អ៊ីស្រាអែល អនុម័តច្បាប់ និរទេសគ្រួសារនិងសាច់ញាតិ ជនល្មើសភេរវកម្ម

ប្រទេសអ៊ីស្រាអែល បានបង្កើតរឿងចម្រូងចម្រាស់ជាថ្មីនិងបង្កការរិះគន់ខ្លាំងៗពីសំណាក់អង្គការសិទ្ធិមនុស្ស បន្ទាប់ពីរដ្ឋសភា បានអនុម័តច្បាប់មួយ ដែលនឹងអនុញ្ញាតឲ្យរដ្ឋាភិបាល និរ​ទេសសមាជិកគ្រួសាររបស់ជនប្រព្រឹត្តបទល្មើសភេរវកម្ម ខណៈច្បាប់នេះត្រូវគេមើលឃើញថា កំណត់មុខសញ្ញាលើពលរដ្ឋអ៊ីស្រាអែល មានដើមកំណើតប៉ាឡេស្ទីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ច្បាប់នេះ ត្រូវបានអនុម័តជាមួយសំឡេង ៦១ទល់៤១ ប៉ុន្តែក្រុមអ្នកជំនាញ ជឿថា តុលាការអ៊ីស្រាអែល ប្រហែលមិនព្រមលើដំណើរការនេះឡើយ។

តាមការចុះផ្សាយរបស់ BBC នៅថ្ងៃសុក្រទី៨ខែវិច្ឆិកា, ច្បាប់ដែលស្នើឡើងដោយគណបក្ស Likud របស់លោកនាយករដ្ឋមន្ត្រី Benjamin Netanyahu ​បានចែងថា ឪពុកម្តាយ កូនៗ ឬបងប្អូនបង្កើត ដែលដឹងមុនថាសមាជិកគ្រួសាររបស់ពួកគេមានគម្រោងរៀបចំការវាយប្រហារ ហើយមិនព្រមរាយការណ៍ទៅប៉ូលិសឬគាំទ្រទង្វើបែបនេះនោះ ពួកគេនឹងប្រឈមការនិរទេសពី៧ទៅ២០ឆ្នាំ។

លើសពីនេះ សាច់ញាតិអ្នកដែលសរសើរ អាណិតឬលើកទឹកចិត្តចំពោះអំពើភេរវកម្ម ឬអង្គការភេរវកម្ម ក៏អាចត្រូវនិរទេសដូចគ្នា។ 

ក្រសួងមហាផ្ទៃ ជាអ្នកទទួលបន្ទុកការនិរទេសនេះ ហើយអ្នកទាំងនោះ ត្រូវបានគេគិតថានឹងនិរទេសទៅកាន់តំបន់ហ្គាហ្សា ឬទីតាំងដែលគេកំណត់។

ទោះបីជាយ៉ាងណាក៏ដោយ លោក Eran Shamir-Borer អ្នកស្រាវជ្រាវជាន់ខ្ពស់នៅវិទ្យាស្ថានប្រជាធិបតេយ្យអ៊ីស្រាអែល និងជាអតីតអ្នកជំនាញច្បាប់អន្តរជាតិសម្រាប់យោធាអ៊ីស្រាអែល បានប្រាប់ទៅសារព័ត៌មាន AP​ ថា «ការនិរទេសពលរដ្ឋអ៊ីស្រាអែល អាចត្រូវគេមើលឃើញថា មិនត្រឹមតែជាការរំលោភលើសិទ្ធិរដ្ឋធម្មនុញ្ញនៅក្រោមច្បាប់អ៊ីស្រាអែលប៉ុណ្ណោះទេ ប៉ុន្តែក៏ជាការរំលោភសិទ្ធិមនុស្សក្រោមច្បាប់អន្តរជាតិផងដែរ»។

សូមបញ្ជាក់ថា ប្រជាជនប៉ាឡេស្ទីនរស់នៅអ៊ីស្រាអែល មានប្រហែល២០% នៃចំនួនប្រជាជនសរុបរបស់ប្រទេសនេះ។ ពួកគេមានសញ្ជាតិនិងសិទ្ធិបោះឆ្នោត ប៉ុន្តែប្រឈមមុខនឹងការរើសអើងយ៉ាងខ្លាំង។ ពួកគេជាច្រើន ក៏មានទំនាក់ទំនងជិតស្និទ្ធជាមួយអ្នកនៅប៉ាឡេស្ទីនផងដែរ ហើយតែងបង្ហាញក្តីអាណិតអាសូរចំពោះទឹកដីកំណើតរបស់ពួកគេជានិច្ច៕

អត្ថបទ៖ សុខ សុវណ្ណ

ចុចអាន៖ ដឹង​លោក ត្រាំ ជាប់ឆ្នោត​ភ្លាម លោក Netanyahu ខល​​ទៅ​និយាយពី​រឿង​អ៊ីរ៉ង់​ភ្លែត