​ក្រុម​ Al-Shabab បំផ្ទុះ​គ្រាប់​បែក​អត្តឃាត​បង្ក​ស្លាប់​​និង​របួស​ជិត​១០០​នាក់​​​នៅ​សូម៉ាលី

មនុស្ស​យ៉ាង​ហោច​ណាស់​៣២នាក់​បាន​​ស្លាប់​នៅក្នុងហេតុការណ៍​បំផ្ទុះគ្រាប់បែកអត្តឃាតដោយក្រុមសកម្មប្រយុទ្ធអ៊ីស្លាម Al-Shabab នៅឆ្នេរសមុទ្រ​ក្នុងរដ្ឋធានី Mogadishu ប្រទេសសូម៉ាលី។ នេះបើយោងតាមការចេញផ្សាយរបស់ទូរទស្សន៍​ Al Jazeera ​កាល​ពីថ្ងៃទី៤ខែសីហា។

ប្រព័ន្ធផ្សព្វផ្សាយក្នុងប្រទេស​ជប៉ុន​ ក៏​បាន​ផ្សាយ​ឲ្យដឹងថា ក្រុមប្រដាប់អាវុធចំនួនប្រាំមួយនាក់បានវាយប្រហារ និងទម្លាក់គ្រាប់បែកលើភោជនីយដ្ឋានមាត់សមុទ្រដ៏មមាញឹកមួយកាលពីថ្ងៃសុក្រ ដែលបណ្ដាលឲ្យមនុស្ស​យ៉ាងតិច​៣២​នាក់​បាន​ស្លាប់ និង​៦៣​នាក់​រង​របួស ។

សារព័ត៌មាន Associated Press បានផ្សាយ​ថា​​ Al-Shabab បានអះអាងទទួលខុសត្រូវចំពោះការវាយប្រហារនេះ ខណៈក្រុមនេះបានកំណត់គោលដៅម្តងហើយម្តងទៀតទៅលើភ្នាក់ងាររដ្ឋាភិបាល និងសណ្ឋាគារនៅក្នុងប្រទេសសូម៉ាលី។ ជាមួយគ្នានេះទីភ្នាក់ងារសារព័ត៌មាន Reuters និយាយថា នេះគឺជាការវាយប្រហារដ៏សាហាវបំផុតនៅក្នុងប្រទេសនេះចាប់តាំងពីការបំផ្ទុះគ្រាប់បែកក្នុងរថយន្តបានសម្លាប់មនុស្សប្រហែល ១០០នាក់នៅទីក្រុង Mogadishu កាលពីខែតុលាឆ្នាំ ២០២២។

គួរបញ្ជាក់ថា Al-Shabab គ្រប់គ្រង​មួយ​ភាគ​ធំនៅភាគខាងត្បូង និង​ភូមិភាគកណ្តាលប្រទេសសូម៉ាលី។ ក្រុមនេះមានទំនាក់ទំនងជាមួយក្រុមអាល់កៃដា ហើយបានធ្វើការបះបោរដ៏ឃោរឃៅអស់រយៈពេលជិត​២០ឆ្នាំប្រឆាំងនឹងរដ្ឋាភិបាលដែល​គាំទ្រ​ដោយអង្គការសហប្រជាជាតិនៅក្នុងប្រទេសសូម៉ាលី៕

អត្ថបទ៖ ប៊ុន សុភាព