេស និងវេលស៍ទៅកាន់ស្កុតឡែន ឬអៀរឡង់ខាងជើងផងដែរ។

គួរបញ្ជាក់ថា ការកាត់បន្ថយអន្តោប្រវេសន៍គឺជាគោលដៅសំខាន់របស់ជនជាតិអង់គ្លេសជាច្រើនដែលបានបោះឆ្នោតចាកចេញ​ពីសហភាពអឺរ៉ុបដែលហៅថាBrexit​ កាល​ឆ្នាំ​២០១៦​ និង​ចូលជាធរមាន​នៅឆ្នាំ​២០២០​ ស្របពេល​ដែលរដ្ឋាភិបាល​អភិរក្សមុនរបស់ចក្រភពអង់គ្លេសក៏ចង់កាត់បន្ថយការធ្វើអន្តោប្រវេសន៍ដែរ ហើយគណបក្សរបស់នាយករដ្ឋមន្ត្រី Keir Starmer ក៏ធ្លាប់បានសន្យាក្នុងយុទ្ធនាការបោះឆ្នោតដើម្បីធ្វើឱ្យសេដ្ឋកិច្ចមិនសូវពឹងផ្អែកលើពលករបរទេសផងដែរ។

យ៉ាងណាមិញ ទោះជាការផ្លាស់ប្តូរចុងក្រោយរបស់ Brexit ចំពោះទិដ្ឋាការបានកាត់បន្ថយនូវចំនួនជនចំណាកស្រុកសហភាពអឺរ៉ុបទៅកាន់ចក្រភពអង់គ្លេស ប៉ុន្តែច្បាប់ទិដ្ឋាការការងារថ្មីបាននាំឱ្យមានការកើនឡើងអន្តោប្រវេសន៍ពីប្រទេសឥណ្ឌា នីហ្សេរីយ៉ា និងប៉ាគីស្ថានទៅវិញ៕

អត្ថបទ​៖ ប៊ុន សុភាព