ស្ត្រី​ជនជាតិ​អង់គ្លេសនិង​គូដណ្តឹង​​ស្លាប់​នៅ​​​តំបន់​លំហែកាយ​វៀតណាម ខណៈមូលហេតុ​នៅ​អាថ៌​កំបាំង​​​នៅឡើយ​

ស្ត្រីជនជាតិអង់គ្លេសម្នាក់ និងគូដណ្តឹងជនជាតិអាហ្រ្វិកខាងត្បូង ត្រូវបានគេប្រទះឃើញស្លាប់នៅក្នុង​បន្ទប់​ស្នាក់​នៅ​​លំហែកាយ​មួយ​កន្លែង​នៅប្រទេសវៀតណាម។ នេះបើយោងតាមការចេញផ្សាយរបស់សារព័ត៌មាន ​BBC។

Greta Marie Otteson អាយុ៣៣ឆ្នាំត្រូវបានបុគ្គលិក​កន្លែងស្នាក់​នៅ​នោះ​ ប្រទះឃើញដេកស្លាប់នៅលើគ្រែក្នុងបន្ទប់ជាន់ទី១ ក្នុងទីក្រុង Hoi An ជាតំបន់កណ្តាលនៃប្រទេសវៀតណាមនៅម៉ោងប្រហែល១១:១៨នាទីម៉ោងក្នុងស្រុកកាលពីថ្ងៃទី ២៦ខែធ្នូ។ ចំណែកគូដណ្តឹងរបស់នាងឈ្មោះ Els Arno Quinton អាយុ៣៦ឆ្នាំ ត្រូវបានគេប្រទះឃើញដេកស្លាប់នៅលើគ្រែក្នុងបន្ទប់មួយផ្សេងទៀតក្នុងវីឡា​ដដែល​នោះ​ ដោយ​បន្ទប់ត្រូវបានចាក់សោពីខាងក្នុង។

បើតាមព័ត៌មានបឋម Otteson គឺជាអ្នកគ្រប់គ្រងប្រព័ន្ធផ្សព្វផ្សាយសង្គម ហើយ លោក Quinton គឺជាតន្ត្រីករ​និងជាអ្នកផ្សាយផ្ទាល់។ ពួកគេទាំងពីរទើបតែភ្ជាប់ពាក្យដោយ វីដេអូប្រកាសពីការភ្ជាប់ពាក្យរបស់ពួកគេត្រូវបានបង្ហោះនៅលើ Instagram ដោយក្រុមហ៊ុនវីដេអូ Red Eye Studios កាលពីថ្ងៃទី១១ខែធ្នូ។

អ្នកទាំងពីរបានចុះឈ្មោះស្នាក់នៅបណ្តោះអាសន្នរយៈពេលវែងនៅវីឡា Hoa Chuong ក្នុងឃុំ Cam Thanh តាំងពីរដូវក្តៅឆ្នាំមុន។

ពាក់ព័ន្ធបញ្ហានេះ ក្រសួងការបរទេសរបស់ចក្រភពអង់គ្លេសបានកំពុងទាក់ទងជាមួយអាជ្ញាធរមូលដ្ឋាន និងជួយដល់គ្រួសាររបស់ស្ត្រីជនជាតិអង់គ្លេសដែលបានស្លាប់នៅក្នុងប្រទេសវៀតណាមនេះផងដែរ។

ប៉ូលិស បាននិយាយថា ការពិនិត្យសាកសពជាបឋម ពុំមានស្លាកស្នាមអ្វីដោយការប្រើ​ហិង្សា​ឡើយ​ ហើយបន្ទប់ទាំងនោះមិនឃើញមានស្លាកសញ្ញាចោរកម្មឡើយ។ បើតាមប្រព័ន្ធផ្សព្វផ្សាយក្នុងស្រុករាយការណ៍ថា មាន​ដបស្រាទទេជាច្រើនត្រូវបានរកឃើញនៅកន្លែងកើតហេតុ។ មកដល់ពេលនេះប៉ូលិសកំពុងធ្វើការស៊ើបអង្កេតលើមូលហេតុនៃការស្លាប់របស់អ្នកទាំងពីរនៅឡើយ៕

អត្ថបទ៖ ប៊ុន សុភាព