ព័ត៌មានអន្ដរជាតិ

ពូទីនបញ្ជាឱ្យរុញច្រានទ័ពអ៊ុយក្រែន ដែលកំពុងកាន់កាប់ដីរុស្ស៊ីប្រហែល១០០០គីឡូម៉ែត្រការ៉េ

បានផុស

២ years មុន

នៅ

ថ្ងៃអង្គារ ១៣ សីហា ២០២៤

ដោយ

ប្រធានាធិបតីរុស្ស៊ី លោក វ្ល៉ាឌីមៀ ពូទីន បានបញ្ជាឲ្យមន្ត្រីរដ្ឋាភិបាលជាន់ខ្ពស់ឱ្យបណ្ដេញកងកម្លាំងអ៊ុយក្រែន ចេញពីទឹកដីរុស្ស៊ីឲ្យអស់។នេះបើយោងតាមការចេញផ្សាយរបស់ទូរទស្សន៍ជាតិជប៉ុនNHKនៅថ្ងៃទី១៣ខែសីហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កងកម្លាំងអ៊ុយក្រែនបាននិងកំពុងធ្វើការវាយប្រហារឆ្លងព្រំដែននៅតំបន់ Kursk ភាគខាងលិចនៃប្រទេសរុស្ស៊ី ខណៈការវាយលុកនេះគឺជាការវាយលុកធំបំផុតដែលអ៊ុយក្រែនបានអនុវត្តចាប់តាំងពីការឈ្លានពានរបស់រុស្ស៊ីចាប់ផ្តើមក្នុងឆ្នាំ ២០២២។ កាលពីថ្ងៃចន្ទ ប្រព័ន្ធផ្សព្វផ្សាយអ៊ុយក្រែនបានចេញផ្សាយវីដេអូដែលបង្ហាញទាហានអ៊ុយក្រែនដកទង់ជាតិរុស្ស៊ីចេញពីអគារមួយនៅក្នុងតំបន់ Kursk ដែលមានចម្ងាយប្រហែល៤គីឡូម៉ែត្រពីព្រំដែន។

ពាក់ព័ន្ធនឹងបញ្ហានេះលោក ពូទីន បានបើកកិច្ចប្រជុំមួយកាលពីថ្ងៃចន្ទជាមួយមន្ត្រីសន្តិសុខជាតិ និងអាជ្ញាធរមកពីតំបន់ចំនួនបីដែលជាប់ព្រំដែនអ៊ុយក្រែន ដោយបានកត់សម្គាល់ថាក្រសួងការពារជាតិរុស្ស៊ីត្រូវតែបណ្តេញសត្រូវចេញពីទឹកដីររុស្ស៊ី។ លោកបានបន្ថែមថា អ៊ុយក្រែនហាក់ដូចជាកំពុងព្យាយាមកែលម្អជំហររបស់ខ្លួនមុនពេលការចរចាដែលអាចកើតមាន ហើយគោលបំណងរបស់អ៊ុយក្រែនគឺដើម្បីបំភិតបំភ័យពលរដ្ឋរុស្ស៊ី និងបំផ្លាញភាពសាមគ្គីរបស់ពួកគេ។ ទោះយ៉ាងណាលោក ពូទីន បាននិយាយថា «អ៊ុយក្រែននឹងទទួលបានការឆ្លើយតបដ៏សក្តិសម ហើយរុស្ស៊ីនឹងសម្រេចបានគោលដៅរបស់ខ្លួន»។

ជាមួយគ្នានេះអភិបាលក្រុងស្តីទីតំបន់ Kursk លោក Alexei Smirnov បាននិយាយថា មនុស្ស ១២នាក់បានបាត់បង់ជីវិតនិង១២១នាក់ផ្សេងទៀត បានរងរបួស ខណៈកងកម្លាំងអ៊ុយក្រែនបានឈានដល់ចម្ងាយ១២គីឡូម៉ែត្រចូលក្នុងតំបន់ Kursk និងបានគ្រប់គ្រងកន្លែងតាំងទីលំនៅចំនួន២៨។ ប្រជាជនរុស្ស៊ីចំនួន ១២១០០០នាក់បានជម្លៀសចេញពីតំបន់ទាំងនោះ និងក៏មានមនុស្សប្រហែល១០០០០ នាក់បានភៀសខ្លួនចេញពីស្រុកមួយចំនួននៅតំបន់ Belgorod តាមបណ្តោយព្រំដែនជាមួយអ៊ុយក្រែន។

ទន្ទឹមនឹងនេះ ប្រធានាធិបតីអ៊ុយក្រែន លោក Volodymyr Zelenskyy ក៏បានជួបប្រជុំជាមួយមន្ត្រីរដ្ឋាភិបាលជាន់ខ្ពស់កាលពីថ្ងៃចន្ទ ខណៈប្រមុខកងទ័ពអ៊ុយក្រែន លោក Oleksandr Syrskyi បានពន្យល់ប្រាប់អ្នកដែលបានចូលរួមអំពីស្ថានភាពនៅក្នុងតំបន់ Kursk ជាកន្លែងដែលកងកម្លាំងអ៊ុយក្រែនកំពុងធ្វើប្រតិបត្តិការឆ្លងព្រំដែន ហើយកងទ័ពអ៊ុយក្រែនបានកាន់កាប់ផ្ទៃដីប្រហែល ១០០០ គីឡូម៉ែត្រការ៉េមកដល់ពេលនេះ៕