កម្មករ​១៣​នាក់​បាត់​ខ្លួន​ក្នុងហេតុការណ៍បាក់​ដីនៅភាគខាងត្បូងចិន

កម្មករចំនួន១៣ នាក់ដែលបាត់ខ្លួនបន្ទាប់ពីការដ្ឋានសាងសង់ផ្លូវដែកមួយបានបាក់នៅទីក្រុង Shenzhen ខេត្ត Guangdong ភាគខាងត្បូងប្រទេសចិន។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី០៥ខែធ្នូនេះ។

សេចក្តី​ថ្លែងការណ៍​របស់​ការិយាល័យ​គ្រប់​គ្រង​គ្រាអាសន្ន​បានឲ្យដឹងថា​ហេតុការណ៍នេះបាន​កើត​ឡើង​នៅ​ម៉ោង​ប្រហែល ១១ យប់ លើការដ្ឋាន​សំណង់​មួយ​នៅ​ផ្នែក​មួយ​នៃ​ផ្លូវ​រថភ្លើង Shenzhen-Jiangmen ក្នុង​ស្រុក Bao’an។ ផ្លូវនេះជាខ្សែដែលនឹងតភ្ជាប់ទីក្រុង Shenzhen ជាមជ្ឈមណ្ឌលបច្ចេកវិទ្យា និងទីក្រុង Jiangmen ដែលទាំងពីរស្ថិតនៅក្នុងខេត្ត Guangdong ជិតទីក្រុងហុងកុង។

ប្រតិបត្តិការជួយសង្គ្រោះទាំងអស់ត្រូវបានចាប់ផ្តើម ហើយក្រសួងគ្រប់គ្រងគ្រាអាសន្នបានបញ្ជូនក្រុមការងារដើម្បីដឹកនាំបេសកកម្មជួយសង្គ្រោះ។ ជាមួយគ្នានេះប្រជាពលរដ្ឋដែលរស់នៅក្បែរនោះត្រូវបានជម្លៀសចេញ ខណៈការស៊ើបអង្កេតលើមូលហេតុកំពុងដំណើរការ។ បើតាមទូរទស្សន៍រដ្ឋ CCTV បានរាយការណ៍ថា ផ្លូវមួយចំនួនត្រូវបានបិទក្នុងអំឡុងពេលប្រតិបត្តិការផងដែរ។

គួរបញ្ជាក់ថាប្រទេសចិនបានមានហេតុការណ៍បាក់រលំផ្លូវហាយវេ និងស្ពានដែលបានសម្លាប់មនុស្សរាប់សិបនាក់កាលពីដើមឆ្នាំនេះ។ ការបាក់រលំទាំងនេះបានធ្វើឲ្យមានការចោទជាសំណួរអំពីសុវត្ថិភាពនៃហេដ្ឋារចនាសម្ព័ន្ធផ្លូវថ្នល់ និងស្ពានរបស់ប្រទេសចិន ដែលត្រូវបានសាងសង់យ៉ាងឆាប់រហ័សក្នុងប៉ុន្មានទសវត្សរ៍ថ្មីៗនេះ៕

អត្ថបទ៖ ប៊ុន សុភាព