ជិតផុតអាណត្តិ លោក ចូ បៃដិន លើកលែងទោសឲ្យកូនប្រុស

ប្រធានាធិបតីអាមេរិកជិតផុតអាណត្តិ លោក ចូ បៃដិន បានលើកលែងទោសឲ្យកូនប្រុស ហាន់ធើ ដែលត្រូវកាត់ទោសនៅឆ្នាំនេះ លើបទចោទប្រកាន់ចំនួន៣ករណី ពាក់ព័ន្ធការកាន់កាប់អាវុធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុង​សេចក្តីថ្លែងការណ៍​កាលពី​ល្ងាច​ថ្ងៃអាទិត្យទី១ខែធ្នូឆ្នាំ២០២៤ លោក​ប្រធានាធិបតី​ប្រកាស​ថា ​កូនប្រុស​របស់គាត់​ត្រូវគេ​កាត់ទោស​ដោយ​អយុត្តិធម៌បំផុត ព្រោះតែ​ទំនាក់ទំនង​គ្រួសារ​របស់គាត់​។ អ្នកខ្លះ​ស្ទើរតែ​គ្មានការកាត់ទោស​ផងលើ​បទ​ឧក្រិដ្ឋ​បែបនេះ ប៉ុន្តែនេះបង្ហាញយ៉ាងច្បាស់ថា ហាន់ធើ ត្រូវគេធ្វើដាក់ ខុសពីអ្នកដទៃ។

ការសម្រេចចិត្តរបស់លោកបៃដិនពេលនេះ គឺផ្ទុយការប្តេជ្ញាចិត្តរបស់លោកកាលពីខែមិថុនា ដែលបង្ហាញឆន្ទៈថា លោកគ្មានថ្ងៃលើកលែងទោសដល់កូនប្រុសម្នាក់នេះឡើយ។

ពេលនោះ លោកបានឆ្លើយតបសំណួរអ្នកកាសែត ក្នុងអំឡុងកិច្ចប្រជុំ G7 នៅឯភាគខាងត្បូងប្រទេសអ៊ីតាលីថា “ខ្ញុំពេញចិត្តចំពោះនីតិវិធីច្បាប់ ហើយខ្ញុំនឹងមិនធ្វើអ្វីទាំងអស់។ ខ្ញុំគោរពតាមសេចក្តីសម្រេចរបស់គណៈវិនិច្ឆ័យ ហើយខ្ញុំនឹងមិនលើកលែងទោសដល់កូនឡើយ”។ 

លោក ហាន់ធើ ត្រូវបានតុលាការរដ្ឋ Delaware ចោទប្រកាន់ពីបទកុហកលើពាក្យស្នើសុំទិញកាំភ្លើងក្នុងឆ្នាំ២០១៨ ដោយបន្លំថា គាត់មិនមែនជាអ្នកញៀនថ្នាំទាំងដែលពេលនោះ គាត់កំពុងប្រើប្រាស់កូកាអ៊ីន ប៉ុន្តែកូនប្រុសលោកបៃដិនរូបនេះ អះអាង​ថា គាត់​គ្មាន​កំហុសទេ ព្រោះគាត់​កំពុងសម្រាកកែប្រែដើម្បីផ្តាច់គ្រឿងញៀននៅពេលនោះ។

ជុំវិញដំណើរការនោះដែរ លោក ហាន់ធើ បានក្លាយជាកូនប្រុសប្រធានាធិបតីកំពុងកាន់តំណែងដំបូងគេក្នុងប្រវត្តិសាស្រ្តអាមេរិក ដែលត្រូវបានកាត់ទោសនៅក្នុងតុលាការសហព័ន្ធ៕

អត្ថបទ៖ សុខ សុវណ្ណ

ចុចអាន៖ លោកបៃដិន ប្តេជ្ញាមិនលើកលែងទោសឲ្យ កូនប្រុស