អាចម៍ផ្កាយធ្លាក់នៅហ្វីលីពីន បង្កការភ្ញាក់ផ្អើល

កាលពីអធ្រាត្រថ្ងៃពុធទី៤ឆ្លងចូលថ្ងៃព្រហស្បតិ៍ទី៥ ខែកញ្ញាឆ្នាំ២០២៤, ប្រជាជនហ្វីលីពីភ្ញាក់ផ្អើលយ៉ាងខ្លាំង ចំពោះអាចម៍ផ្កាយមួយដែលធ្លាក់មកបុកបរិយាកាសផែនដី ខណៈវីដេអូនេះកំពុងល្បីនិងត្រូវបានគេចែកចាយពេញបណ្តាញសង្គម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីអង្គការណាសា, អាចម៍ផ្កាយឈ្មោះ 2024 RW1 មានមុខកាត់១ម៉ែត្រ ត្រូវគេឃើញនៅម៉ោង ១២:៣៩នាទីរំលងអធ្រាត្រ (ម៉ោងនៅហ្វីលីពីន) ប៉ុន្តែមិនបង្កការគំរាមកំហែងដល់មនុស្សឡើយ។

តាមពិតទៅ ១៥ម៉ោងមុនពេលធ្លាក់, អង្គការណាសា ក៏ព្រមានអំពីអាចម៍ផ្កាយនេះដែរ ប៉ុន្តែជាសំណាងល្អដែលវាធ្លាក់ចូលទៅក្នុងសមុទ្រ ក្បែរកោះ Luzon។

ទោះបីជាយ៉ាងណាក៏ដោយ អាចម៍ផ្កាយនេះ ក៏បានបន្សល់ទុកបំណែកតូចៗខ្លះនៅលើដីគោកផងដែរ ដោយសារតែវាហោះក្នុងល្បឿនដ៏លឿន ហើយកកិតជាមួយខ្យល់។

សូមបញ្ជាក់ថា នេះទើបតែលើកទីប្រាំបួនប៉ុណ្ណោះ ដែលអាចម៍ផ្កាយមួយត្រូវបានគេសង្កេតឃើញ មុនពេលជះឥទ្ធិពលដល់ភពផែនដីពិតប្រាកដមែន។

ក្រោយព្រឹត្តិការណ៍នេះ ក្រុមអ្នកវិទ្យាសាស្រ្តបានបង្ហាញក្តីសង្ឃឹមថា នាពេលអនាគតពិភពលោក​ អាចចៀសផុតពីការវាយប្រហារដោយអាចម៍ផ្កាយបាន ព្រោះតែបច្ចេកវិទ្យាទំនើបអាចដឹងមុននិងចេញការព្រមានទាន់ពេលវេលា៕

អត្ថបទ៖ សុខ សុវណ្ណ

ចុចអាន៖ ណាសា ព្រមានពីអាចម៍ផ្កាយធំមួយ ដែលហោះមកកៀកផែនដីនៅ ថ្ងៃទី១៥នេះ