ទីក្រុងសៀងហៃ ជម្លៀសមនុស្សជិត៣ម៉ឺននាក់ ខណៈប្រឈមនឹងព្យុះត្រូពិចនិងការគំរាមកំហែងពីរលកយក្សស៊ូណាមិ

ទីក្រុងសៀងហៃ ប្រទេសចិនជម្លៀសមនុស្សជិត៣ម៉ឺននាក់ ខណៈត្រៀមប្រឈមនឹងព្យុះស៊ីក្លូនត្រូពិច Co-May និងការព្រមានអំពីរលកយក្សស៊ូណាមិបន្ទាប់ពីការរញ្ជួយដីកម្រិត ៨.៨ រ៉ិចទ័រ នៅជិតឧបទ្វីប Kamchatka របស់ប្រទេសរុស្ស៊ី ។ នេះបើយោងតាមការចេញផ្សាយរបស់ទីភ្នាក់ងារព័ត៌មានReuters។

ព្យុះCo-May បានបោកបក់លើទីក្រុង Zhoushan ក្នុងខេត្ត Zhejiang នៅព្រឹកថ្ងៃពុធនេះ ជាមួយនឹងល្បឿនខ្យល់រហូតដល់ ៨៣ គីឡូម៉ែត្រក្នុងមួយម៉ោង។ អាជ្ញាធរសៀងហៃបានឆ្លើយតបយ៉ាងឆាប់រហ័សដោយជម្លៀសមនុស្សជាង២៨០,០០០នាក់ ដោយលុបចោលជើងហោះហើរជាង ៦៤០ នៅអាកាសយានដ្ឋាន Pudong និង Hongqiao របស់ទីក្រុងសៀងហៃ។ រួមជាមួយនិងផ្អាកសេវាកម្មសាឡាង និងការដាក់កម្រិតល្បឿនផ្លូវ និងផ្លូវដែក។ ទីក្រុងជិតខាងដូចជា Ningbo និង Hangzhou ក៏មានការរំខានដល់ការធ្វើដំណើរផងដែរ។

ទោះបីជា Co-May ខ្សោយជាងព្យុះទីហ្វុងក៏ដោយ ក៏ទីក្រុងសៀងហៃបានធ្វើការប្រុងប្រយ័ត្នយ៉ាងទូលំទូលាយ ព្រោះខ្លាចព្យុះនេះដូចការវាយប្រហារដោយផ្ទាល់ដ៏កម្រលើទីក្រុងនេះដូចព្យុះទីហ្វុង Bebinca កាលពីឆ្នាំមុន។ ព្យុះ Co-May ត្រូវបានគេរំពឹងថានឹងបោកបក់ម្ដងទៀតនៅជិតទីក្រុងសៀងហៃនៅថ្ងៃបន្ទាប់។

បន្ថែមលើក្តីបារម្ភ ឆ្នេរសមុទ្ររបស់ប្រទេសចិន ជាពិសេសទីក្រុងសៀងហៃ និង Zhoushan ត្រូវបានដាក់ឱ្យស្ថិតក្រោមការប្រកាសអាសន្នរលកយក្សស៊ូណាមិ ជាមួយនឹងការព្យាករណ៍រលកសមុទ្រឡើងដល់កម្ពស់រហូតដល់ ១ ម៉ែត្រ ដែលបង្កឡើងដោយការរញ្ជួយដីនៅចម្ងាយឆ្ងាយរបស់រុស្ស៊ី។ មជ្ឈមណ្ឌលព្យាករណ៍បរិស្ថានសមុទ្រជាតិបានព្រមានអំពីផលប៉ះពាល់ ដែលអាចកើតមាននៅតាមផ្នែកខ្លះនៃឆ្នេរសមុទ្ររបស់ប្រទេសចិន ខណៈប្រទេសផ្សេងទៀត ដូចជាជប៉ុន និង រដ្ឋជាច្រើនរបស់អាមេរិកកំពុងប្រឈមនឹងហានិភ័យខ្ពស់ពីរលកស៊ូណាមិយក្សនេះ។

ទោះបីជាមានអាកាសធាតុមិនល្អក៏ដោយ Disneyland និង Legoland របស់ទីក្រុងសៀងហៃនៅតែបើកដំណើរខណៈកន្លែងទាក់ទាញទេសចរមួយចំនួនត្រូវបានផ្អាកក៏ដោយ។ អាជ្ញាធរ​នៅសៀងហៃនៅ​តែ​មាន​ការ​ប្រុង​ប្រយ័ត្ន​ខ្ពស់ ខណៈ​ការ​គំរាមកំហែង​ទាំង​ព្យុះ និង​រលក​យក្ស​ស៊ូណាមិ​នៅ​តែ​បន្ត​កើត​មាន៕

អត្ថបទ៖ ប៊ុន សុភាព