ព័ត៌មានអន្ដរជាតិ

អាមេរិករឹបអួសទ្រព្យរុស្ស៊ី២០ពាន់លានដុល្លារប្រគល់ឲ្យអ៊ុយក្រែន

បានផុស

៦ ខែ មុន

នៅ

ថ្ងៃពុធ ១១ ធ្នូ ២០២៤

ដោយ

សហរដ្ឋអាមេរិកបានផ្តល់ប្រាក់ចំនួន២០ពាន់លានដុល្លារដល់អ៊ុយក្រែន ដែលជាមូលនិធិបានពីការរឹបអូសទ្រព្យសម្បត្តិរបស់រុស្ស៊ីនៅក្រៅប្រទេស ក្រោយរដ្ឋាភិបាលបរទេសបង្កកក្រោមទណ្ឌកម្មប្រឆាំងរុស្ស៊ីដែលលើកទ័ពឈ្លានពានអ៊ុយក្រែន។ យោងសារព័ត៌មាន BBC នៅថ្ងៃទី១១ខែធ្នូនេះ។

ការគាំទ្រផ្នែកសេដ្ឋកិច្ចនេះបានមកពីកញ្ចប់៥០ពាន់លានដុល្លារ ដែលយល់ព្រមដោយប្រទេសសមាជិកប្រទេសអភិឌ្ឍន៍ឧស្សាហកម្មទាំង៧ ហៅកាត់ថា «G7» ដែលបានប្រកាសកាលពីខែមិថុនា។ រដ្ឋមន្ត្រីក្រសួងរតនាគារអាមេរិក លោកស្រី Janet Yellen បាននិយាយថា ការផ្តល់មូលនិធិជំនួយតាមរយៈទ្រព្យសម្បត្តិដែលបង្កកមានន័យថា រុស្ស៊ីត្រូវតែ «ទទួលបន្ទុកនៃសង្គ្រាមខុសច្បាប់របស់ខ្លួន ជំនួសឱ្យអ្នកបង់ពន្ធ» ។

ការផ្ដល់នេះបានកើតឡើងប៉ុន្មានសប្តាហ៍មុនពេលប្រធានាធិបតីអាមេរិកលោក ចូ បៃដិន ត្រូវបានជំនួសដោយលោក ដូណាល់ ត្រាំ ដែលបាននិយាយថាគាត់ចង់បញ្ចប់សង្រ្គាមនៅអ៊ុយក្រែនយ៉ាងឆាប់រហ័សនៅពេលឡើងកាន់តំណែង ខណៈប្រធានាធិបតីទើបជាប់ឆ្នោតថាការគាំទ្រផ្នែកហិរញ្ញវត្ថុដល់ទីក្រុង គៀវ ថាជាការខ្ចះខ្ចាយធនធានរបស់សហរដ្ឋអាមេរិក ដោយធ្វើឱ្យមានការងឿងឆ្ងល់ថាតើជំនួយនឹងបន្តនៅក្រោមរដ្ឋបាលថ្មីដែរឬទេ។

មានការពន្យារពេលជាច្រើនខែ ចំពេលមានជម្លោះនយោបាយនៅក្នុងសភាតំណាងរាស្រ្ត មុនពេលជំនួយយោធាចំនួន ៦១ ពាន់លានដុល្លារសម្រាប់អ៊ុយក្រែនត្រូវបានអនុម័តនៅក្នុងខែមេសា។ G7 យល់ព្រមផ្តល់ប្រាក់កម្ចី ៥០ ពាន់លានដុល្លារសម្រាប់អ៊ុយក្រែនពីទ្រព្យសម្បត្តិរបស់រុស្ស៊ី។

បន្ទាប់ពីការពិភាក្សាជាច្រើនខែក្នុងរវាងសហរដ្ឋអាមេរិក និងសម្ព័ន្ធមិត្តរបស់ខ្លួន រួមទាំងសហភាពអឺរ៉ុបផងដែរ អំពីរបៀបប្រើប្រាស់ទ្រព្យសម្បត្តិដែលមានតម្លៃប្រហែល ៣២៥ ពាន់លានដុល្លារដែលត្រូវបានជាប់គាំងចាប់តាំងពីការឈ្លានពានពេញលេញរបស់រុស្ស៊ីលើអ៊ុយក្រែនបានចាប់ផ្តើមនៅឆ្នាំ ២០២២ ។ នៅក្នុងខែតុលា G7 បានយល់ព្រមប្រើការប្រាក់ដែលបង្កើតដោយទ្រព្យសម្បត្តិ ប្រហែល ៣ ពាន់លានដុល្លារក្នុងមួយឆ្នាំ ដើម្បីផ្តល់មូលនិធិ ៥០ ពាន់លានដុល្លារជាឥណទានក្នុងរយៈពេល ៣០ ឆ្នាំ ខណៈការទូទាត់ត្រូវបានរំពឹងថានឹងចាប់ផ្តើមនៅចុងឆ្នាំនេះ។

លោកស្រី Yellen បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា ទឹកប្រាក់ចំនួន ២០ ពាន់លានដុល្លារនឹងផ្តល់ឱ្យប្រទេសអ៊ុយក្រែននូវការបញ្ចូលដ៏សំខាន់នៃការគាំទ្រការពារខ្លួន ប្រឆាំងនឹងសង្រ្គាមឈ្លានពាន ហើយទឹកប្រាក់ចំនួន ៥០ ពាន់លានដុល្លារគឺមានបំណងដើម្បីធានាថាអ៊ុយក្រែនមាន «ធនធានដែលវាត្រូវការដើម្បីទ្រទ្រង់សេវាសង្គ្រោះបន្ទាន់ មន្ទីរពេទ្យ និងមូលដ្ឋានគ្រឹះផ្សេងទៀត»៕

អត្ថបទ៖ ប៊ុន សុភាព