ព័ត៌មានអន្ដរជាតិ

របាយការណ៍ថ្មីរបស់អាមេរិក បង្ហាញថា ទ័ពកូរ៉េខាងជើង ៨ ០០០នាក់កំពុងនៅព្រំដែនអ៊ុយក្រែន

បានផុស

១ year មុន

នៅ

ថ្ងៃសុក្រ ១ វិច្ឆិកា ២០២៤

ដោយ

Chheang

របាយការណ៍ថ្មីចុងក្រោយរបស់សហរដ្ឋអាមេរិក បានឲ្យដឹងថា ទាហានចំនួន ៨ ០០០នាក់របស់ក្រុងព្យុងយ៉ាងកំពុងមានវត្តមាននៅលើទឹកដីប្រទេសរុស្ស៊ីកៀកនឹងព្រំដែនអ៊ុយក្រែន ហើយកំពុងត្រៀមខ្លួនជួយវិមានក្រឹមឡាំងប្រឆាំងនឹងក្រុងកៀវនាពេលប៉ុន្មានថ្ងៃខាងមុខ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី១ខែវិច្ឆិកាឆ្នាំ២០២៤។

កងកម្លាំងកូរ៉េខាងជើង / រូបតំណាង (រូបភាព៖ AP)

លោក Antony Blinken រដ្ឋមន្ត្រីការបរទេសអាមេរិក បានប្រាប់ថា ក្នុងចំណោមទាហានទាំង ៨ ០០០នាក់របស់កូរ៉េខាងជើង អាមេរិកមិនទាន់សង្កេតឃើញថាមានកងកម្លាំងណាមួយចូលទៅក្នុងសមរភូមិប្រយុទ្ធជាមួយអ៊ុយក្រែននៅឡើយទេ។ យ៉ាងណា លោកបានបន្ថែមថា អាមេរិករំពឹងថា ទាហានកូរ៉េខាងជើងនឹងចូលខ្លួនប្រយុទ្ធលើសមរភូមិនាពេលឆាប់ៗខាងមុខ។

លោក Blinken បានបន្តថា រុស្ស៊ីបាននិងកំពុងបង្វឹកទាហានកូរ៉េខាងជើងឲ្យប្រើប្រាស់កាំភ្លើងធំ ដ្រូន និងមូលដ្ឋាននៃប្រតិបត្តិការថ្មើរជើង ដែលង្ហាញថា រុស្ស៊ីមានគោលបំណងយ៉ាងច្បាស់ក្រឡែតក្នុងការប្រើប្រាស់កម្លាំងទាំងនោះឲ្យចូលទៅបម្រើការនៅជួរមុខ។

កន្លងមក អាមេរិកធ្លាប់ប៉ាន់ស្មានថាមានទាហានកូរ៉េខាងជើងប្រមាណ ១ម៉ឺននាក់នៅរុស្ស៊ី។ ចំណែកឯ កូរ៉េខាងត្បូង និងសម្ព័ន្ធមិត្តរបស់ខ្លួន បានប៉ាន់ស្មានថាមាន ១១ ០០០នាក់ ខណៈអ៊ុយក្រែនវិញ ថាមានដល់ទៅ ១២ ០០០នាក់។

ការរឹតបន្តឹងទំនាក់ទំនងរវាងក្រុងព្យុងយ៉ាង និងក្រុងមូស្គូ បានបង្កជាក្ដីព្រួយបារម្ភខ្លាំងនៅជុំវិញពិភពលោកថាអាចបណ្ដាលឲ្យសង្គ្រាមរីករាលដាលកាន់តែធំឡើង ព្រោះតែវាមានឱកាសខ្ពស់ដែលថា កូរ៉េខាងជើងនឹងស្នើសុំការបញ្ជូនបច្ចេកវិទ្យាពីរុស្ស៊ីជួយដល់កម្មវិធីអាវុធរបស់ខ្លួន រួមទាំងសព្វាវុធនុយក្លេអ៊ែរ មីស៊ីលប៉ាលិស្ទិកអន្តរទ្វីប និងផ្កាយរណបឈ្លបការណ៍ សម្រាប់ជាថ្នូរនឹងការដាក់ពង្រាយកងកម្លាំងរបស់ខ្លួនជួយរុស្ស៊ីប្រឆាំងអ៊ុយក្រែន៕

ដោយ៖ ឈាង

ចុចអាន៖ កូរ៉េខាងត្បូង ប្រាប់ថា ខ្លួននឹងមិនបញ្ជូនទ័ពជួយអ៊ុយក្រែននោះទេ