WHO បង្ហាញចំនួនដូស និងប្រទេសទទួលបានវ៉ាក់សាំងតាមរយៈកម្មវិធី COVAX

ប្រធាន WHO បាននិយាយកាលពីថ្ងៃសុក្រថា កម្មវិធី COVAX ជាយុទ្ធនាការវ៉ាក់សាំងអន្ដរជាតិដែលដឹកនាំដោយអង្គការសុខភាពពិភពលោក (WHO) និងដៃគូរបស់ខ្លួនបានចែកចាយវ៉ាក់សាំងកូវីដ ១៩ ចំនួន ២០ លានដូសទៅកាន់ប្រទេសចំនួន ២០ ហើយរហូតមកដល់ពេលនេះ ។

នៅដើមសប្តាហ៍នេះយុទ្ធនាការចាក់វ៉ាក់សាំងការពារជំងឺកូវីដ ១៩ ដំបូងបង្អស់នៅទ្វីបអាហ្វ្រិកដោយប្រើដូសនៃវ៉ាក់សាំងដែលត្រូវបានផ្តល់ដោយកម្មវិធី COVAX បានចាប់ផ្តើមនៅក្នុងប្រទេសហ្គាណា និងកូឌីវ័រដែលក្រោយមកត្រូវបានដឹកជញ្ជូនទៅប្រទេសចំនួន ១៨ ផ្សេងទៀតដែលភាគច្រើននៅអាហ្វ្រិក ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គនាយកអង្គការសុខភាពពិភពលោកលោក Tedros Adhanom Ghebreyesus បានប្រាប់សន្និសីទសារព័ត៌មានមួយថា នៅសប្តាហ៍ក្រោយកម្មវិធី COVAX នឹងចែកចាយវ៉ាក់សាំងចំនួន ១៤.៤ លានដូសទៅ ៣១ ប្រទេសទៀត ។

ទោះយ៉ាងណាបរិមាណដូសដែលត្រូវបានចែកចាយតាមរយៈកម្មវិធី COVAX គឺនៅមានតិចតួចនៅឡើយដែលគ្របដណ្តប់តែ ២ ទៅ ៣ ភាគរយនៃប្រជាជននៃប្រទេសដែលទទួលបានវ៉ាក់សាំងតាមរយៈកម្មវិធីនេះ ។

លោក Tedros បាននិយាយថា WHO កំពុងធ្វើការលើការទាក់ទងក្រុមហ៊ុនដែលកំពុងផលិតវ៉ាក់សាំងជាមួយដៃគូផ្សេងទៀតដែលមានសមត្ថភាពដើម្បីជួយបង្កើនផលិតកម្ម និងបង្កើនបរិមាណនៃវ៉ាក់សាំង ។

លោកក៏បានរំលឹកឡើងវិញនូវការអំពាវនាវឲ្យផ្ទេរបច្ចេកវិទ្យាវ៉ាក់សាំងពីក្រុមហ៊ុនដែលមានកម្មសិទ្ធិបញ្ញាលើវ៉ាក់សាំងដល់ក្រុមហ៊ុនដែលអាចផលិតវាបាន ។

លោកបាននិយាយថា “ឧទាហរណ៍ដ៏ល្អមួយនៃវិធីសាស្រ្តនេះគឺក្រុមហ៊ុន AstraZeneca ដែលបានផ្ទេរបច្ចេកវិទ្យាសម្រាប់វ៉ាក់សាំងរបស់ខ្លួនទៅក្រុមហ៊ុន SKBio នៅសាធារណរដ្ឋកូរ៉េ និងវិទ្យាស្ថាន Serum នៃប្រទេសឥណ្ឌាដែលកំពុងផលិតវ៉ាក់សាំង AstraZeneca សម្រាប់កម្មវិធី COVAX” ។

គួរបញ្ជាក់ថា COVAX ដែលជាកម្មវិធីទទួលវ៉ាក់សាំងកូវីដជាសកលគឺមានគោលបំណងដើម្បីធានាថា ប្រជាជនដែលងាយរងគ្រោះបំផុតនៅលើពិភពលោកត្រូវបានចាក់ថ្នាំបង្ការ ហើយប្រទេសដែលមានប្រាក់ចំណូលទាបនិងមធ្យមមានលទ្ធភាពទទួលបានវ៉ាក់សាំងដោយស្មើភាព ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ កម្ពុជាស្ថិតក្នុងចំណោមប្រទេសដំបូងគេ ទទួលវ៉ាក់សាំង កូវីដ-១៩ ពី COVAX

ចុចអាន ៖ កូឡុំប៊ី ជាប្រទេសដំបូងគេនៅទ្វីបអាមេរិក ទទួលបានវ៉ាក់សាំងកូវីដតាមរយៈកម្មវិធី COVAX