គួរឲ្យរន្ធត់ ពេលទូរទស្សន៍អាមេរិក ចេញវីដេអូ ព្យាករអំពីឥទ្ធិពលរបស់មហាព្យុះសង្ឃរា Milton

ក្នុងកម្មវិធីរបស់ទូរទស្សន៍ Weather Channel​ កាលពីថ្ងៃអង្គារទី៨ខែតុលាឆ្នាំ២០២៤ គេបានមើលឃើញពិធីការិនី Stephanie Abrams កំពុងនិយាយ ដោយមានវីដេអូ 3D នៅខាងក្រោយដែលបង្ហាញពីការព្យាករដ៏រន្ធត់អំពីឥទ្ធិពលវាយប្រហាររបស់មហាព្យុះសង្ឃរា Milton។

ក្នុងវីដេអូដែលនិយាយពីគ្រោះមហន្តរាយនោះ, គេឃើញថា ព្យុះ Milton នឹងបង្កជាគ្រោះទឹកជំនន់ ហូរបោកយ៉ាងសន្ធាប់ កន្លែងខ្លះទឹកហក់ឡើងដល់ទៅកម្ពស់ ៤.៥ម៉ែត្រឯណោះ ជន់លិចផ្ទះសម្បែងនិងបំផ្លាញយានយន្ត ព្រមទាំងបង្កជាគ្រោះមហន្តរាយដ៏សោកនាដកម្មទៀតផង។

មួយថ្ងៃមុននេះ សូម្បីអ្នកឧតុនិយមអាមេរិកមួយរូប ក៏សម្រក់ទឹកភ្នែកតាមកញ្ចក់ទូរទស្សន៍ផងដែរ គ្រាន់តែដឹងថា Milton បានបង្កើនឥទ្ធិពលឡើងដល់កម្រិតទី៥ ក្លាយជា «ព្យុះបិសាច» ដ៏កាចសាហាវបំផុត។

តាមការចុះផ្សាយរបស់ People, លោក John Morales បានសម្រក់ទឹកភ្នែកពេលផ្តល់ព័ត៌មានទាន់ហេតុការណ៍អំពីព្យុះ Milton លើកញ្ចក់ទូរទស្សន៍ WTVJ ដោយនិយាយទាំងភិតភ័យថា «នេះជាព្យុះសង្ឃរាដែលមិនគួរឲ្យជឿនិងមិននឹកស្មានដល់ទាល់តែសោះ។ ឲ្យខ្ញុំសុំទោស នេះដោយសារខ្ញុំរន្ធត់ចិត្តពេក»។

សូមបញ្ជាក់ជាថ្មី ព្យុះកំណាច Milton ជាមួយកម្លាំងខ្យល់២៧០គីឡូម៉ែត្រក្នុងមួយម៉ោង នឹងវាយប្រហាររដ្ឋ Florida ពេញទំហឹងនៅថ្ងៃព្រហស្បតិ៍ ជាពិសេសផ្លូវរបស់ព្យុះនេះគឺចំទីក្រុង ​Tampa តែម្តង ខណៈអភិបាលក្រុង បញ្ជាក់ថា Milton គឺជាព្យុះសង្ឃរាកាចសាហាវបំផុតដែលទីក្រុង Tampa មិនធ្លាប់ជួបប្រទះសោះនៅក្នុងប្រវត្តិសាស្រ្តរយៈពេលជាង១០០ឆ្នាំ។

ដោយសារតែឥទ្ធិពលរបស់ព្យុះនេះ មនុស្សរាប់លាននាក់ត្រូវជម្លៀសជាបន្ទាន់ ខណៈជើងហោះហើររាប់រយជើងទៅនិងមកពីរដ្ឋ Florida ក៏ត្រូវលុបចោលផងដែរ។

យោងតាមទិន្នន័យពី FlightAware, នៅអាកាសយានដ្ឋានអន្តរជាតិ Tampa, ជើងហោះហើរចេញចំនួន១៥៨ជើង ត្រូវលុបចោលកាលពីថ្ងៃអង្គារទី៨ខែតុលា រួមជាមួយនឹងជើងហោះហើរចូលចំនួន១៨៨ ដែលសរុបទៅមានចំនួន ៣៤៦ជើង៕

សូមទស្សនាវីដេអូ៖

អត្ថបទ៖ សុខ សុវណ្ណ

ចុចអាន៖ អ្នកឧតុនិយមអាមេរិក ស្រក់ទឹកភ្នែក ពេលដឹងថា Milton ក្លាយជា «ព្យុះសង្ឃរាបិសាច» សាហាវបំផុត