ព័ត៌មានអន្ដរជាតិ

ភ្លើងឆេះព្រៃកាន់តែខ្លាំងនៅភាគអាគ្នេយ៍អូស្ត្រាលីចំពេលរលកកម្ដៅកើនឡើង

បានផុស

១ year មុន

នៅ

ថ្ងៃចន្ទ ២៧ មករា ២០២៥

ដោយ

ក្រោយរងឥទ្ធិពលរលកកម្ដៅខ្លាំង ភាគអាគ្នេយ៍នៃប្រទេសអូស្ត្រាលីបានរងភ្លើងឆេះព្រៃដ៏សម្បើម និងជំរុញឱ្យអាជ្ញាធរចេញបម្រាមនានាជុំវិញហេតុការណ៍ភ្លើងឆេះព្រៃនេះសម្រាប់ផ្នែកជាច្រើននៃរដ្ឋ Victoria ។ នេះបើយោងតាមការចេញរបស់ទីភ្នាក់ងារព័ត៌មាន AP នៅថ្ងៃទី២៧ខែមករានេះ។

អ្នកព្យាករណ៍អាកាសធាតុរបស់ប្រទេសនេះ បានព្រមានថា សីតុណ្ហភាពអាចឡើងដល់៤១អង្សាសេនៅក្នុងរដ្ឋធានី Melbourne របស់រដ្ឋ Victoria ដែលខ្ពស់ជាង១៤អង្សាសេធៀបនឹងសីតុណ្ហភាពអតិបរមាមធ្យមរបស់រដ្ឋនេះសម្រាប់ខែមករា។

សីតុណ្ហភាពក្ដៅខ្លាំងនេះបាននាំមកនូវការចងចាំពីគ្រោះមហន្តរាយឆ្នាំ ២០១៩-២០២០ ដែលហៅថា «Black Summer» ដែលបានឆេះបំផ្លាញតំបន់មួយមានទំហំប៉ុនប្រទេសតួកគី ដោយសម្លាប់មនុស្ស៣៣នាក់និងសត្វរាប់លានក្បាលងាប់។

អាជ្ញាធរបានវាយតម្លៃគ្រោះថ្នាក់ភ្លើងគឺកម្រិតគ្រោះថ្នាក់ខ្លាំងបំផុតទីពីរក្នុងតំបន់ចំនួន៥ក្នុងរដ្ឋ Victoria នៅថ្ងៃចន្ទ ស្របពេលដែលមានភ្លើងឆេះនៅក្នុងតំបន់មួយចំនួននៅភាគអាគ្នេយ៍របស់ប្រទេសនេះស្រាប់ទៅហើយ។

លោក Dean Narramore អ្នកជំនាញឧតុនិយមជាន់ខ្ពស់នៃអ្នកព្យាករណ៍បានប្រាប់ក្រុមហ៊ុន Australian Broadcasting Corp ថា ស្ថានភាពក្តៅស្ងួតនិងខ្យល់ខ្លាំងអាចបង្កឱ្យមានភ្លើងឆេះធំបន្ថែមទៀត។

ជាមួយគ្នានេះ រដ្ឋ New South Wales រដ្ឋ South Australia រដ្ឋភាគខាងលិចអូស្ត្រាលី Queensland និង Northern Territory ក៏ស្ថិតនៅក្រោមការជូនដំណឹងអំពីរលកកម្ដៅនៅថ្ងៃចន្ទនេះដែរ ហើយអ្នកព្យាករណ៍ថា រលកកម្ដៅនឹងបន្តកើនឡើងកាន់តែខ្លាំងនៅថ្ងៃអង្គារ៕