រកឃើញមនុស្សស្លាប់បន្ថែមទៀត នៅរដ្ឋ Florida ដោយសារព្យុះ Milton

តាមការចុះផ្សាយរបស់ BBC, គិតត្រឹមល្ងាចថ្ងៃសុក្រទី១១ខែតុលាឆ្នាំ២០២៤ តួលេខមនុស្សស្លាប់ដោយសារព្យុះកំណាច Milton នៅសហរដ្ឋអាមេរិក បានកើនដល់១៦នាក់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ មេប៉ូលិសក្រុង Tampa និយាយថា ត្បិតថាព្យុះនេះកន្លងផុតទៅហើយមែន ប៉ុន្តែចំហាយរបស់វានៅតែបន្តទុក្ខវេទនា និងគំរាមកំហែងដល់អាយុជីវិតមនុស្ស ខណៈអាកាសយានដ្ឋានមួយចំនួននៅតែបន្តបិទ ជាពិសេសអាកាសយានដ្ឋានអន្តរជាតិ Sarasota Bradenton តែម្តង។

 ស្របពេលជាមួយគ្នានេះ អាជីវកម្មនិងផ្ទះជាង ២លានខ្នងក៏នៅតែគ្មានអគ្គិសនីនិងទឹកស្អាតប្រើប្រាស់ដែរ។

ជាមួយនឹងក្តីបារម្ភថា អាចមានជនរងគ្រោះដែលគេរកមិនឃើញ, ក្រុមជួយសង្គ្រោះក៏បានបើកប្រតិបត្តិការពិនិត្យតាមផ្ទះ ជាពិសេសនៅតាមតំបន់ដែលមានមនុស្សរស់នៅច្រើន។

ជុំវិញបញ្ហានេះដែរ ប្រធានាធិបតីអាមេរិកលោក ចូ បៃដិន បានជំរុញឲ្យសភា អនុម័តជាបន្ទាន់នូវកញ្ចប់ជំនួយគ្រាអាសន្ន ដើម្បីយកទៅជួយរដ្ឋ Florida។

សូមបញ្ជាក់ជាថ្មី ព្យុះសង្ឃរា Milton បានវាយប្រហាររដ្ឋ Florida ក្នុងនាមព្យុះប្រភេទទី៣ ជាមួយកម្លាំង២០៥គីឡូម៉ែត្រក្នុងមួយម៉ោង ហើយឥទ្ធិពលរបស់វា បង្កើតឲ្យមានខ្យល់កួចយ៉ាងសាហាវ ភ្លៀងផ្គររន្ទះ និងទឹកជំនន់ទូទាំងតំបន់តែម្តង៕

អត្ថបទ៖ សុខ សុវណ្ណ

ចុចអាន៖ ព្យុះ Milton ធ្វើឲ្យផ្អើលសត្វក្រពើ ចេញមកតាមផ្លូវក្នុងរដ្ឋ Florida