ព័ត៌មានអន្ដរជាតិ

អាមេរិក ព្រមានគ្រប់ភាគីទាំងអស់ប្រឆាំងនឹងការកើនឡើងនៃកម្ដៅក្នុងមជ្ឈិមបូព៌ា

បានផុស

២ years មុន

នៅ

ថ្ងៃសុក្រ ២០ កញ្ញា ២០២៤

ដោយ

Chheang

សហរដ្ឋអាមេរិកកាលពីថ្ងៃទី១៩ខែកញ្ញា បានព្រមានគ្រប់ភាគីនៅមជ្ឈិមបូព៌ាប្រឆាំងនឹងការកើនឡើងកម្ដៅ ខណៈដែលភាពតានតឹងរវាងក្រុមហេសបូឡា ដែលគាំទ្រដោយអ៊ីរ៉ង់ និងប្រទេសអ៊ីស្រាអែល នៅតែមានកម្រិតខ្ពស់ ដោយនិយាយថា អាទិភាពរបស់ទីក្រុងវ៉ាស៊ីនតោន គឺស្វែងរកដំណោះស្រាយការទូត។

អ្នកនាំពាក្យក្រសួងការបរទេស លោក Matthew Miller បានប្រាប់ថា៖ «យើងនឹងបន្តគាំទ្រសិទ្ធិការពារខ្លួនរបស់អ៊ីស្រាអែល ប៉ុន្តែយើងមិនចង់ឃើញភាគីណាមួយធ្វើឲ្យជម្លោះនេះកើនឡើងនោះទេ»។

មជ្ឈិមបូព៌ាគឺស្ថិតនៅកៀកនឹងការផ្ទុះសង្គ្រាមទ្រង់ទ្រាយធំ បន្ទាប់ពីការវាយប្រហារដ៏សាហាវដែលបានបំផ្ទុះវិទ្យុ និងឧបករណ៍ទាក់ទងរបស់ក្រុមសកម្មប្រយុទ្ធហេសបូឡា ដែលមានមូលដ្ឋាននៅលីបង់ ដោយបានសម្លាប់មនុស្ស៣៧នាក់ និងរបួសប្រហែល៣០០០នាក់។

ត្បិតអំពាវនាវឲ្យមានភាពស្ងប់ស្ងាត់នៅមជ្ឈិមបូព៌ាក៏ពិតមែន តែលោក Miller បានទទួលស្គាល់ថាការទូតរបស់អាមេរិកក៏មានដែនកំណត់ផងដែរ។

លោក Miller ថា៖ «យើងបាននៅលូកដៃនៅក្នុងតំបន់អស់មួយរយៈ ហើយជាការពិតណាស់ ចាប់តាំងពីថ្ងៃទី៧ខែតុលា យើងបានចូលរួមប្រឹងប្រែងកាត់បន្ថយភាពតានតឹង។ ប៉ុន្តែទីបំផុត ប្រទេសទាំងអស់ត្រូវមានទំនួលខុសត្រូវ ហើយគ្រប់អង្គភាពទាំងអស់ទទួលខុសត្រូវចំពោះសកម្មភាពដែលពួកគេបានធ្វើ»។

ប្រភពដែលដឹងអំពីបញ្ហានេះបានប្រាប់ទីភ្នាក់ងារព័ត៌មាន Reuters ថា រដ្ឋមន្ត្រីការពារជាតិអាមេរិក លោក Lloyd Austin បានពន្យារពេលធ្វើដំណើរទៅប្រទេសអ៊ីស្រាអែល ដែលគ្រោងធ្វើនៅសប្តាហ៍ក្រោយ។ ដោយឡែក លោក Miller បានបដិសេធមិនធ្វើអត្ថាធិប្បាយលើការពន្យារពេលរបស់លោក Austin នោះទេ ប៉ុន្តែបានបញ្ជាក់ថាទីក្រុងវ៉ាស៊ីនតោននឹងបន្តការពិភាក្សាជាមួយអ៊ីស្រាអែល។

សូមបញ្ជាក់ថា ប្រទេសលីបង់ និងក្រុមហេសបូឡា បានស្តីបន្ទោសអ៊ីស្រាអែលចំពោះការបំផ្ទុះឧបករណ៍ទាក់ទង ដែលមេដឹកនាំក្រុមហេសបូឡា លោក Hasan Nasrallah បានប្រកាសថា «បានឆ្លងកាត់បន្ទាត់ក្រហមទាំងអស់»។ ប្រភពសន្តិសុខ បាននិយាយថា ការវាយប្រហារនេះប្រហែលជាធ្វើឡើងដោយទីភ្នាក់ងារចារកម្ម Mossad របស់អ៊ីស្រាអែល ដែលមានប្រវត្តិយូរមកហើយនៃការវាយប្រហារដ៏ស្មុគ្រស្មាញលើទឹកដីបរទេស។ យ៉ាងណា អ៊ីស្រាអែលមិនបានធ្វើអត្ថាធិប្បាយដោយផ្ទាល់លើការវាយប្រហារនោះទេ៕

ដោយ៖ ឈាង