​លោក បៃដិន ​​​​សម្រេច​​លើ​មូលនិធិ​សង្គ្រោះ​គ្រោះមហន្តរាយដ៏ធំ​នៅ​ភាគឦសានប្រទេស​​

ប្រធានាធិបតីសហរដ្ឋ​អាមេរិក​ លោក ចូ​ បៃដិន បានអនុម័តសេចក្តីប្រកាស​លើគ្រោះមហន្តរាយដ៏ធំមួយ​ចំពោះ​ទឹកជំនន់ធ្ងន់ធ្ងរ​ដែលបានវាយប្រហារភាគឦសាននៃរដ្ឋ Vermont កាល​​ចុងខែកក្កដា ដែលការអនុម័តនេះនិងផ្ដល់មូលនិធិដល់ការ​ស្ដារការខូតខាតពីគ្រោះទឹកជំនន់ឡើងវិញ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី​២៨ខែកញ្ញានេះ។

សេចក្តីប្រកាសនេះធ្វើឱ្យមូលនិធិសហព័ន្ធមាន​​​សាច់​ប្រាក់​​ដើម្បីជួយសហគមន៍ និងបុគ្គលនៅក្នុងស្រុក Caledonia, Essex និង Orleans ងើបឡើងវិញពីការខូចខាតពីព្យុះនៅថ្ងៃទី ២៩-៣១ខែកក្កដា ដែលមួយចំនួនត្រូវបានវាយប្រហារដោយ​ទឹកជំនន់ជាលើកទីពីរក្នុងរយៈពេលបីសប្តាហ៍។ នេះបើយោងតាមការិយាល័យរបស់អភិបាលរដ្ឋ Vermont លោក Phil Scott។

លោក Scott បាននិយាយនៅក្នុងសេចក្តីថ្លែងការណ៍មួយថា​៖«នេះគឺជាការប្រកាសគ្រោះមហន្តរាយលើកទីបីរបស់យើងក្នុងរយៈពេលជាងមួយខែនិងទីប្រាំពីរក្នុងរយៈពេល១៤ខែ ខណៈការប្រកាសអំពីគ្រោះមហន្តរាយនេះនឹងនាំមកនូវធនធាន​ហិរញ្ញវត្ថុ​ចាំបាច់ជាច្រើនដល់ទីក្រុង និងបុគ្គលនានា ដើម្បីស្ដារឡើងវិញពីផលប៉ះពាល់នព្យុះនេះនិងគ្រោះទឹកជំនន់»។

ការវាយតម្លៃដំបូងបានរកឃើញថា ផ្ទះចំនួន ៨៥ត្រូវបានបំផ្លាញ ឬខូចខាត ហើយការវាយតម្លៃរបស់សហព័ន្ធមួយផ្នែកបានរកឃើញថាមានការខូចខាតហេដ្ឋារចនាសម្ព័ន្ធសាធារណៈជាង ៣,៧ លានដុល្លារ។

ការិយាល័យរបស់លោក Scott បាននិយាយថា បុគ្គលម្នាក់ៗអាចស្វែងរកសំណងមួយចំនួនសម្រាប់ការចំណាយចាំបាច់ និងតម្រូវការធ្ងន់ធ្ងរដែលមិនអាចបំពេញបានតាមរយៈការធានារ៉ាប់រង ឬជំនួយផ្សេងទៀត រួមទាំង ការជួសជុលផ្ទះ ប្ដូរផ្ទះ កន្លែងស្នាក់នៅ និងការចំណាយផ្សេងៗទៀត ហើយសហគមន៍អាចស្វែងរកសំណងពីសហព័ន្ធសម្រាប់ការឆ្លើយតបនឹងព្យុះ និងការស្តារឡើងវិញ។

សហរដ្ឋអាមេរិកមួយរយៈចុង​ក្រោយ​នេះ​​បានទទួលរងនូវ​ឥទ្ធិពល​ព្យុះដែលបណ្ដាលឲ្យមានការខូខាតហេដ្ឋារចនាសម្ព័ន្ធនៅក្នុងរដ្ឋមួយចំនួន ហើយគិតត្រឹមព្រឹកថ្ងៃសៅរ៍ទី២៨ខែកញ្ញាឆ្នាំ២០២៤ សហរដ្ឋអាមេរិកបានរាយការណ៍អំពីមនុស្សស្លាប់យ៉ាងតិច៤៣នាក់ ដោយសារព្យុះកំណាច Helene ប៉ះពាល់​នៅរដ្ឋចំនួន៤៕

អត្ថបទ៖ ប៊ុន សុភាព