ព្យុះខ្លាំងមួយទៀត នឹងវាយប្រហាររដ្ឋ Florida ចុងសប្តាហ៍នេះ

មជ្ឈមណ្ឌលព្យុះជាតិអាមេរិក ហៅកាត់ NHC បានចេញសេចក្តីប្រកាសព័ត៌មានថា ប្រព័ន្ធព្យុះមួយដែលដំបូងឡើយគេគិតថា មានឥទ្ធិពលមិនខ្លាំងប៉ុន្មាន ពេលនេះស្រាប់តែវិវត្តទៅជាព្យុះត្រូពិក ហើយភ្នាក់ងារឧតុនិយមព្យាករថា នឹងវាយប្រហាររដ្ឋ Florida ក្នុងរយៈពេលប៉ុន្មានថ្ងៃខាងមុខ។

តាមការចុះផ្សាយរបស់សារព័ត៌មាន People នៅថ្ងៃពុធទី១៦ខែតុលាឆ្នាំ២០២៤, ព្យុះនេះមានឈ្មោះ Nadine ដែលទំនងជានឹងវាយប្រហារខ្លាំងលើរដ្ឋ Florida នៅចុងសប្តាហ៍នេះតែម្តង។

ត្បិតតែភ្លាមៗ គេមិនទាន់បញ្ជាក់ថា ព្យុះ Nadine នឹងពាំនាំមកជាមួយនូវកម្លាំងខ្យល់ខ្លាំងកម្រិតណាក៏ដោយ ប៉ុន្តែគេព្យាករថា ប្រព័ន្ធនេះកំពុងរំកិលខ្លួនពីភាគខាងលិចទៅភាគពាយ័ព្យរដ្ឋ Florida ហើយកំពុងសំដៅទៅជិតប្រជុំកោះ Leeward។

ព្យុះ Nadine នឹងវាយប្រហាររដ្ឋ Florida បន្ទាប់ពីរដ្ឋនេះ មិនទាន់ធូរស្រាលបានស្រួលបួលផង ពីឥទ្ធិពលព្យុះចំនួន២ផ្ទួនៗគឺ Helene និង Milton។

សូមបញ្ជាក់ថា ក្នុងខែតុលានេះ ព្យុះសង្ឃរា Milton បានវាយប្រហាររដ្ឋ Florida ក្នុងនាមជាព្យុះសង្ឃរាកម្រិតទី៣ ជាមួយកម្លាំងខ្យល់បក់រហូតដល់១៩៣គីឡូម៉ែត្រក្នុងមួយម៉ោង ហើយបណ្តាលឲ្យមានទឹកជំនន់ធ្ងន់ធ្ងរ និងកាត់ផ្ដាច់ចរន្តអគ្គិសនីនៅទូទាំងរដ្ឋ។

ព្យុះនេះ ក៏សម្លាប់មនុស្សចំនួន១៧នាក់នៅរដ្ឋ Florida ផងដែរ ព្រមទាំងបង្កការខូចខាតយ៉ាងដំណុំដល់ផ្ទះសម្បែងនិងសំណង់ហេដ្ឋារចនាសម្ព័ន្ធនានា។

ដោយឡែក កាលពីខែកញ្ញា រដ្ឋដដែលនេះ ក៏ជួបព្យុះមួយទៀតដែរ ដោយនោះជាព្យុះកម្រិតទី៤ឈ្មោះថា Helene មានកម្លាំងខ្យល់២២៥គីឡូម៉ែត្រក្នុងមួយម៉ោង សម្លាប់មនុស្សចំនួន២២៧នាក់៕

អត្ថបទ៖ សុខ សុវណ្ណ

ចុចអាន៖ ព្យុះខ្លាំងមួយទៀត នឹងវាយប្រហាររដ្ឋ Florida ចុងសប្តាហ៍នេះ