អេហ្ស៊ីប​ផ្តល់​អាវុធ​បន្ថែម​ដល់​សូម៉ាលី​ ​​ដែល​បង្ក​អរិភាព​​ជាមួយ​អេត្យូពី

នាវាចម្បាំងអេហ្ស៊ីបមួយគ្រឿងបានប្រគល់ឃ្លាំងអាវុធសំខាន់ទីពីរដល់ប្រទេសសូម៉ាលី រួមទាំងកាំភ្លើងធំ ក្នុងសកម្មភាពដែលទំនងជាបង្កឱ្យមាន​អរិភាព​បន្ថែមទៀតរវាងប្រទេសទាំងពីរ និងអេត្យូពី។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២៤ខែកញ្ញានេះ។

ក្រសួងការបរទេសអេហ្ស៊ីបបាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថា មានការដឹកជញ្ជូនជំនួយយោធារបស់​អេហ្ស៊ីប បានមកដល់រដ្ឋធានី Mogadishu ប្រទេសសូម៉ាលី ដើម្បីគាំទ្រនិងកសាងសមត្ថភាពរបស់កងទ័ព​របស់​ប្រទេស​សូម៉ាលី។

ក្រសួងនេះថា ការដឹកជញ្ជូននេះ «បញ្ជាក់ឡើងវិញការកាំទ្ររបស់អេហ្ស៊ីបជួយក្នុងកិច្ចខិតខំប្រឹងប្រែងរបស់សូម៉ាលីក្នុងការអភិវឌ្ឍសមត្ថភាពជាតិដែលចាំបាច់ដើម្បីបំពេញសេចក្តីប្រាថ្នារបស់ប្រជាជនសូម៉ាលីសម្រាប់សន្តិសុខ ស្ថិរភាព និងការអភិវឌ្ឍន៍»។

​ការផ្ដល់ជំនួយ​យោធា​ជុំ​ដំបូង​កាលពីខែសីហារបស់អេហ្ស៊ីបដល់​ប្រទេស​សូម៉ាលី​នេះគឺជាលើកដំបូងក្នុង​រយៈពេល​ជាង​បួន​ទសវត្សរ៍ ខណៈទំនាក់ទំនងរវាងអេហ្ស៊ីប និងសូម៉ាលីបានកើនឡើងនៅឆ្នាំនេះ ដោយសារការមិនទុកចិត្តរួមគ្នារបស់ពួកគេចំពោះប្រទេសអេត្យូពី ដែលជំរុញឱ្យទីក្រុងគែរបញ្ជូនអាវុធជាច្រើនទៅកាន់ទីក្រុង Mogadishu រដ្ឋធានីរបស់ប្រទេសសូម៉ាលី បន្ទាប់ពីប្រទេសទាំងនោះបានចុះហត្ថលេខាលើកិច្ចព្រមព្រៀងសន្តិសុខរួមគ្នាកាលពីខែសីហា។

យោងតាមទីភ្នាក់ងារសារព័ត៌មាន Reuters បានរាយការណ៍ថា នាវាចម្បាំងអេហ្ស៊ីប បានចាប់ផ្តើមផ្ទុកអាវុធកាលពីថ្ងៃអាទិត្យ ហើយកងកម្លាំងសន្តិសុខបានបិទមាត់ផ្លូវសមុទ្រ និងផ្លូវជុំវិញកាលពីថ្ងៃអាទិត្យ និងថ្ងៃចន្ទ ខណៈដែលក្បួនរថយន្តបានដឹកអាវុធទៅកាន់អគារក្រសួងការពារជាតិ និងមូលដ្ឋានយោធានៅក្បែរនោះទៅកាន់កំពុងផែ ។

គួរបញ្ជាក់ថាប្រទេសអេត្យូពីបានខឹង ប្រទេសសូម៉ាលី ជុំវិញកិច្ចព្រមព្រៀងបឋមក្នុងខែមករាជាមួយតំបន់ដាច់ចេញពីប្រទេសសូម៉ាលី ដើម្បីជួលដីសម្រាប់កំពង់ផែជាថ្នូរនឹងការទទួលស្គាល់ឯករាជ្យរបស់ខ្លួនពីប្រទេសសូម៉ាលី។

ប្រទេសអេត្យូពីក៏មានទាហានយ៉ាងហោចណាស់៣០០០នាក់ដែលឈរជើងនៅក្នុងប្រទេសសូម៉ាលីដែលជាផ្នែកមួយនៃគំនិតផ្តួចផ្តើមរក្សាសន្តិភាពដែលហៅថាបេសកកម្មផ្លាស់ប្តូរសហភាពអាហ្រ្វិកនៅសូម៉ាលី (ATMIS) ដែលកំពុងធ្វើការដើម្បីបង្ក្រាបការបះបោរប្រដាប់អាវុធដែលមានទាហានប្រមាណ៥០០០-៧០០០ នាក់ត្រូវបានដាក់ពង្រាយនៅក្នុងតំបន់ផ្សេងទៀតក្រោម កិច្ចព្រមព្រៀងទ្វេភាគី ខណៈសូម៉ាលីចង់​ឱ្យ​ទាហាន​អេត្យូពី​ទាំងអស់​ចាកចេញ​នៅ​ចុង​ឆ្នាំ​នេះ​ និងលុបចោល​កិច្ចព្រមព្រៀង​នោះ។

ទន្ទឹមនឹងនេះដែរ ប្រទេសអេហ្ស៊ីបដែលមានជម្លោះជាមួយប្រទេសអេត្យូពីអស់រយៈពេលជាច្រើនឆ្នាំជុំវិញការសាងសង់ទំនប់វារីអគ្គិសនីដ៏ធំល្វឹងល្វើយរបស់ Addis Ababa នៅលើផ្នែកក្បាលទឹកនៃទន្លេ Nile បានថ្កោលទោសកិច្ចព្រមព្រៀងរបស់ប្រទេស Somaliland ។

គួររម្លឹកថានៅក្នុងខែមករាឆ្នាំនេះ ប្រធានាធិបតីអេហ្ស៊ីប Abdel Fattah el-Sisi បាននិយាយថាប្រទេសលោកឈរជាមួយសូម៉ាលី។ លោក El-Sisi បាននិយាយនៅក្នុងសន្និសីទសារព័ត៌មានជាមួយលោក Hassan Sheikh Mohamud ខណៈពេលដែលលោកមកសួរសុខទុក្ខប្រធានាធិបតីសូម៉ាលីថា «អេហ្ស៊ីបនឹងមិនអនុញ្ញាតឱ្យនរណាម្នាក់គំរាមកំហែងសូម៉ាលី ឬប៉ះពាល់ដល់សន្តិសុខរបស់ខ្លួនឡើយ»។

លើសពីនេះទីក្រុងគែរក៏បានផ្តល់ជូនផងដែរក្នុងការរួមចំណែកដល់ទាហានក្នុងបេសកកម្មរក្សាសន្តិភាពថ្មីមួយនៅក្នុងប្រទេសសូម៉ាលី ទោះបីជាខ្លួនមិនបានធ្វើអត្ថាធិប្បាយលើបញ្ហានេះជាសាធារណៈក៏ដោយ៕

អត្ថបទ៖ ប៊ុន សុភាព