ដូណាល់ ត្រាំ ចង់ជួប គីម ជុងអ៊ុន ម្តងទៀត

ប្រធានាធិបតីអាមេរិកលោក ដូណាល់ ត្រាំ បានបង្ហាញពីបំណងជួបជាមួយមេដឹកនាំកូរ៉េខាងជើង គីម ជុងអ៊ុន ម្តងទៀត ហើយចាប់ផ្តើមទំនាក់ទំនងផ្នែកការទូតរវាងទីក្រុងវ៉ាស៊ីនតោននិងព្យុងយ៉ាង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកត្រាំ លើកឡើងបែបនេះក្នុងសន្និសីទសារព័ត៌មានជាមួយនាយករដ្ឋមន្ត្រីជប៉ុន ហ្ស៊ីកេរុ អ៊ីហ្ស៊ីបា នៅឯសេតវិមានកាលពីថ្ងៃសុក្រទី៧ខែកុម្ភៈឆ្នាំ២០២៥។

ក្នុងអំឡុងពេលនោះ លោកត្រាំ បាននិយាយដូច្នេះ «ខ្ញុំគិតថា វាជាលាភធំសម្រាប់មនុស្សគ្រប់គ្នាដែលឃើញ ខ្ញុំធ្វើការជាមួយគាត់។ ខ្ញុំចង់មានន័យថា ខ្ញុំចុះសម្រុងជាមួយគាត់ ហើយគាត់ក៏ចុះសម្រុងជាមួយខ្ញុំដែរ ហើយនោះជារឿងល្អ មិនមែនជារឿងអាក្រក់ទេ»។

លោក ត្រាំ បន្តថា «យើងនឹងមានទំនាក់ទំនងជាមួយកូរ៉េខាងជើង និងជាមួយលោក គីម ជុងអ៊ុន តែម្តង។ ខ្ញុំ​គិត​ថា​ខ្ញុំ​បាន​បញ្ឈប់​សង្គ្រាមហើយ! ជ័យជម្នះក្នុងការបោះឆ្នោតឆ្នាំ២០១៦ របស់ខ្ញុំបានជួយការពារជម្លោះ។ ខ្ញុំគិតថា បើខ្ញុំមិនឈ្នះការបោះឆ្នោតពិសេសនោះទេ អ្នកប្រហែលស្ថិតក្នុងស្ថានភាពដ៏អាក្រក់ហើយ ប៉ុន្តែ​ខ្ញុំ​ធ្វើបាន ហើយ​យើង​មាន​ទំនាក់ទំនង​ល្អ​ណាស់»​។

សូមជម្រាបថា ក្នុងឆ្នាំ២០១៨ លោកត្រាំ និងលោកគីម បានជួបគ្នានៅប្រទេសសិង្ហបុរី សម្រាប់កិច្ចប្រជុំកំពូលលើកដំបូងរវាងប្រធានាធិបតីអាមេរិកដែលកំពុងកាន់អំណាច ជាមួយមេដឹកនាំកូរ៉េខាងជើង។ កិច្ចប្រជុំនោះ សម្រេចបានកិច្ចព្រមព្រៀងធំមួយស្តីពីការរំសាយអាវុធនុយក្លេអ៊ែរ ទោះបីជាគេមិនដឹងលម្អិតក៏ដោយ។

កិច្ចប្រជុំកំពូលលើកទីពីរគឺនៅទីក្រុងហាណូយក្នុងឆ្នាំ២០១៩ ប៉ុន្តែវាបានបញ្ចប់ទៅដោយគ្មានកិច្ចព្រមព្រៀងអ្វីទេ ព្រោះតែមានការខ្វែងគំនិតគ្នាលើវិធានការបន្ធូរបន្ថយទណ្ឌកម្ម និងកម្មវិធីនុយក្លេអ៊ែររបស់កូរ៉េខាងជើង។

លុះមកដល់ចុងឆ្នាំនោះ លោក ត្រាំ បានក្លាយជាប្រធានាធិបតីកាន់តំណែងដំបូងគេក្នុងប្រវត្តិសាស្រ្តអាមេរិក ដែលឈានជើងលើទឹកដីកូរ៉េខាងជើង ដោយមេដឹកនាំទាំងពីរ បានជួបគ្នាក្នុងតំបន់គ្មានយោធា ដែលពុះចែកកូរ៉េខាងជើងនិងកូរ៉េខាងត្បូង៕

អត្ថបទ៖ សុខ សុវណ្ណ

ចុចអាន៖ កូរ៉េ​ខាង​ត្បូង៖ កូរ៉េ​ខាង​ជើងបាញ់​មីស៊ីល​លើក​ទី​២ក្នុង​ឆ្នាំ​២០២៥ មុន​ពេល ត្រាំ ឡើង​កាន់​តំណែង