សាលក្រមចុងក្រោយ! គ្មានការលើកលែងទោសប្រហារជីវិតឡើយ ចំពោះអតីតសេដ្ឋិនីវៀតណាម ករណីឆបោក

បន្ទាប់ពីសវនាការនិងការពិភាក្សាអស់រយៈពេលជិតមួយខែ ទីបំផុតតុលាការប្រជាជនជាន់ខ្ពស់ទីក្រុងហូជីមិញ បានប្រកាសសាលក្រមចុងក្រោយនៃបណ្តឹងសាទុក្ខទាក់ទងនឹងញត្តិសុំបន្ថយទោសប្រហារជីវិតអ្នកស្រី Truong My Lan រួមជាមួយបណ្តឹងឧទ្ធរណ៍របស់ជនជាប់ចោទ៤៧នាក់ផ្សេងទៀត ទាក់ទងនឹងករណីសូកប៉ាន់ ឆបោក និងពុករលួយជាប្រព័ន្ធលើធនាគារ Saigon Commercial Bank «SCB»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ VN Express នៅថ្ងៃអង្គារទី៣ខែធ្នូឆ្នាំ២០២៤, តុលាការប្រកាសថា គ្មានហេតុផលអាចទទួលយកបានណាមួយ ដែលត្រូវបន្ធូរបន្ថយទោសប្រហារជីវិតអតីតសេដ្ឋិនីវៀតណាមរូបនេះឡើយ ព្រោះថា ទង្វើរបស់អ្នកស្រី Lan ពិតជាបង្កឲ្យមានផលវិបាកធ្ងន់ធ្ងរពេកហើយ។

យ៉ាងណាក្តី ក៏អាចមានឱកាសស្តួចស្តើងបំផុតផងដែរ ក្នុងការជួយឲ្យអ្នកស្រីបានថយទោសមកនៅជាប់ពន្ធនាគារអស់មួយជីវិត ក្នុងករណីអ្នកស្រី អាចសងសំណង ៣ភាគ៤ នៃការខូចខាត។

ក្នុងនាមជាប្រធានក្រុមហ៊ុន Van Thinh Phat, អ្នកស្រី Lan បានគ្រប់គ្រងដោយប្រយោល នូវភាគហ៊ុន៩១.៥% ក្នុងធនាគារ SCB តាមរយៈបុគ្គលជាច្រើន ហើយបញ្ជាឲ្យថ្នាក់ដឹកនាំធនាគារ អនុម័តប្រាក់កម្ចីសម្រាប់ក្រុមហ៊ុននៅក្នុងប្រព័ន្ធអេកូឡូស៊ីរបស់ Van Thinh Phat ដូច្នេះ លោកស្រីអាចដកប្រាក់ពីធនាគារបាន។

លើសពីនេះ អ្នកស្រីបានបញ្ជាឲ្យមន្ត្រី SCB ផ្ទេរប្រាក់ទៅឲ្យក្រុមហ៊ុនក្លែងក្លាយ ហើយបន្ទាប់មកបង្វិលប្រាក់ឬដកជាសាច់ប្រាក់ ដើម្បីបិទបាំងកំហុសរបស់ខ្លួន។

ចាប់ពីឆ្នាំ២០១២ ដល់ឆ្នាំ២០២២ អ្នកស្រី Lan និងបក្ខពួក បានទទួលប្រាក់កម្ចីចំនួន ២ ៥០០លើកនិងបណ្តាលឲ្យធនាគារខាតបង់ជាទឹកប្រាក់ ៦៧៧ទ្រីលានដុង ហើយដើម្បីបិទបាំងអំពើខុសឆ្គងនៅ SCB អ្នកស្រី Lan ក៏បញ្ជាឲ្យមន្ត្រីក្រោមឱវាទ ទៅសូកប៉ាន់សវនករនៃធនាគាររដ្ឋវៀតណាម «SBV» ថែមទៀត។

ជាលទ្ធផល អធិការធនាគារកណ្តាល Do Thi Nhan បានទទួលសំណូក ៥.២ លានដុល្លារចំណែកថៅកែឈ្មោះ Nguyen Van Hung ដែលជាអធិការរងនៃ SBV បានទទួលសំណូក៣០០ ០០០ដុល្លារ។

សូមបញ្ជាក់ សវនាការដ៏ល្បីរន្ទឺរបស់អ្នកស្រី Lan គឺជាផ្នែកមួយនៃយុទ្ធនាការប្រឆាំងអំពើពុករលួយទ្រង់ទ្រាយធំ ដែលត្រូវបានអនុវត្តចាប់តាំងពីឆ្នាំ២០១៦មក ដោយអគ្គលេខាធិការបក្សកុម្មុយនិស្តវៀតណាម។

យុទ្ធនាការដែលគេឲ្យឈ្មោះថា “ឡដុតរំលាយ” នេះ បានបណ្តាលឲ្យប្រធានាធិបតីពីររូប ឧបនាយករដ្ឋមន្ត្រីពីររូប និងមន្ត្រីរដ្ឋាភិបាល ព្រមទាំងនាយកប្រតិបត្តិអាជីវកម្មរាប់ពាន់នាក់ផ្សេងទៀត ត្រូវបានបណ្តេញចេញពីតំណែង ពិន័យ ឬជាប់គុកពីបទប្រព្រឹត្តអំពើពុករលួយ៕

អត្ថបទ៖ សុខ សុវណ្ណ

ចុចអាន៖ ទីបំផុត តុលាការវៀតណាម កាត់ទោសប្រហារជីវិត អតីតសេដ្ឋិនី ពីបទឆបោកប្រាក់