​អ៊ីស្រាអែល​ប្រើ​យន្តហោះ​​១០០គ្រឿង​រួម​ទាំង​ F-35 វាយ​ប្រហារអ៊ីរ៉ង់​​​​នៅថ្ងៃសៅរ៍​នេះ​

កងកម្លាំងការពារ​ជាតិ​អ៊ីស្រាអែល (IDF) បាននិយាយថា យោធាអ៊ីស្រាអែលបាន​ប្រើប្រាស់​​យន្តហោះ​ចម្បាំង​​១០០​គ្រឿង​  ​វាយប្រហារតាមអាកាសទៅលើទីតាំងផលិតកាំជ្រួចរបស់អ៊ីរ៉ង់ និងប្រព័ន្ធ​មីស៊ីល​​លើ​ដី​​របស់​អ៊ីរ៉ុង់​ និង​ត្រឡាប់​ម​ក​កាន់​ប្រទេសវិញ​ដោយ​សុវត្ថិភាព​​។

កងទ័ព​អ៊ីស្រាអែល ​បាន​និយាយ​ថា​ការ​វាយ​ប្រហារ​ត្រូវ​បាន​ធ្វើ​ឡើង​ក្នុង​ការ​ឆ្លើយ​តប​ទៅ​នឹង​ការ​វាយ​ប្រហារ​របស់​អ៊ីរ៉ង់​មក​លើ​អ៊ីស្រាអែល​ក្នុង​ប៉ុន្មាន​ខែ​ចុង​ក្រោយ​នេះ; ការ​វាយ​ប្រហារ​សងសឹកត្រូវបានបញ្ចប់ ហើយបេសកកម្មត្រូវបានបំពេញ។ ទោះជាយ៉ាងណាក៏ដោយ IDF នឹងត្រូវឆ្លើយតបប្រសិនបើអ៊ីរ៉ង់ចាប់ផ្តើមបង្ក​ភាព​តាន​តឹង​ជាថ្មី​ទៀត​។

តាមការ​ចេញ​ផ្សាយ​របស់​ភាគី​អ៊ីរ៉ង់ ​​ផ្ទុយ​ពី​ការ​អះអាង​របស់​អ៊ីស្រាអែល យោធាអ៊ីរ៉ង់បាននិយាយថា គ្រឿងបរិក្ខាររបស់ខ្លួនមួយចំនួននៅក្នុងខេត្ត Tehran, Khuzestan និង Ilam ត្រូវបានរងការវាយប្រហារក៏ពិតមែន ប៉ុន្តែអ៊ីស្រាអែលបានត្រឹមតែអាចបង្កការខូចខាតតិចតួចប៉ុណ្ណោះ។

ទីភ្នាក់ងារសារព័ត៌មាន Tasnim របស់​​អ៊ីរ៉ង់ បានរាយការណ៍ ដោយដកស្រង់ប្រភពដែលមានព័ត៌មានមួយថា ក្រុងតេអេរ៉ង់បានត្រៀមខ្លួនជាស្រេចដើម្បីផ្តល់ការឆ្លើយតបសមាមាត្រទៅនឹងការវាយប្រហាររបស់អ៊ីស្រាអែល​នៅ​ពេល​នោះ​​។

តាមសេចក្តី​រាយការណ៍ អ៊ីស្រាអែល​​​បាន​ប្រើប្រាស់​​យន្ត​ហោះជាង​១០០​គ្រឿង​​រួមទាំងយន្តហោះ F-35 ដ៏ទំនើប ​សម្រាប់​ប្រតិបត្តិការ​​វាយប្រហារ​សងសឹក​​​ក្នុង​ទឹកដី​អ៊ីរ៉ង់​ដែល​មាន​ចម្ងាយ​​ប្រមាណ​២០០០​គីឡូម៉ែត្រ​។

សារព័ត៌មាន​ New York Times របស់​សហរដ្ឋ​អាមេរិក បាននិយាយថា អ៊ីស្រាអែលបានវាយ​ប្រហារ គោលដៅប្រហែល​​២០​​ក្នុង​ទឹក​ដី​អ៊ីរ៉ង់​។

យោធាអ៊ីស្រាអែលបានធ្វើការវាយប្រហារចំនួនបីលើកទៅលើគោលដៅនៅក្នុងប្រទេសអ៊ីរ៉ង់ លោក Barak Ravid អ្នករាយការណ៍នយោបាយសម្រាប់ប្រព័ន្ធផ្សព្វផ្សាយ Axios បាននិយាយដោយដកស្រង់ប្រភព។ ការ​វាយប្រហារ​លើក​ទីមួយផ្តោតលើប្រព័ន្ធការពារដែនអាកាសអ៊ីរ៉ង់ ហើយ​ទីពីរ និងទីបីផ្តោតលើមូលដ្ឋានមីស៊ីល និងយន្តហោះគ្មានមនុស្សបើក និង​មូលដ្ឋាន​​ផលិត​របស់​វា​។

ទីភ្នាក់ងារ​ព័ត៌មាន​អារ៉ាប់​ស៊ីរី (SANA) បាន​រាយការណ៍​ថា កងទ័ព​អ៊ីស្រាអែល​បាន​​វាយ​ប្រហារ​លើ​ទីតាំង​យោធា​នៅ​ភាគ​ខាង​ត្បូង​និង​ភាគ​កណ្តាល​ប្រទេស​ស៊ីរី។ ការការពារដែនអាកាសរបស់ប្រទេសនេះបានបាញ់មីស៊ីលជាច្រើនគ្រាប់។

សារព័ត៌មាន Jerusalem Post បានរាយការណ៍ថា ការវាយប្រហារបឋមរបស់អ៊ីស្រាអែល​សំដៅ​លើគោលដៅរ៉ាដាក្នុងប្រទេសស៊ីរី គឺសំដៅទៅលើ​​​​​ «​​​​​ការ​បង្អាក់​»សមត្ថភាពរបស់អ៊ីរ៉ង់ ដែល​បង្កើន​យ៉ាងឆាប់រហ័សទៅជាការវាយលុកដែលផ្តោតលើទីក្រុងតេអេរ៉ង់ និងទីក្រុងការ៉ាច រដ្ឋធានីរបស់ប្រទេសអ៊ីរ៉ង់ និងទីតាំងយុទ្ធសាស្ត្រមួយផ្សេងទៀត។

​អ៊ីស្រាអែលមិនបានកំណត់គោលដៅនុយក្លេអ៊ែរ និងទីតាំងយុទ្ធសាស្ត្ររបស់អ៊ីរ៉ង់ទេ ទីភ្នាក់ងារសារព័ត៌មាន ShafaqNA របស់អ៊ីរ៉ង់បានរាយការណ៍ដោយបន្ថែមថាមិនមានរបាយការណ៍ពីការ​ស្លាប់​ឬ​របួស​​​នៃ​ជនស៊ីវិល ឬយោធា​នោះទេ​​។

ទីភ្នាក់ងារសារព័ត៌មាន Tasnim បាននិយាយថា អង្គភាពឆ្មាំបដិវត្តន៍អ៊ីស្លាម (IRGC) នៅភាគខាងលិច និងភាគនិរតីនៃទីក្រុង Tehran មិនត្រូវបានវាយប្រហារដោយការវាយប្រហាររបស់អ៊ីស្រាអែលនោះទេ។

ប៉ុស្តិ៍ទូរទស្សន៍ Al Mayadeen ដែលមានមូលដ្ឋាននៅលីបង់បានរាយការណ៍ថា ការវាយប្រហារ​របស់អ៊ីស្រាអែលមិនសំដៅទៅលើទីតាំងប្រេងរបស់អ៊ីរ៉ង់ ឬអាកាសយានដ្ឋានអន្តរជាតិ Imam Khomeini របស់ទីក្រុង Tehran និងអាកាសយានដ្ឋានអន្តរជាតិ Mehrabad ក្នុង​រដ្ឋធានីអ៊ីរ៉ង់នោះទេ។

ជើងហោះហើរទាំងអស់នៅក្នុងប្រទេសអ៊ីរ៉ង់ត្រូវបានលុបចោលរហូតដល់មានការជូនដំណឹងបន្ថែម។

ស្ថានការណ៍នៅទីក្រុងតេអេរ៉ង់ និងទីក្រុងធំៗផ្សេងទៀតរបស់អ៊ីរ៉ង់នៅតែស្ងប់ស្ងាត់ អ្នកនាំពាក្យស្ថានទូតរុស្ស៊ីបាននិយាយថា ស្ថានទូតនៅតែបន្តប្រតិបត្តិការជាធម្មតា៕​

ដោយ រ៉ាន់ រើយ​