ព័ត៌មានអន្ដរជាតិ

អាមេរិកនៅជាប់បំណុលយូណេស្កូ ៦១៩លានដុល្លារទៀតដែលខ្លួនសន្យា តែមិនផ្តល់

បានផុស

១ year មុន

នៅ

ថ្ងៃពុធ ៥ កុម្ភៈ ២០២៥

ដោយ

នៅពេលប្រធានាធិបតីសហរដ្ឋអាមេរិក លោក ដូណាល់ ត្រាំ បានបញ្ជាឲ្យរដ្ឋមន្ត្រីការបរទេសអាមេរិកត្រួតពិនិត្យឡើងវិញនិងវាយតម្លៃឡើងវិញក្នុងរយៈពេល៩០ថ្ងៃចាប់ពីថ្ងៃទី៤ខែកុម្ភៈក្នុងការដកប្រទេសអាមេរិកពីសមាជិកនៃអង្គការយូណេស្កូ សហរដ្ឋអាមេរិកនៅជាប់បំណុលអង្គការយូណេស្កូ៦១៩លានដុល្លារទៀត ដែលអាមេរិកសន្យាជួយកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គការយូណេស្កូ បានឲ្យដឹងថា សហរដ្ឋអាមេរិកបានប្តេជ្ញាក្នុងការទូទាត់បំណុលដែលជាប់គាំងរបស់ខ្លួន ដែលសរុបមានប្រហែល៦១៩លានដុល្លារគិតត្រឹមឆ្នាំ២០២៣។ ផែនការទូទាត់បំណុលនេះរួមបញ្ចូលទាំងការរំលស់ប្រចាំឆ្នាំជាមួយនឹង ៧៤,៦ លានដុល្លារដែលគ្រោងទុកសម្រាប់ឆ្នាំ២០២៥។

លោក ដូណាល់ បានចេញបទបញ្ជាប្រតិបត្តិនេះ ស្របពេលដែលលោក ដូណាល់ ត្រាំ បានចេញអធិបញ្ជាឲ្យដកខ្លួនភ្លាមៗពីស្ថាប័នអន្តរជាតិចំនួនពីរ គឺក្រុមប្រឹក្សាសិទ្ធិមនុស្សនៃអង្គការសហប្រជាជាតិ (UNHRC) និងភ្នាក់ងារផ្តល់ជំនួយដល់ប្រជាជនប៉ាឡេស្ទីន (UNWRA)នៅថ្ងៃទី៤ខែកុម្ភៈ។

បទបញ្ជាប្រតិបត្តិដែលបានបញ្ចេញនៅលើគេហទំព័ររបស់វិមានប្រធានាធិបតី (www.whitehouse.gov) បានលើកឡើងថា «ការត្រួតពិនិត្យនេះត្រូវដឹកនាំដោយរដ្ឋមន្ត្រីការបរទេស ដោយមានការសម្របសម្រួលជាមួយអ្នកតំណាងសហរដ្ឋអាមេរិកប្រចាំអង្គការសហប្រជាជាតិ (ឯកអគ្គរដ្ឋទូតអង្គការសហប្រជាជាតិ) ហើយត្រូវបញ្ចប់ក្នុងរយៈពេល ៩០ថ្ងៃ គិតចាប់ពីថ្ងៃនៃការចេញបទបញ្ជានេះ»។

ក្នុងសេចក្តីប្រកាសនោះ បានបន្តថា៖«ការពិនិត្យឡើងវិញនឹងរួមបញ្ចូលការវាយតម្លៃអំពីវិធីនិងប្រសិនបើ UNESCO គាំទ្រផលប្រយោជន៍របស់សហរដ្ឋអាមេរិក។ ជាក់ស្តែង ការពិនិត្យឡើងវិញនឹងរួមបញ្ចូលការវិភាគអំពីគំនិតប្រឆាំងនឹងពួកយូដា ឬប្រឆាំងនឹងអ៊ីស្រាអែលណាមួយនៅក្នុងអង្គការ»។

យោងតាមគេហទំព័អង្គការយូណេស្កូ (pax.unesco.org) សហរដ្ឋអាមេរិកបានរួមចំណែកយ៉ាងសំខាន់ដល់ថវិការបស់អង្គការយូណេស្កូ តាមរយៈការចូលរួមវិភាគទានតាមការវាយតម្លៃ និងការស្ម័គ្រចិត្ត។ វិភាគទានដែលបានវាយតម្លៃត្រូវបានកំណត់នៅ ២២% នៃថវិកាចំណាយរបស់អង្គការយូណេស្កូ។ នៅឆ្នាំ២០២៥ សហរដ្ឋអាមេរិកបានផ្តល់វិភាគទានស្ម័គ្រចិត្តចំនួនជិត៤០លានដុល្លារ។

សហរដ្ឋអាមេរិកផ្តល់ការរួមចំណែកដោយស្ម័គ្រចិត្តក្នុងការគាំទ្រកម្មវិធីជាក់លាក់របស់អង្គការយូណេស្កូ ដូចជាគំនិតផ្តួចផ្តើមលើកកម្ពស់លទ្ធភាពទទួលបានការអប់រំនៅទ្វីបអាហ្រ្វិក ការថែរក្សាការចងចាំនៃការសម្លាប់រង្គាល និងការការពារអ្នកសារព័ត៌មាន។ ចំនួនពិតប្រាកដនៃការរួមចំណែកដោយស្ម័គ្រចិត្តទាំងនេះអាចប្រែប្រួលជារៀងរាល់ឆ្នាំ ដោយផ្អែកលើការបែងចែកថវិកា និងអាទិភាពគោលនយោបាយ។

សហរដ្ឋអាមេរិកដើរតួនាទីយ៉ាងសំខាន់ក្នុងការផ្តល់មូលនិធិដល់ប្រតិបត្តិការ និងគំនិតផ្តួចផ្តើមរបស់អង្គការយូណេស្កូ ដោយឆ្លុះបញ្ចាំងពីការប្តេជ្ញាចិត្តរបស់ខ្លួនចំពោះកិច្ចសហការអន្តរជាតិក្នុងវិស័យអប់រំ វិទ្យាសាស្ត្រ និងវប្បធម៌។

ក្នុងអាណត្តិមុន លោក ដូណាល់ ត្រាំ បានដកអាមេរិកចេញពីអង្គការយូណេស្កូម្តងរួចទៅហើយ ប៉ុន្តែក្រោមរដ្ឋបាលលោក ចូ បៃដិន សហរដ្ឋអាមេរិកបានវិលចូលជាសមាជិកអង្គការយូណេស្កូដែលមានមូលដ្ឋាននៅទីក្រុងប៉ារីសកាលពីខែកក្កដាឆ្នាំ២០២៣ គឺផ្អែកលើការព្រួយបារម្ភដែលថា ប្រទេសចិនបានបំពេញចន្លោះនៃភាពជាអ្នកដឹកនាំចាប់តាំងពីសហរដ្ឋអាមេរិកបានដកខ្លួនចេញក្នុងអំឡុងពេលរដ្ឋបាលរបស់លោក ដូណាល់ ត្រាំ៕

ដោយ រ៉ាន់ រើយ