ព័ត៌មានអន្ដរជាតិ

រុស្ស៊ី ប្រាប់ពលរដ្ឋខ្លួនកុំឲ្យធ្វើដំណើរទៅកាន់សហរដ្ឋអាមេរិក និងលោកខាងលិច

បានផុស

១ ខែ មុន

នៅ

ថ្ងៃព្រហស្បតិ៍ ១២ ធ្នូ ២០២៤

ដោយ

Chheang

រុស្ស៊ី បានប្រកាសកាលពីថ្ងៃទី១១ខែធ្នូឆ្នាំ២០២៤ថា ពលរដ្ឋរុស្ស៊ីមិនគួរធ្វើដំណើរទៅសហរដ្ឋអាមេរិក កាណាដា និងបណ្ដាប្រទេសសហភាពអឺរ៉ុបមួយចំនួន នៅក្នុងរយៈពេលប៉ុន្មានសប្តាហ៍ខាងមុខទេ ពីព្រោះពួកគេអាចត្រូវបានចាប់ខ្លួនដោយអាជ្ញាធរអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Maria Zakharova អ្នកនាំពាក្យក្រសួងការបរទេសរុស្ស៊ី បាននិយាយថា៖ «នៅក្នុងបរិបទនៃការប្រឈមមុខដាក់គ្នាកាន់តែខ្លាំងឡើងក្នុងទំនាក់ទំនងរុស្ស៊ី-អាមេរិក ដែលកំពុងតែឈានទៅរកការប្រេះឆាដោយសារតែកំហុសរបស់ទីក្រុងវ៉ាស៊ីនតោន ការធ្វើដំណើរទៅកាន់សហរដ្ឋអាមេរិកជាលក្ខណៈឯកជន ឬក្រៅផ្លូវការចាំបាច់គឺពោរពេញដោយហានិភ័យធ្ងន់ធ្ងរ។ យើងជំរុញឲ្យអ្នកបន្តបដិសេធការធ្វើដំណើរទៅកាន់សហរដ្ឋអាមេរិក និងរដ្ឋរណបសម្ព័ន្ធមិត្តរបស់ខ្លួន នៅអំឡុងពេលថ្ងៃឈប់សម្រាក ដែលមានដូចជា ដំបូងគេគឺ កាណាដា និងបណ្តាប្រទេសសហភាពអឺរ៉ុប លើកលែងប្រទេសមួយចំនួន»។

ចំណែកឯសហរដ្ឋអាមេរិកឯណោះវិញក៏បានណែនាំពលរដ្ឋរបស់ខ្លួន ប្រឆាំងនឹងការធ្វើដំណើរទៅកាន់ប្រទេសរុស្ស៊ីផងដែរ ដោយនិយាយថា «ពួកគេអាចប្រឈមមុខនឹងការយាយី ឬការឃុំឃាំងដោយមន្ត្រីសន្តិសុខរុស្ស៊ី» ឬ «ការអនុវត្តច្បាប់ក្នុងស្រុកតាមតែអំពើចិត្ត»។

ទំនាក់ទំនងរុស្ស៊ី និងអាមេរិកកាន់តែអាក្រក់ឡើងជាងពេលណាណាទាំងអស់ គិតចាប់តាំងពីវិបត្តិមីស៊ីលគុយបាឆ្នាំ១៩៦២ ដោយសារតែការប្រឈមមុខដាក់គ្នាជុំវិញសង្រ្គាមនៅអ៊ុយក្រែន។

ទាំងទីក្រុងមូស្គូ និងទីក្រុងវ៉ាស៊ីនតោន បានចង្អុលមុខដាក់គ្នាទៅវិញទៅមក ពីការឃុំឃាំងពលរដ្ឋ ក្រោមការចោទប្រកាន់ដែលគ្មានមូលដ្ឋានច្បាស់លាស់។

កាលពីខែសីហា រុស្ស៊ី បានដោះលែងពលរដ្ឋអាមេរិក៣នាក់ ក្នុងនោះមានអ្នកកាសែតម្នាក់ឈ្មោះ Evan Gershkovich ដោយមានការសម្របសម្រួលពីតួកគី រួមជាមួយប្រទេសលោកខាងលិច។

ជាផ្នែកមួយនៃកិច្ចព្រមព្រៀង សហរដ្ឋអាមេរិក ក៏បានដោះលែងអ្នកទោសរុស្ស៊ីផងដែរ រួមមាន ពាណិជ្ជករម្នាក់ឈ្មោះ Vladislav Klyushin ដែលត្រូវបានកាត់ទោសនៅក្នុងគម្រោងបោកប្រាស់, លោក Roman Seleznev កូនប្រុសរបស់សមាជិកសភារុស្ស៊ីម្នាក់ ជាប់គុកពីបទពាក់ព័ន្ធក្នុងការវាយប្រហារតាមអ៊ីនធឺណិត និងលោក Vadim Konoshchenok មន្ត្រីសន្តិសុខរុស្ស៊ីដែលត្រូវបានចាប់ខ្លួននៅប្រទេសអេស្តូនី និងធ្វើបត្យាប័នទៅសហរដ្ឋអាមេរិក៕

ដោយ៖ ឈាង