ធនាគារ​ពិភពលោក អនុម័ត​កម្ចី ១,៥៧​ពាន់​លាន​ដុល្លារ​ឲ្យ​នីហ្សេរីយ៉ា

ធនាគារពិភពលោក ​កាលពីថ្ងៃចន្ទបានអនុម័តកញ្ចប់ហិរញ្ញប្បទានចំនួន ១,៥៧​ពាន់លានដុល្លារសម្រាប់ប្រទេសនីហ្សេរីយ៉ា ក្រោមកម្មវិធីថ្មីមួយដើម្បីគាំទ្រដល់វិស័យសុខាភិបាល និង​វិស័យ​អប់រំ ព្រម​ទាំង​ជួយផ្តល់​ការ​ផ្គត់ផ្គង់​ថាមពល​អគ្គិសនីប្រកបដោយនិរន្តរភាព។

ទិន្នន័យពីការិយាល័យគ្រប់គ្រងបំណុល បានបង្ហាញថា ធនាគារពិភពលោកគឺជាអ្នកផ្តល់ប្រាក់កម្ចីធំជាងគេដល់ប្រទេសនីហ្សេរីយ៉ា ជាមួយនឹងប្រាក់កម្ចីជាង ១៥​ពាន់លានដុល្លារ​គិត​ត្រឹម​ចុងខែមីនា។

ធនាគារពិភពលោក បានប្រកាស​នៅក្នុងសេចក្តីថ្លែងការណ៍មួយថា ថវិកា​នេះ​នឹងជួយបង្កើន​ការ​ប្រើប្រាស់ និងប្រសិទ្ធភាពនៃហិរញ្ញប្បទានសម្រាប់ការអប់រំជាមូលដ្ឋាន និងការផ្តល់សេវាថែទាំសុខភាព​បឋម។

ធនាគារពិភពលោក បាន​រៀបរាប់​ថា៖ «ការផ្តល់ហិរញ្ញប្បទានថ្មីរួមមាន ៥០០​លានដុល្លារសម្រាប់ការដោះស្រាយបញ្ហាអភិបាលកិច្ចដែលរារាំងដល់ការផ្តល់ការអប់រំ និងសុខភាព ៥៧០​លានដុល្លារសម្រាប់កម្មវិធីពង្រឹងការផ្តល់សេវាថែទាំសុខភាពបឋម និង ៥០០​លានដុល្លារសម្រាប់គម្រោងថាមពល និងប្រព័ន្ធធារាសាស្រ្តប្រកបដោយនិរន្តរភាពសម្រាប់នីហ្សេរីយ៉ា»។

នីហ្សេរីយ៉ាគឺជាប្រទេសមួយក្នុងចំណោមប្រទេសដែលមានចំនួនកុមារ​មិន​បាន​ចូល​សាលាច្រើនជាងគេ ភាគច្រើនដោយសារតែអសន្តិសុខ ជាពិសេសនៅភាគខាងជើងនៃប្រទេស ព្រោះ​តែ​ការ​ការបះបោរអ៊ីស្លាមនិយមដ៏រ៉ាំរ៉ៃ និងក្រុម​ក្មេង​ទំនើង។

ធនាគារពិភពលោក បាននិយាយថា ថវិកាមួយផ្នែកនឹងត្រូវប្រើប្រាស់ដើម្បីកែលម្អសុវត្ថិភាពទំនប់​ទឹក ដើម្បីការពារប្រជាជនពី​គ្រោះ​ទឹកជំនន់។

ប្រទេសនីហ្សេរីយ៉ាប្រឈមនឹងទឹកជំនន់ជាញឹកញាប់ ហើយនៅឆ្នាំនេះមនុស្សរហូតដល់១​លាននាក់បានរងផលប៉ះពាល់ បន្ទាប់ពីទំនប់ទឹកនៅភាគឦសានរដ្ឋ Borno បានបាក់៕

ដោយ៖ ឈាង