លោកស្រី ហារីស មានប្រៀបជាងលោក ត្រាំ ក្រោយចេញលទ្ធផលពិនិត្យសុខភាព

អនុប្រធានាធិបតីសហរដ្ឋអាមេរិក លោកស្រី កាម៉ាឡា ហារីស បានបង្ហាញលទ្ធផលពិនិត្យសុខភាពហើយ ដែលបញ្ជាក់ថា លោកស្រីមានសុខភាពល្អនិងស័ក្តិសមបំផុត ក្នុងការកាន់តំណែងខ្ពស់ ដែលកត្តានេះ ធ្វើឲ្យបេក្ខជនឈរឈ្មោះបោះឆ្នោតខាងគណបក្សប្រជាធិបតេយ្យ មានប្រៀបជាងលោក ត្រាំ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរបាយការណ៍កាលពីថ្ងៃសៅរ៍ទី១២ខែតុលាឆ្នាំ២០២៤ វេជ្ជបណ្ឌិត Joshua Simmons និយាយថា លោកស្រីមានសុខភាពល្អបំផុត បើគិតទាំងរបៀបរស់នៅ របបអាហារ និងការប្រើប្រាស់គ្រឿងស្រវឹងកម្រិតមធ្យម ត្បិតលោកស្រីមានអាឡ័កស៊ីបន្តិចមែន ប៉ុន្តែមិនជាបញ្ហាចោទឡើយ។

លទ្ធផលនេះត្រូវគេមើលឃើញថា នឹងជួយជំរុញក្តីសង្ឃឹមរបស់លោកស្រីហារីស ក្នុងការឆ្ពោះទៅរកជ័យជម្នះនាខែវិច្ឆិកា ព្រោះថា ពេលនេះលោកស្រីមានប្រៀបជាងលោកត្រាំ ទាំងសុខភាព បញ្ញាស្មារតីនិងអាយុ ហើយច្បាស់ណាស់ អ្នកបោះឆ្នោតអាមេរិកជាច្រើនប្រហែលជាអាចផ្លាស់ប្តូរចិត្ត។

ងាកទៅលោក ត្រាំ ឯណោះវិញ, កាលពីខែវិច្ឆិកាឆ្នាំមុន អតីតប្រធានាធិបតីរូបនេះ ក៏បញ្ចេញលទ្ធផលពិនិត្យសុខភាពដែរ ដោយបង្ហាញថា លោកមានសុខភាពល្អទាំងផ្លូវកាយនិងផ្លូវចិត្ត ប៉ុន្តែមិនលម្អិតឡើយ ហើយក៏មិនបញ្ជាក់ពីសម្ពាធឈាម និងកម្រិតកូឡេស្តេរ៉ុលដែរ។

ទោះបីជាយ៉ាងណាក៏ដោយ ឆ្នាំនេះ គេបារម្ភខ្លាំងចំពោះលោក ត្រាំ ក្រោយពេលជួបប្រទះការប៉ុនប៉ងធ្វើឃាតចំនួន២លើក ដោយគេសង្ស័យថាតើ បេក្ខជនឈរឈ្មោះខាងគណបក្សសាធារណរដ្ឋរូបនេះ អាចមានស្ថានភាពផ្លូវចិត្តនឹងនរដែរឬក៏អត់៕

អត្ថបទ៖ សុខ សុវណ្ណ

ចុចអាន៖ ការសិក្សា៖ គោលនយោបាយរបស់ ត្រាំ អាច​បង្កើនបំណុលរដ្ឋទ្វេដង ​ធៀប​នឹង​គោលនយោបាយរបស់​ហារីស