អាកាសចរណ៍​អឺរ៉ុបជាច្រើន​ផ្អាក​ការ​ហោះហើរ​រវាង​​លីបង់ ដោយ​បារម្ភ​ការសងសឹក​ពីអ៊ីស្រាអែល​

​ក្រុមហ៊ុន​​អាកាសចរណ៍​​អន្តរជាតិ​ជាច្រើន​បាន​លុប​ចោល​ជើង​ហោះហើរ​​រវាង​ទីក្រុង Beirut របស់​ប្រទេស​លីបង់​ ដោយសារ​ការកើន​ឡើង​ភាព​តានតឹង​រវាង​អ៊ីស្រាអែល​​និង​លីបង់ ក្រោយ​ការ​បាញ់រុក្កែតរបស់​ក្រុមហេសបូឡា​​ចូល​ទឹកដី​អ៊ីស្រាអែល​​​​​បណ្តាល​ឱ្យ​កុមារ​និង​​យុវជន​១២​នាក់​ស្លាប់​កាល​ពីចុង​សប្តាហ៍​​។

ទីភ្នាក់ងារ​ព័ត៌មាន​រ៉យទ័រ​រាយការណ៍​ថា ក្រុមហ៊ុនអាកាសចរណ៍ Aegean របស់ប្រទេសក្រិក និងក្រុមហ៊ុន Condor របស់អាល្លឺម៉ង់ បានលុបចោលជើងហោះហើរទៅកាន់ទីក្រុង Beirut កាលពីថ្ងៃអង្គារ ដែលជាក្រុមហ៊ុនអាកាសចរណ៍ចុងក្រោយ​ដែល​បាន​ផ្អាកសេវាកម្ម​ហោះហើរ​ទៅកាន់រដ្ឋធានី​របស់​ប្រទេស​លីបង់ក្នុងប៉ុន្មានថ្ងៃថ្មីៗនេះ។

ក្រុមហ៊ុន Aegean បាន​លើក​ឡើង​ក្នុងសេចក្តី​ថ្លែង​ការណ៍​ថា​ ខ្លួននឹងផ្អាកជើងហោះហើររហូតដល់ថ្ងៃព្រហស្បតិ៍ ខណៈដែលក្រុមហ៊ុន​អាកាសចរណ៍​ Condor បានលុបចោលជើងហោះហើរ​នៅ​ថ្ងៃអង្គារពីទីក្រុង Dusseldorf។

ក្រុមហ៊ុនអាកាសចរណ៍​ពី​តំបន់អឺរ៉ុប​សំខាន់​ៗ ដូច​ជា Air France របស់​បារាំង និង Lufthansa Group Swiss របស់​ប្រទេស​អាល្លឺម៉ង់​ និង ស្វីស​ និង​ក្រុមហ៊ុន​​ Eurowings និង Lufthansa របស់​អាល្លឺម៉ង​បានប្រកាសលុបចោលជើងហោះហើរ​រួច​អស់​ហើយ​កាល​ពីថ្ងៃចន្ទ​។

ប្រទេសលីបង់បានត្រៀមខ្លួនសម្រាប់ការសងសឹកពីអ៊ីស្រាអែលចាប់តាំងពីការវាយប្រហារកាលពីថ្ងៃសៅរ៍នៅតំបន់ Golan Heights ដែលអ៊ីស្រាអែលកាន់កាប់ដោយអ៊ីស្រាអែលបានសម្លាប់កុមារនិងក្មេងជំទង់១២​នាក់ ប៉ុន្តែ​ក្រុមហេសបូឡា​​បានបដិសេធការចោទ​ប្រកាន់​។

យ៉ាងណាក៏ដោយ ​ភាព​តានតឹង​កាន់តែឡើង​កម្តៅ​ដោយសារ​អ៊ីរ៉ង់​ប្រកាសគាំទ្រ​ក្រុមហេសបូឡា​​​និង​​ក្រុមសកម្មប្រយុទ្ធ​ជា​ច្រើន​ទៀត៕​

ដោយ រ៉ាន់ រើយ