អាមេរិក បើកការវាយប្រហារតាមអាកាសលើប្រទេសសូម៉ាលី ជាលើកដំបូងក្រោមរដ្ឋបាលលោក បៃដិន

មន្ទីរបញ្ចកោណបានប្រកាសកាលពីថ្ងៃអង្គារថា សហរដ្ឋអាមេរិកបានធ្វើការវាយប្រហារដោយយន្តហោះដ្រូន ទៅលើគោលដៅរបស់ក្រុម al-Shabab ហើយជាការវាយប្រហារលើកដំបូងប្រឆាំងក្រុមសកម្មប្រយុទ្ធមួយនេះ ក្រោមរដ្ឋបាលលោក ចូ បៃដិន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងការពារជាតិលោកស្រី Cindi King បានបញ្ជាក់ពីការវាយប្រហារតាមអាកាសនៅក្បែរតំបន់ Galkayo របស់ប្រទេសសូម៉ាលី ទៅកាន់គេហទំព័រ Military.com និងកាសែត The New York Times ។

លោកស្រីបាននិយាយថា សកម្មភាពនេះ គឺដើម្បីគាំទ្រដល់កងទ័ពសូម៉ាលី ដែលកំពុងប្រយុទ្ធជាមួយក្រុម al-Shabab ក្រោយពួកសកម្មប្រយុទ្ធមួយនេះ បានវាយប្រហារលើក្រុម Danab ជាកងកុម្ម៉ង់ដូសូម៉ាលីដែលហ្វឹកហ្វឺនដោយសហរដ្ឋអាមេរិក ។

លោកស្រី King បាននិយាយថា “មិនមានកងកម្លាំងសហរដ្ឋអាមេរិក រួមជាមួយកងកម្លាំងសូម៉ាលី ក្នុងអំឡុងពេលប្រតិបត្តិការនេះនោះទេ ខណៈកងកម្លាំងសហរដ្ឋអាមេរិក កំពុងដឹកនាំបេសកកម្មផ្តល់ជំនួយ ដើម្បីគាំទ្រដល់កងកម្លាំងដៃគូសូម៉ាលី” ។

ទន្ទឹមនោះ កាសែត The Times បានរាយការណ៍ថា រដ្ឋបាលលោក បៃដិន បានដាក់កម្រិតលើការវាយប្រហារដោយយន្ដហោះដ្រូននេះ នៅខាងក្រៅតំបន់សង្គ្រាមសកម្ម ខណៈកន្លងមកធ្លាប់បានច្រានចោលសំណើរបស់បញ្ជាការអាហ្រ្វិក ដើម្បីវាយប្រហារគោលដៅក្រុម al-Shabab នៅប្រទេសសូម៉ាលី ៕

ប្រែសម្រួលដោយ ៖ ជីវ័ន្ត

ប្រភព ៖ UPI

ចុចអាន ៖ រដ្ឋអាជ្ញាស៊ើបអង្កេតពន្ធរបស់កូនប្រុស Joe Biden ត្រូវរង់ចាំរហូតដល់ចប់ការបោះឆ្នោត ទើបធ្វើសកម្មភាព