អាមេរិក-កូរ៉េខាងត្បូង ប្រកាសធ្វើសមយុទ្ធនុយក្លេអ៊ែរ ខណៈ រុស្ស៊ី-ចិន ក៏កំពុងបង្ហាញសាច់ដុំនៅដែនសមុទ្រ

តាមការចុះផ្សាយរបស់ Sputnik កាលពីថ្ងៃចន្ទទី១៥ខែកក្កដាឆ្នាំ២០២៤, សម្ព័ន្ធមិត្ត អាមេរិក-កូរ៉េខាងត្បូង បានប្រកាសពីការធ្វើសមយុទ្ធនុយក្លេអ៊ែររួមគ្នា នៅលើឧបទ្វីបកូរ៉េ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចប្រជុំដែលដឹកនាំដោយប្រធានការិយាល័យសន្តិសុខជាតិកូរ៉េខាងត្បូង Jang Ho-jin, អនុរដ្ឋមន្ត្រីក្រសួងការបរទេស, ក្រសួងបង្រួបបង្រួម, ក្រសួងការពារជាតិ និងអនុប្រធានផ្នែកចារកម្មកូរ៉េខាងត្បូង បាននាំគ្នាពិនិត្យវិធានការនៃកិច្ចព្រមព្រៀងដែលសម្រេចក្នុងកិច្ចប្រជុំកំពូលណាតូ ហើយក៏ឯកភាពគ្នារៀបចំឲ្យមានសមយុទ្ធឡើង។

បើយោងតាមការិយាល័យប្រធានាធិបតីកូរ៉េខាងត្បូងបានឲ្យដឹងថា រដ្ឋាភិបាលទីក្រុងសេអ៊ូល គ្រោងធ្វើប្រតិបត្តិការគ្រប់គ្រងកម្លាំងនុយក្លេអ៊ែរនៅឧបទ្វីបកូរ៉េ ក្នុងសមយុទ្ធរួមគ្នាជាមួយទីក្រុងវ៉ាស៊ីនតោន។ ទោះបីជាយ៉ាងណាក៏ដោយ កាលបរិច្ឆេទជាក់លាក់នៃសមយុទ្ធនេះ មិនទាន់ត្រូវបានបញ្ជាក់ឡើយ។

សេចក្តីប្រកាសនេះ កើតឡើងចំពេលក្រសួងការពារជាតិនៅទីក្រុងប៉េកាំង ក៏បញ្ជាក់ពីការចាប់ផ្តើមធ្វើសមយុទ្ធរវាងកងទ័ពជើងទឹកចិននិងរុស្ស៊ី នៅក្នុងមហាសមុទ្ធប៉ាស៊ីហ្វិកដែរ។ 

យោងតាមសេចក្តីថ្លែងការណ៍ សមយុទ្ធរយៈពេលបីថ្ងៃនេះ កំពុងធ្វើឡើងជិតទីក្រុង ចាន់ជាំង នៃប្រទេសចិន ជាមួយគោលដៅ​ពង្រឹង​សមត្ថភាពកងទ័ព​ជើងទឹក ដើម្បីទប់ទល់នឹងការគំរាមកំហែង​ផ្នែក​សន្តិសុខ រក្សា​ស្ថិរភាព​អន្តរជាតិនិង​តំបន់ ក៏ដូចជា​ជំរុញ​ភាពជា​ដៃគូ​យុទ្ធសាស្ត្រ​។​

សមយុទ្ធនេះទៀតសោត កើតឡើងចំពេលមានភាពតានតឹងកាន់តែក្តៅគគុក រវាងចិននិងបណ្តាប្រទេសជាសមាជិកណាតូ។ ជាក់ស្តែងនៅក្នុងឯកសារដែលអនុម័តបន្ទាប់ពីកិច្ចប្រជុំកំពូលកាលពីសប្តាហ៍មុន ក្នុងទីក្រុងវ៉ាស៊ីនតោន, ប្លុកយោធាដែលដឹកនាំដោយសហរដ្ឋអាមេរិកមួយនេះ បានចោទប្រកាន់ថា ទីក្រុងប៉េកាំងបាននិងកំពុងធ្វើការជាមួយទីក្រុងមូស្គូ ដើម្បីកែប្រែសណ្តាប់ធ្នាប់អន្តរជាតិ ហើយថែមទាំងអះអាងថា ប្រទេសចិនបាននិងកំពុងផ្តល់គ្រឿងសឹក ដល់ក្រុមហ៊ុនផលិតអាវុធរុស្ស៊ីទៀតផង ខណៈជម្លោះអ៊ុយក្រែន មិនទាន់ឃើញសញ្ញាថមថយណាមួយទាល់តែសោះ។

យ៉ាងណា រដ្ឋមន្ត្រីការបរទេសចិនលោក វ៉ាង យី បានច្រានចោលការចោទប្រកាន់ខាងលើថា “គ្មានមូលដ្ឋាន” ហើយអះអាងថា​ ទីក្រុងប៉េកាំង តែងតែជាកម្លាំងសម្រាប់សន្តិភាព និងស្ថិរភាពនៅក្នុងសហគមន៍អន្តរជាតិជានិច្ច។ លើសពីនេះ លោកក៏ជំរុញឲ្យណាតូ ផ្តោតលើកិច្ចសន្ទនា និងកសាងទំនុកចិត្តដាក់គ្នាទៅវិញទៅមកផងដែរ៕

អត្ថបទ៖ សុខ សុវណ្ណ

ចុចអាន៖ ចិន ហាត់សមបាញ់កម្ទេចយន្តហោះចម្បាំងអាមេរិក ដើម្បីគំរាម កុំឲ្យហ៊ានចេះដឹងរឿងតៃវ៉ាន់