សៀងហៃផ្អាក​មធ្យោ​បាយ​ដឹកជញ្ជូន​និងសេវាកម្ម​កម្សាន្ត​ទាំងអស់​ ខណៈព្យុះ Bebinca នឹង​វាយ​ប្រហារ​

ទីក្រុងសៀងហៃបានផ្អាកការដឹកជញ្ជូនតាមផ្លូវអាកាស ផ្លូវសមុទ្រ និងផ្លូវគោកសំខាន់ៗ ខណៈដែល​ព្យុះទីហ្វុង Bebinca​ ដែល​អាច​​ក្លាយ​ជា​ព្យុះត្រូពិចដ៏ខ្លាំងបំផុត វាយ​ប្រហារ​ទីក្រុង​​នេះ​​​ក្នុង​ពេល​​ដ៏​ឆាប់​។ នេះបើយោងតាមការចេញផ្សាយ​របស់ទីភ្នាក់ងារព័ត៌មាន Al Jazeera នៅថ្ងៃទី១៦ខែកញ្ញានេះ។

ព្យុះទីហ្វុងប្រភេទទី១ដែលមានល្បឿន​អតិបរិមាប្រហែល​១៤៤គីឡូម៉ែត្រក្នុងមួយម៉ោង មានចម្ងាយប្រហែល​៤០០​គីឡូម៉ែត្រ ភាគអាគ្នេយ៍នៃទីក្រុងសៀងហៃ គិតត្រឹមម៉ោង៥ល្ងាចម៉ោងក្នុងស្រុក​កាលពីថ្ងៃអាទិត្យ។

ដោយសារឥទ្ធិពលព្យុះនេះ ជើងហោះហើរទាំងអស់ត្រូវបានបញ្ជាឱ្យលុបចោលនៅអាកាសយានដ្ឋានចំនួនពីររបស់ទីក្រុងសៀងហៃ ចាប់ពីម៉ោង៨យប់ល្ងាច​​ថ្ងៃអាទិត្យ។ ចំណែកស្ថានីយ៍រថភ្លើងក្រុងសៀងហៃក៏បានផ្អាកសេវាកម្មមួយចំនួនផងដែរ ដើម្បីធានាសុវត្ថិភាពអ្នកដំណើរ។

តំបន់​កម្សាន្ត​នានា​ក្នុងទីក្រុងសៀងហៃ រួមទាំង​មជ្ឈមណ្ឌល​កម្សាន្ត​ដ៏​ពេញ​និយម​​ Shanghai Disney ត្រូវបានបិទជាបណ្តោះអាសន្ន ខណៈដែលសាឡាងភាគច្រើនត្រូវបានផ្អាកសេវាកម្ម​ទៅនិងមកពីកោះ Chongming។ រីឯនៅទីក្រុង Zhejiang កប៉ាល់នានាត្រូវបានប្រមូលផ្ដុំមកវិញ ខណៈដែលឧទ្យានជាច្រើននៅក្នុងទីក្រុងធានី Hangzhou បានប្រកាសបិទ។

គួរបញ្ជាក់ថា ព្យុះទីហ្វុងនេះ បានបោកបក់និងបន្សល់ការបំផ្លាញនៅក្នុងប្រទេសហ្វីលីពីនជាច្រើនមកហើយ និងត្រូវបានគេរំពឹងថានឹងបោកបក់តាមឆ្នេរសមុទ្រភាគខាងកើតរបស់ប្រទេសចិន ដោយបានធ្វើឲ្យក្រសួងឧតុនិយមចិនបានចេញការប្រកាសអាសន្នពីព្យុះទីហ្វុងពណ៌ក្រហមនៅរសៀលថ្ងៃអាទិត្យ ដោយព្រមានពីភ្លៀងធ្លាក់ខ្លាំងនៅភាគខាងកើតប្រទេស​ចិន។

គួររម្លឹកថា ព្យុះដ៏ខ្លាំងបំផុតដែលបោកបក់មកលើទីក្រុងសៀងហៃក្នុងប៉ុន្មានទសវត្សរ៍ថ្មីៗនេះ គឺព្យុះទីហ្វុង Gloria ក្នុងឆ្នាំ ១៩៤៩ ដែលបានបោកបក់ពេញទីក្រុងជាមួយនឹងល្បឿន ១៤៤គីឡូម៉ែត្រក្នុងមួយម៉ោង។ ទីក្រុងសៀងហៃត្រូវបានគំរាមកំហែងចុងក្រោយដោយការវាយលុកពីព្យុះទីហ្វុងដ៏មានឥទ្ធិពល Muifaក្នុងឆ្នាំ២០២២​។

ជាធម្មតា ទីក្រុងសៀងហៃត្រូវបានរួចផុតពីព្យុះទីហ្វុងដ៏ខ្លាំងដែលបានវាយប្រហារភាគខាងត្បូងបន្ថែមទៀតនៅក្នុងប្រទេសចិន រួមទាំងព្យុះទីហ្វុង Yagi ដែលជាព្យុះបំផ្លិចបំផ្លាញប្រភេទទី ៤ ដែលបានបោកបក់កាត់ខេត្តហៃណានភាគខាងត្បូងកាលពីសប្តាហ៍មុន ប៉ុន្តែ​ទីក្រុង​សៀងហៃ និង​ខេត្ត​ជិត​ខាង​ទំនងជាមិនអាចរួចផុតពីព្យុះ Bebinca ទេ។

ជាមួយគ្នានេះការមកដល់របស់ព្យុះ Bebinca ស្របពេលជាមួយពិធីបុណ្យពាក់កណ្តាលសរទរដូវរបស់ចិន ដែលជាបុណ្យមានថ្ងៃឈប់សម្រាករយៈពេលបីថ្ងៃទូទាំងប្រទេស ដែលជនជាតិចិនជាច្រើនធ្វើដំណើរកម្សាន្ត ធ្វើពិធីអបអរ ជួបជុំគ្រួសាររបស់ពួកគេ។

ចំណែកនៅប្រទេសហ្វីលីពីនព្យុះទីហ្វុង Bebinca បានបោកបក់ធ្វើឲ្យរលំដើមឈើសម្លាប់មនុស្ស ៦នាក់ ខណៈព្យុះនេះនាំមកនូវខ្យល់បក់ខ្លាំង និងទឹកជំនន់កាលពីថ្ងៃសៅរ៍ និងថ្ងៃអាទិត្យ៕

អត្ថបទ៖ ប៊ុន សុភាព