អាមេរិក-កូរ៉េខាងត្បូង ធ្វើសមយុទ្ធ គំរាមកូរ៉េខាងជើង

សម្ព័ន្ធមិត្តអាមេរិក-កូរ៉េខាងត្បូង បានប្រកាសពីការធ្វើសមយុទ្ធរួមគ្នានៅសប្តាហ៍ក្រោយនេះ ជាមួយគោលបំណងដ៏ធំតែមួយគត់គឺដើម្បីគំរាមដល់ប្រទេសកូរ៉េខាងជើង កុំឲ្យបានដៃចេះតែបង្ករឿងឥតឈប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ CNA នៅថ្ងៃចន្ទទី១២ខែសីហាឆ្នាំ២០២៤ សមយុទ្ធប្រចាំឆ្នាំឈ្មោះ Ulchi Freedom Shield នឹងមានការហ្វឹកហាត់ដើម្បីវាយបកទៅការវាយប្រហារណាមួយពីសំណាក់ទីក្រុងព្យុងយ៉ាង ដែលមានអាវុធនុយក្លេអ៊ែរ។

មន្ត្រីយោធានៃសម្ព័ន្ធមិត្តទាំងពីរនិយាយថា សមយុទ្ធឆ្នាំ២០២៤នេះ នឹងចាប់ផ្តើមនៅថ្ងៃទី១៩ខែសីហា ដល់ថ្ងៃទី២៩ខែសីហា ហើយក្នុងការមានការធ្វើលំហាត់ត្រៀមខ្លួនប្រឆាំងនឹងការគំរាមកំហែងនានាដូចជា មីស៊ីល ការរំខាន GPS និងការវាយប្រហារតាមអ៊ីនធឺណេត ក៏ដូចជាការបាញ់គ្រាប់ពិតផងដែរ។

អគ្គសេនាធិការចម្រុះកូរ៉េខាងត្បូងនិយាយថា «សម្ព័ន្ធមិត្តនេះ មានបំណងធំបំផុតគឺ ពង្រឹងសមត្ថភាព និងជំហរបន្ថែមទៀត ដើម្បីរារាំងនិងការពារប្រឆាំងចំពោះអាវុធប្រល័យលោក»។

ទោះបីជាយ៉ាងណាក៏ដោយ ទាំងយោធាកូរ៉េខាងត្បូងនិងសហរដ្ឋអាមេរិក សុទ្ធតែមិនបញ្ជាក់ពីចំនួនទាហានដែលចូលរួមក្នុងសមយុទ្ធរដូវក្តៅនេះ។

សូមបញ្ជាក់ថា អំឡុងសមយុទ្ធ Ulchi Freedom Shield កាលពីឆ្នាំមុន ប្រទេសកូរ៉េខាងជើងបានធ្វើតេស្តមីស៊ីលផ្លោង ដែលខ្លួនចាត់ទុកថាជាការហាត់សមបាញ់កម្ទេចកូរ៉េខាងត្បូង៕

អត្ថបទ៖ សុខ សុវណ្ណ

ចុចអាន៖ អាមេរិក-កូរ៉េខាងត្បូង ប្រកាសធ្វើសមយុទ្ធនុយក្លេអ៊ែរ ខណៈ រុស្ស៊ី-ចិន ក៏កំពុងបង្ហាញសាច់ដុំនៅដែនសមុទ្រ