ត្រាំ-ហារីស នឹងជួបទល់មុខ ហ្សេលេនស្គី នៅសប្តាហ៍ក្រោយ

សារព័ត៌មានធំៗដូចជា Reuters, CNN និង Bloomberg សុទ្ធតែចុះផ្សាយដូចៗគ្នាថា បេក្ខជនឈរឈ្មោះបោះឆ្នោតអាមេរិកមកពីគណបក្សទាំងសងខាង នឹងជួបពិភាក្សាទល់មុខជាមួយប្រធានាធិបតីអ៊ុយក្រែន នៅសប្តាហ៍ក្រោយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍កាលពីថ្ងៃពុធទី១៨ខែកញ្ញាឆ្នាំ២០២៤, លោក ដូណាល់ ត្រាំ និងលោកស្រី កាម៉ាឡា ហារីស នឹងជួបលោក ហ្សេលេនស្គី ពេលប្រមុខរដ្ឋាភិបាលទីក្រុងកៀវ អញ្ជើញចូលរួមជំនួបកំពូលអង្គការសហប្រជាជាតិ នៅសហរដ្ឋអាមេរិក។

បើជំនួបនេះកើតឡើងមែន នោះនឹងក្លាយជាឱកាសសម្រាប់បេក្ខជនប្រធានាធិបតីទាំងពីរ បញ្ជាក់ពីគោលជំហររបស់ខ្លួនទៅកាន់អ៊ុយក្រែន ហើយលោក ហ្សេលេនស្គី ក៏អាចជ្រាបច្បាស់ពីការគាំទ្ររបស់អាមេរិក ក្រោយការបោះឆ្នោតខែវិច្ឆិកាផងដែរ។

ក្នុងដំណើរមកសហរដ្ឋអាមេរិកលើកនេះ លោក ហ្សេលេនស្គី ក៏នឹងនាំយក «ផែនការជ័យជម្នះ» មកបង្ហាញប្រមុខសេតវិមានលោក ចូ បៃដិន ផងដែរ។ លោកហ្សេលេនស្គី អះអាងថា «ផែនការជ័យជម្នះ» នេះ មានបំណងនាំមកនូវសន្តិភាពដល់អ៊ុយក្រែន ជួយ​ឲ្យ​ប្រទេសរឹងមាំ និងចៀសវាងជម្លោះជាប់​គាំង។

សូមបញ្ជាក់ថា លើកចុងក្រោយដែលលោក ត្រាំ ពិភាក្សាជាមួយលោក ហ្សេលេនស្គី គឺនៅក្នុងខែមិថុនា ដែលពេលនោះ អ្នកសាធារណរដ្ឋបានសន្យាថា នឹងបញ្ចប់ជម្លោះអ៊ុយក្រែន។ ចំណែកលោកស្រី ហារីស ក៏បានជួបលោក ហ្សេលេនស្គី ក្នុងខែមិថុនានោះដែរ ក្នុងអំឡុងកិច្ចប្រជុំកំពូលសន្តិភាព នៅទីក្រុង Lucerne ប្រទេសស្វីស៕

អត្ថបទ៖ សុខ សុវណ្ណ 

ចុចអាន៖ មេ​ដឹក​នាំ​អ៊ុយក្រែន ប្រាប់​ថា «ផែនការ​ជ័យជម្នះ» ធ្វើ​រួចរាល់​ហើយ!