មេដឹកនាំបរទេស២រូប អបអរលោក ត្រាំ មុនគេ ក្រោយជាប់ឆ្នោត

ប្រធានាធិបតីអែលសាល់វ៉ាឌ័រ លោក Nayib Bukele គឺជាមេដឹកនាំបរទេសដំបូងគេ ដែលផ្ញើសារអបអរសាទរលោក ដូណាល់ ត្រាំ ក្នុងឱកាសអ្នកខាងគណបក្សសាធារណរដ្ឋរូបនេះ ជាប់ឆ្នោតក្លាយជាប្រធានាធិបតីទី៤៧របស់សហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Nayib Bukele បានបង្ហោះសារលើបណ្តាញសង្គម X ភ្លាមៗក្រោយលោកត្រាំប្រកាសជ័យជម្នះនៅថ្ងៃពុធទី៦ខែវិច្ឆិកាឆ្នាំ២០២៤ ថា «សូមអបអរសាទរប្រធានាធិបតីជាប់ឆ្នោតអាមេរិកលោក ដូណាល់ ត្រាំ។ សូមព្រះអម្ចាស់ប្រទានពរនិងថែរក្សាអ្នក»។

ក្រោយពីលោក Bukele, មេដឹកនាំអន្តរជាតិទី២ដែលអបអរលោក ត្រាំ គឺនាយករដ្ឋមន្ត្រីហុងគ្រី Viktor Orban ដែលបង្ហោះលើ Facebook​ ថា «លោក ត្រាំ បានទទួលជ័យជម្នះយ៉ាងត្រចះត្រចង់»។ 

សូមបញ្ជាក់ថា លោក ត្រាំ បានក្លាយជាប្រធានាធិបតីអាមេរិកទី២ក្នុងប្រវត្តិសាស្រ្ត ដែលឈ្នះឆ្នោតពីរអាណត្តិប៉ុន្តែមិនជាប់គ្នា បន្ទាប់ពី Grover Cleveland ដែលឈ្នះបែបនេះដែរ ក្នុងឆ្នាំ១៨៩២។

តាមសេចក្តីរាយការណ៍របស់ Fox News នៅថ្ងៃពុធទី៦ខែវិច្ឆិកាឆ្នាំ២០២៤, គិតត្រឹមម៉ោង២រសៀល (ម៉ោងនៅកម្ពុជា) លោក ត្រាំ ទទួលបានអង្គបោះឆ្នោតចំនួន២៧៧ ពោលគឺលើសចំនួន២៧០ដែលត្រូវការ ខណៈលោកស្រី កាម៉ាឡា ហារីស នៅខាងគណបក្សប្រជាធិបតេយ្យ រកបានត្រឹម២២៦ប៉ុណ្ណោះ។

ពិភពលោក កំពុងរង់ចាំមើលថាតើ ការដឹកនាំរបស់លោក ត្រាំ សម្រាប់អាណត្តិទី២នេះ នឹងមានអ្វីកើតឡើងខ្លះ ហើយអាចជួយសហរដ្ឋអាមេរិកបានដល់កម្រិតណា។ 

គេក៏កំពុងរង់ចាំមើលផងដែរថាតើលោក ត្រាំ នឹងមានវិធីសាស្រ្តដើម្បីកាត់បន្ថយការឡើងកម្តៅនៃជម្លោះសកលលោក ជាពិសេសលោកធ្លាប់អះអាងថា នឹងបញ្ចប់សង្គ្រាមរុស្ស៊ី-អ៊ុយក្រែន ក្នុងរយៈពេលត្រឹម២៤ម៉ោងប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ ត្រាំ គឺជាប្រធានាធិបតីអាមេរិកទី២ក្នុងប្រវត្តិសាស្រ្ត ដែលឈ្នះឆ្នោតពីរអាណត្តិ ប៉ុន្តែមិនជាប់គ្នា