ស្លាប់​មេ​ប៉ូលិស​នៅ​ហ្គាហ្សា ក្រោយ​អ៊ីស្រាអែល​ទម្លាក់​គ្រាប់បែក

ជនជាតិ​ប៉ាឡេស្ទីន​យ៉ាង​ហោច​ណាស់ ៦៨​នាក់ ក្នុង​នោះ​មាន​ទាំង​មេ​ប៉ូលិស និង​អនុ​ប្រធាន​កង​កម្លាំង​សន្តិសុខ​​​នៅ​តំបន់​ហ្គាហ្សា​ផង​ដែរ បាន​បាត់បង់​ជីវិត បន្ទាប់​ពី​ការ​វាយ​ប្រហារ​តាម​ដែន​អាកាស​របស់​អ៊ីស្រាអែល​កាល​ពី​ថ្ងៃ​ទី​២​ខែ​មករា​​ឆ្នាំ​២០២៥។

យោង​តាម​អាជ្ញាធរ​ហ្គាហ្សា មេ​ប៉ូលិស​ដែល​បាន​ស្លាប់ មាន​ឈ្មោះ​ថា Mahmoud Salah និង​អនុ​ប្រធាន​កង​កម្លាំង​សន្តិសុខ​​មា​ន​ឈ្មោះ​ Hussam Shahwan។ មុន​ការ​វាយ​ប្រហារ​ អ្នក​ទាំង​ពីរ​កំពុងត្រួតពិនិត្យ​ប្រជាជន​នៅក្នុងជំរុំ​តំបន់ Al-Mawasi ដែល​ត្រូវបានគេចាត់​ទុក​ថាជាតំបន់មនុស្សធម៌សម្រាប់ជនស៊ីវិល​នៅក្នុងសង្គ្រាមរយៈពេល​១៤​ខែរវាងអ៊ីស្រាអែល និងក្រុមហាម៉ាស​ក្នុង​តំបន់​ហ្គាហ្សា។

ក្រសួង​មហាផ្ទៃ​ហ្គាហ្សា បាន​​ប្រកាស​​នៅក្នុងសេចក្តីថ្លែងការណ៍មួយថា៖ «តាមរយៈការប្រព្រឹត្តឧក្រិដ្ឋកម្មនៃការធ្វើឃាតអគ្គស្នងការប៉ូលិសនៅក្នុងតំបន់​ហ្គាហ្សាស្ទ្រីប អ្នក​ឈ្លានពាន​កំពុងទទូចឲ្យ​មាន​ការ​រីករាលដាល​នូវ​ភាពវឹកវរ​​ និង​ធ្វើ​ឲ្យ​ពលរដ្ឋ​កាន់តែ​​ឈឺចាប់​ជា​ខ្លាំង»។

យោធាអ៊ីស្រាអែល បាននិយាយថា ខ្លួនបានធ្វើការវាយប្រហារដែលមានមូលដ្ឋាននៅ​​​តំបន់ Al-Mawasi ស្ថិតនៅភាគខាងលិចនៃទីក្រុង Khan Younis ហើយបានកម្ចាត់លោក Shahwan ដែល​ជា​មេ​ដឹក​នាំ​កងកម្លាំងហាម៉ាសនៅភាគខាងត្បូង​តំបន់ហ្គាហ្សា។

លោក Philippe Lazzarini ប្រធានទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន UNRWA បាន​បង្ហោះ​សារ​​នៅលើ​បណ្ដាញ​សង្គម X ថា៖ «នៅពេល​ឆ្នាំ​ថ្មី​ចាប់​ផ្ដើម យើង​ទទួល​បាន​ការ​រំលឹក​មួយ​ទៀត​ថា វា​គ្មាន​ទេ​តំបន់​មនុស្សធម៌ ចុះ​ទម្រាំ​​តែ​តំបន់​ដែល​មាន​សុវត្ថិភាព​ទៅ​ទៀត។ រាល់​ថ្ងៃ​បើ​គ្មាន​បទ​ឈប់​បាញ់​ទេ សោកនាដកម្ម​នឹង​កាន់​តែ​ច្រើន​ឡើង»។

សូម​បញ្ជាក់​ថា យោងតាមក្រសួងសុខាភិបាលហ្គាហ្សា អ៊ីស្រាអែលបានសម្លាប់ជនជាតិប៉ាឡេស្ទីនជាង ៤៥ ៥០០​នាក់នៅក្នុងសង្រ្គាម​​ ខណៈ​​ពលរដ្ឋ​ប្រមាណ ២,៣​លាន​នាក់​ត្រូវ​បង្ខំ​ឲ្យ​ផ្លាស់ប្ដូរ​ទីលំនៅ។

សង្គ្រាមនេះ ត្រូវបានបង្កឡើងដោយការវាយប្រហារឆ្លងព្រំដែន​មួយ​កាលពីថ្ងៃទី​៧​ខែតុលា​ឆ្នាំ​២០២៣របស់​ក្រុម​ហាម៉ាសទៅលើភាគខាងត្បូង​ប្រទេស​អ៊ីស្រាអែល ដែលក្នុងនោះមនុស្ស ១ ២០០​នាក់ត្រូវបានសម្លាប់ និង ២៥១​​​នាក់ទៀតត្រូវបានចាប់ធ្វើជាចំណាប់ខ្មាំងទៅកាន់តំបន់ហ្គាហ្សា៕

ដោយ៖ ឈាង