Netanyahu​ ទស្សនកិច្ចនៅ​វ៉ាស៊ីនតោន ខណៈ​មនុស្ស​រាប់​ពាន់​នាក់​ចេញ​តវ៉ា​​​ទាមទារបញ្ចប់សង្គ្រាម​

ក្រុមបាតុកររាប់ពាន់នាក់ប្រឆាំងនឹងសង្រ្គាមតំបន់ហ្គាហ្សាបានប្រមូលផ្តុំគ្នានៅទីក្រុងវ៉ាស៊ីនតោនកាលពីថ្ងៃពុធដើម្បី​ប្រឆាំង​ដំណើរទស្សនកិច្ចរបស់លោក Benjamin Netanyahu នាយករដ្ឋមន្រ្តីអ៊ីស្រាអែល ដោយស្រែកថា៖«ដោះលែងប៉ាឡេស្ទីនឲ្យមានសេរីភាព (Free, free Palestine)» នៅពេលពួកគេដើរឆ្ពោះទៅកាន់វិមានរដ្ឋសភាអាមេរិក ខណៈប៉ូលិសបានបាញ់ឧស្ម័នបង្ហូរទឹកភ្នែកលើក្រុម​អ្នកតវ៉ា​​ដើម្បី​បំបែក​។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២៥ខែកក្កដានេះ។

ក្រុមបាតុករ ដែលអំពាវនាវឱ្យបញ្ចប់សង្គ្រាមដែលបានសម្លាប់ជនជាតិប៉ាឡេស្ទីន​​រាប់​ម៉ឺន​នាក់​ បានចេញតវ៉ាតាមដងផ្លូវ​នៅ​រដ្ឋធានីអាមេរិកដោយកាន់ទង់ជាតិប៉ាឡេស្ទីន និងបដាដែលមានសរសេរថា «ចាប់ខ្លួន Netanyahu (arrest Netanyahu)» និង «បញ្ចប់ជំនួយរបស់សហរដ្ឋអាមេរិកទាំងអស់ដល់អ៊ីស្រាអែល»។ ហ្វូងបាតុករបានប្រមូលផ្តុំគ្នានៅជិតសភាអាមេរិក មុនពេលចាប់ផ្តើមការហែក្បួនមុនសុន្ទរកថារួមរបស់លោក Netanyahu ទៅកាន់សភា ប៉ុន្តែប៉ូលិសបានរារាំងពួកគេមិនឱ្យចូលទៅជិតអគារនោះ ដោយបាញ់ឧស្ម័នបង្ហូរទឹកភ្នែក បន្ទាប់ពីអ្នកតវ៉ាខ្លះបានប្រើហិង្សានិងមិនគោរព​បទ​​បញ្ជាឱ្យរើចេញ។

មុនពេលធ្វើដំណើរ​ទៅ​ថ្លែង​​សារ​នៅ​​វិមានរដ្ឋសភា​របស់លោក Netanyahu អ្នកតវ៉ាមួយចំនួនបានព្យាយាមបិទផ្លូឆ្ពោះ​ទៅកាន់វិមានរដ្ឋសភា ប៉ុន្តែត្រូវ​ប៉ូលិសដកចេញវិញ​។ ​ក្នុងហេតុការណ៍​នេះ មនុស្ស៩នាក់ត្រូវបានចាប់ខ្លួននៅទូទាំងទីក្រុងវ៉ាស៊ីនតោន រួមទាំងមនុស្ស៤នាក់​ដែល​រង​ការ​ចោទប្រកាន់ពីបទបំពានលើមន្ត្រីប៉ូលិសម្នាក់នៅខាងក្រៅស្ថានីយ៍ Union ។

គួរបញ្ជាក់ថា ក្រុម​គ្រួសារ​ចំណាប់ខ្មាំង​ដែល​ក្រុម​ហាម៉ាស​ចាប់​ខ្លួន​ក៏​កំពុង​តវ៉ា​ដែរដោយ​ទាមទារ​ឲ្យ​លោក Netanyahu យល់ព្រម​លើ​កិច្ច​ព្រមព្រៀង​ឈប់​បាញ់​ និងដោះលែង​មនុស្ស​ជា​ទី​ស្រឡាញ់ដែលជាចំណាប់ខ្មាំងដែលនៅតែត្រូវបានក្រុមសកម្មប្រយុទ្ធឃុំខ្លួន ឲ្យ​ត្រឡប់​មកផ្ទះវិញ។

លោក Biden និងលោក Netanyahu ត្រូវបានគេរំពឹងថានឹងជួបប្រជុំគ្នានៅថ្ងៃព្រហស្បតិ៍។​ ចំណែកអនុប្រធានាធិបតី Kamala Harris ក៏នឹងជួបលោក Netanyahu ដាច់ដោយឡែកនៅថ្ងៃនោះដែរ៕

អត្ថបទ៖ ប៊ុន សុភាព